Gara Ibirootaa 3 - WAADAA LAMMATAA

Yesuus Muusee Caala

¹ Kanaafuu obboleeyyan woyyoota, worri waamsa sami'ii irraa qoodamtoota taatan, gara ergamaa amantaa keennaatii fi gadicha hayyicha Yesuus Kiristoosii laalaa'a.

² Akkuma Muuseen mana Rabbii keessatti amanamaa ture, innillee Rabbii isa muudeef amanama'a.

³ Namni mana ijaaru mana ufii caalaa ulfinna caalu akkuma qabu, akkasuma inni Muusee caalaa ka ulfinna guddaa qabu ta'ee argameera.

⁴ Manni maruu nama tokkoon ijaarame. Ka waan maraa qopheesse ammoo Rabbi.

⁵ Muuseen waan uf afo'otti dubbatamuuf san ragaa ta'u'uuf mana Rabbii maraa keessatti tajaajilaa amanamaa ture.

⁶ Kiristoos ammoo mana Rabbii keessatti akka Ilmaatitti amanama'a, nullee waan ittii abdannuuf abdii ittin boonnu haga dhumaa jabeessinee yoo eenne nullee mana isaati.

Harabaafata Banii Rabbii

⁷ Kanaafuu akka Ayyaanni woyyuun jedhu, «Adha, laagaa isaa yoo dhageettan,

^8-9 Akka hennaa qormaata lafa gammoojji'ii keessatti Rabbiin dhibu'uun taatan san, «Mataa hin jabaatinaa'a! achitti, abbootiin teessan na qoranii; woggaa afurtamaa guutuu waan ani hojjadhe argan.

¹⁰ Kanaaf ani dhaloota sanitti aare. ‹Hennaa maraa onnee isaaniitiin hin dogoggoran; isaan karaa kiyya hin beenne jedhe.

¹¹ Akkasuma, ‹hulee harabaafata kiyyaa sirima hin galan! jedhee aari'iin kakadhe» jedhe.

¹² Obboleeyyan tiyya! Maal laataa waan Rabbii jiraataa isin waakkachiisu dhartichaa fi onneen hin amanne isin keessaa tokkollee akka hin jiraanne uf eegaa'a!

¹³ Haata'uu ammo isin keessaa eennullee cubbu'uun sobamu'uun morkataa akka hin taane, «Adhuma» waan guyyaa maraa uduma guyyaan sun hin lufne woliin mari'adhaa'a!

¹⁴ Amantaa keenna ka duraa haga dhumaa cimsinee uduu eennee worra Kirstoosiin woliin jeennata Rabbii keessa jiraatu taaneerra.

¹⁵ «Laagaa jedhu uduu dhageettan diddanii, onnee teessan morkataa hin godhinaa'a!»

¹⁶ Worri dhagayanii didan eennuun fa'a, worra Muuse'een masakkamanii Misirii bayan sanniinii mii?

¹⁷ Ka woggaa afurtamaa loleen eennuun fa'a turan? Ka reeffi isaa lafa gammoojji'ii keessatti kufe worri cubbuu hojjatan isaanii mii?

¹⁸ Worra hin ajajamne yoo ta'e malee gara hulee harabaafannaa kiyyaa hin galtan jedhee ka itti kakate eennuun fa'a?

¹⁹ Amanuu dhabuu isaaniitiin gara hulee harabaafanna'aa seenuun akka isaanii hin danda'amne argina.