Gara Ibirootaa 10 - WAADAA LAMMATAA

¹ Seerri waan mishaa dhufu saniif gaaddiddu'u malee, bifa dhugaa isaatii miti. Kanaafuu wogga wogga'aan hennaa maraa ciincaa dhiyaatu sirimaa guutuu taasisuu hin danda'u.

² Akkana uduu ta'u dhabaatee worri kaddaaman hennaa tokko qulqullaayanii achiin maayii sammuu isaaniitiin cubbuu waan hin beenneef silaa ciincaa dhiyyeessuu hin dhiisanii?

³ Haata'uu ammoo ciincaan kun maruu, ka isaan wogga wogga'aan cubbuu ittiin yaadan.

⁴ Dhiinni kormaatii fi dhiinni re'iinii cubbuu balleessuu hin dandeenne.

⁵ Kanaafuu hennaa gara adunya'aa dhufe, «Ati kenna'aa fi ciincaa hin jaalanne, nafa naa qopheessite.

⁶ Ati kennaa ciinca'aatii fi, kennaa sababa cubbu'uutiif ciincawu marattuu hin gammanne.

⁷ Hennaa san kunoo anillee, akkuma wonti kiyya Kitaaba maramu keessatti barreeffame, Waaqa kiyya, ani fedha kee raawwatu'uuf dhufeera› jedheen» jedha.

⁸ Kana irratti kenna'aa fi ciincaa gubatu maraa ciincaa sababaa cubbu'uutiif dhiyaatullee hin jaalanne. Isattillee hin gammanne jedhe. Kunniin waan akka seeraatitti dhiyaatan.

⁹ Itti aansee Waaqa kiyya! «Ani fedhii kee guutu'uuf dhufeera» jedhe. Ka lammaffa'aa ijaaru'uuf jedhee, ka duraa diiga.

¹⁰ Akka fedha Rabbiitiin nu foon Yesuus Kiristoosii ka hennaa tokko ciincaa ta'ee kennameen woyyuu taaneerra.

¹¹ Hayyoonni gadootaa maruu guyya guyya'aan tajaajila ciincaa sirima cubbuu balleessuu hin dandeenne saniin hennaa maraa dhaabatee dhiyeessa.

¹² Kiristoos ammoo hennaa tokko ciincaa bara baraaf ta'u haga dhiyeesseen maayessa mirga Rabbii taa'e.

¹³ Hennaa san irraa jalqabee haga diintoonni luka isaa jala ta'aniif hin eeggata.

¹⁴ Inni hennaa tokko uf kennee worra woyyooman baraa haga bara baraa guutuu isaan taasiseera.

^15-16 Ayyaanni Woyyuun akkasuma waan kana nu raga; «Hennaa jiini sun gaye, waadaan isaan woliin galu kana jedha Gooftaan. Seera kiyya isaan keessa kaaya; laphee isaanii keessattillee hin barreessa» jedhee haga dubbateen maayii,

¹⁷ Itti eda'ee, «Cubbuu isaaniitii fi hammeenna isaanii deebi'ee hin qaabadhu» jedha.

¹⁸ Eega araarri maraaf kenname ammaa achi ciincaan cubbu'uuf dhiyeeffamu hin jiru.

Koottaa Gara Rabbii Dhiyaannaa

^19-20 Eeganaa obboleeyyan tiyya, dhiiga Yesuusiitiin hulee woyyittii woyyootaatitti galu'uuf ugga waan qabnuuf, nu karaa golga jechuun karaa haarawaa fi jiraataa inni foon ufiitiin nuu baneen seenna.

²¹ Hayyicha gadicha guddaa mana Rabbii irratti baallii qabu waan qabnuuf,

²² sodaa sammu'uu ka dharaa irraa qulqullaayu'uun garaa keenna qulqulleeffannee, nafa keenna bisaan qulqullu'uun dhiqannee, amantaa hubanneen garaa qajeelaa'an Rabbitti haa dhiyaannuu.

²³ Ka dubbii abdi'ii kenne amanamaa waan ta'eef, akka hin sochoone, ragaa abdii keennaa haa eennuu.

²⁴ Jaalalaa fi hujii misha'aaf haa dadammandhuu; wol haa tooyannuu.

²⁵ Akkuma kaawwan biratti baratame, wolgeettii keennallee akka hin dhiifne, woliin haa mari'annuu malee, guyyaa dhufa Goofta'aa qaabata'aa ta qaraa caalaa kana godhaa'a.

²⁶ Beekkomsa dhuga'aa haga arganneen maayii, beeka'aa cubbuu yoo hojjanne, ammaa achi, ciincaan waan cubbu'uutiif dhiyaatu hin jiru.

²⁷ Ammaa achi murti'ii fi ibidda sodaachisaa diintoota Rabbii balleessu callaa eeggatu'utu hafe.

²⁸ Namni seera Muuse'ee tuffate, Namni lamaa yookiin sadihii yoo itti rage, gara laafinna malee ajjeefama.

²⁹ Namni Ilma Rabbii tuffate, waadaa dhiiga ittiin qulqullaaye san ka akka batti'iititti laakkaye, ka Ayyaana badhaadhaa arrabse adabbiin maraa caalu isa irratti waan hin taane seetanii?

³⁰ «Haluun tiyya, ani haluu sii baasa» ka jedhe waan beennuuf, akkasuma «Gooftaan banii ufiititti hin murteessa»

³¹ Harka Rabbii jiraata'aatitti kufuun nama sodaachisa.

^32-33 Haga ifni isinii ifeen maayessa hennaa duri rakkinna isin irra gaye san qaabadhaa'a. Isin hennaa tokko tokko nama afo'otti arrabamtaniirtan, dhiphattanii hennaa biraallee worra akkana rakkatan woliin rakkattaniirtan.

³⁴ Qabeenna caalu sami'itti isinuu akka qabdan beettaniirtan. Hidhama kiyyaaf garaa naa laaftan, qabeenni keessan hennaa fudhatamu obsitanii gammachu'uun laaltan.

³⁵ Eeganaa abdii uggiitii keessanii ka gatii guddaa qabu hin gatatinaa'a!

³⁶ Fedhii Rabbii raawwattanii, dubbii abdi'ii ka isinii kenname akka argitan obsuu isin barbaachisa.

³⁷ «Hennaa diqqo'oon maayii, ka dhufu'uuf ta'u, uduu hin turre dhufa.

³⁸ qajeelaan, amanta'aan jiraata; yoo inni gara duubaa deebi'e, lubbuun tiyya isatti hin gammaddu»

³⁹ Nu ammoo worra lubbuu ufii hanbisu'uuf amane malee, worra gara duubaatitti deebi'ee baduu miti.