Gara Ibirootaa 1 - WAADAA LAMMATAA

Rabbi Karaa Ilma Ufiitiin Dubbate

¹ Rabbi duri irraa jalqabee akkaataa hedduuf karaa hedduun abboota teennaa fi Raattotaan dubbate.

² Amma ammoo bara maayi'ii kanatti Ilma ufiitiin nutti dubbateera, Ilmi isaa kun ka inni akka waa maraa dhaalu godhee muudee fi ka inni ittiin adunyaa uume.

³ Inni ka ulfinna isaa calanqisiisuu fi fakkeenna amala isaa ta'ee maraa baallii dubbii ufiitiin irkisa'aa, cubbuu keenna haga qulqulleesseen maayessa sami'itti mirgaa Rabbii ulfinna qabeessaa taa'e.

Ilmi Rabbii Maleekkotaa Oli

⁴ Maqaan Rabbi isaa kenne maqaa ergamtoota Rabbii caalu akkuma ta'e, Ilmi Rabbii ergamtoota Rabbii caala.

⁵ Maleekkota keessaa, «Ati ilma kiyya, ani adha si uumadhe» akkasuma eennuun, «Ani Abbaa isaa ta'a, innillee Ilma naa ta'a» jedhee beeka?

⁶ Akkasuma hennaa hangafa gara adunya'aa erge, «Maleekkoonni Rabbii maruu isaa haa sagadanii» jedha.

⁷ Hennaa waan Maleekkota Ufii dubbatu, «Inni Maleekkota ufii qilleensa, tajaajiltoota ufii ammoo arraba ibiddaa godha» jedhe.

⁸ Waan ilma ufii ammoo, «Waaqa kiyya, teessoon kee haga bara baraa jiraata; uleen jeennata keetii ulee nagayaa ti.

⁹ Qajeellummaa jaalattee dhara jibbite; kanaaf Waandhi Rabbiin kee, hiriyyaa kee caalaa muudama gammachu'uutiin si muude» jedha.

¹⁰ Akkasuma, «Gooftaa kiyya, ati dura lafa uumte; samiinillee hujii harka keetiitti.

¹¹ Isaan hin badan; ati ammoo hin jiraatta; maruu akka uffataatitti moofan,

¹² Ati akka woya'aatitti isaan mammarta; isaanillee akka uffataa hin jijjiiraman. Ati ammoo sanuma; woggoon kee sirimaa hin dhumatu» jedha.

¹³ Maleekkota keessaa eennuun, «Haga diina kee ejjannaa luka keetii sii godhuuf mirga kiyya taa'i» jedhe?

¹⁴ Maleekkonni Rabbii maruu, ayyaana worra fayyinna dhaalan kana tajaajilu'uuf ergamanii mii?