2 Gara Ximotewoosii 4 - WAADAA LAMMATAA

¹ Rabbiin afo'otti Yesuus Kiristoosiin worra jiraniif worra du'an maratti murteessu'uuf deebi'ee dhufuuf jeennata isaa yaada'aa jabeesse si gorsa.

² Dubbii Rabbii lallabi hennaa sii tolee fi hennaa si hin tollellee, jabaadhu; obsa gudda'aan barsiisa'aa sirreessi, gorsille'e.

³ Hennaan namoonni, barumsaa sirrii ta'e dhagayuu jibban waan dhufuuf, worra gurrii isaanii dhugaa dhagayuu dhiise, dhara dhagayu'uuf isa hoossisu, akka fedha ufiititti barsiisota ufii qopheeffatan.

⁴ Gurrii isaanii dhugaa dhagayuu dhiisee, gara oduu faayidaa hin qabnee siiqan.

⁵ Ati ammoo waa maraa uf eega'aa raawwadhu, rakkinna obsi, hujii kee lallaba Oduu Nagayaa godhadhu. Hujii kee raawwadhu.

⁶ Lubbuun tiyya amma akka dhibaayu'uutitti jigu'uuf taati; hennaan deemullee gayeera.

⁷ Wondhaansoo mishaa bayeera; fiigicha kiyya fixeera. Amantaa kiyya eeggadheera, uf afo'otti badhaasaaf qajeellummaan naaf qophaayeera.

⁸ Kanallee Gooftaan kiyya ka murtii qajeellumma'aa murteessu akkasuma ana calla'aaf uduu hin taane worra dhufa isaa hawwan maraafuu hin kenna.

Yaada Phaawuloos Kenne

⁹ Daddaftee akka gara kiyya dhuftu jabaadhu. Deemaas biyya lafaa tana waan jaalateef, na dhiisee,

¹⁰ Gara Tasoloonqe'ee deemeera. Qerqiisi gara Galaatiyaa, Tiitoonillee gara Dilimaxiya'aa deemaniiran.

¹¹ Luuqaasiin calla'atu na woliin jira. Maarqosi tajaajilaaf waan na gargaaruuf qabadhuu naa koottuun.

¹² Tiikiqoosiin ammoo gara Efesoonii erge.

¹³ Hennaa dhuftu waaro'oo fi kitaaba barreeffamaa, keessatuu ka gogaa irratti barreeffame ka Akiriphaa biratti dhiise, fudhii naa koottuun.

¹⁴ Tumtuun sibiilaa Iskinidiroos guddisee na miidhe; Gooftaan akka hujii isaatitti isaa deebisa.

¹⁵ Waan nu dubbannu guddisee waan mormuuf, atillee isa irraa uf eegi.

¹⁶ Hennaa ani waan ittiin himatame san dhiyeeffadhe, martinuu narraa dheessan malee, eennullee na hin gargaarre. Rabbi kana isaanitti hin laakkayin.

¹⁷ Haata'uu ammoo hujiin lallaba Oduu Nagayaa ka anaan raawwatamuuf, akka worri Yihuudotaa hin taane martinuu dhagayaniif Gooftaan na bira dhaabatee na jabeesse. Afaan leencaa jalaallee na hambise.

¹⁸ Gooftaan hamaa maraa jalaa na hambisa. Jeennata sami'iititti nagayaan na galcha, isaaf bara haga bara baraa ulfinni haata'u! Amiin.

Nagaya Dhumaa

¹⁹ Maatii Phirsqiila'aa, Aqiila'aatii fi Henesfooruutitti nagaya naa himi.

²⁰ Erisxos Qorontoositti hafe; Xiirofimoosi ammoo dhibamnaan Milixiinitti dhiise.

²¹ Uduu ganni hin seenini akka dhuftu jabaadhu. Ewugiloosi, Pheedees, Liinos, Qilawuudiyaanii fi obboleeyyan maruu nagaya sii dhaamaniiran.

²² Gooftaan Yesuus Kiristoos hafuura kee woliin haa jiraatu. Badhaani isin woliin haata'u. Amiin!