1 Gara Ximotewoosii 3 - WAADAA LAMMATAA

Seera Worra Woldaa Kiristaanaa

¹ «Ennullee tooyata'aa fi bulchaa ta'uu yoo barbaade hujii mishaa hawwa» jechi jedhu amanama'a.

² Eegasuu tooyataan, ka mudaa hin qabne, nama haadha manaa tokkotii qabu, ka uf qabuu fi ka hagatti jiraatu, ka akka barbaadamutti hojjatu, ka keessummaa simatu, ka barsiisuu danda'u,

³ ka hin machoofne, ka nama hin ujulle gara-laafeessa nama hin mormine, ka birrii hin jaalanne,

⁴ nama maatii ufii sirri'itti bulfatu, nama ijoollee ulfinnaan isaa ajajamtu qabu ta'uu barbaachisa.

⁵ Namni mana ufii attamitti akka horatu hin beenne, Woldaa Kiristaanaa ta Rabbii attamiin eega?

⁶ Uf jaju'uun bokokee, murtii daabiloosiin irratti murteeffametti akka hin kufne, Kiristaana haarawa hin ta'in.

⁷ Mudaa daabiloosiitii fi siiboo isa irratti akka hin kufne, namoota ala jiran biratti ragaa mishaa haa qabaatanii.

Seera Gargaartota woldaa Kiristaanaa

⁸ Akkasuma gargaartonni woldaa kiristaanaa [diyaaqonoonni] worra bilchaate, ka arraba lama hin dubbane, worra dhuddoo hin hawwine,

⁹ Worra waan shingaa ta'e irraa fagaatanii, sammuu mishaan dhossaa amantaa eegan haa ta'anii.

¹⁰ Kunniinillee akkasuma duraa haa qoratamanii, achiin maayessa worra mudaa hin qabne yoo ta'an, gargaartoota ta'anii haa tajaajilanii.

¹¹ Akkasuma dubartoonnii worra bilchaatan, worra nama hin hamanne, worra hagatti jiraatanii fi waan maraanuu worra amanaman haa ta'anii.

¹² Gargaartoonni ijoollee ufiitii fi maatii ufii akka misha'aan worra bulchan, martii isaaniituu worra haadha manaa tokkittii qaban haa ta'anii.

¹³ Hujii gargaaru'uutiin worra akka misha'aan tajaajilan ufiif baallii gudda'aa fi amantaa Yesuus Kiristoosiitiin ugga guddaa argatan.

Dhossaa Guddaa

¹⁴ Daddafee gara kee akka dhufu abdata'aa, kana sii barreessa.

¹⁵ Yoo ture ammoo, mana worra Rabbii keessatti namni amala attamiitiin akka jiraatu akka sirri'itti beettu sii barreessa, mannillee bu'uura utubaa dhuga'aa ta woldaa Kiristaanaa Rabbii jiraata'aati.

¹⁶ Dhossaan Rabbiin fakkachu'uu mamii malee gudda'a; «Ka Fooniin mudhate, Ka Ayyaanaan qajeelaa ta'e, Ka Ergamtootatti mudhate, ka banii Yihuudii hin taanee lallabame, Ka biyya lafaa keessatti amaname, Ka ulfinnaan ol baye.»