1 Ergaa Phexiros 5 - WAADAA LAMMATAA

Qajeelcha Banii Rabbii Bulchu'uuf Kenname

¹ Eegasuu ani akkuma isaanii manguddoonni woldaa Kiristaanaa ragaa baatuu rakkinna Kiristoosii akkasuma ulfinna Kiristoosii ka mudhatu'uuf ta'u, qoodamu, manguddoota isaan jidduu jiran maraa hin gorsa.

² Tika Rabbii ka Rabbi akka isin tissitan isinitti kenne eegaa'a, hunnaan uduu hin taane akka fedha Rabbiititti, jaalalaan bulchaa malee, giddi'iin hin bulchinaa'a. Dhara bada'aanii miti, fedha mishaa'an malee.

³ Tooyadhaa'a; fakkeenna isaanii ta'aa'a malee, woldaa amantootaa hunnaan hin bulchinaa'a.

⁴ Bulchaan tissee hoolotaa hennaa dhufe badhaasa ulfinnaa ka hin banne argattani.

⁵ Kanaafuu ka'imman! Manguddootaa fi ajajamaa'a, marti keessanuu wol jaalachu'uun wol gargaara'aatii kasummaa akka uffataa uffadhaa'a. «Rabbi worra uf jaju hin morma;, worra kaso'oo ammoo badhaadha kenna»

⁶ Kanaafuu Rabbi hennaa ufiititti akka ol isin qabu harka Rabbii hunna qabeessaa jalatti gad-uf deebisaa'a. Inni waan keessan waan yaaduuf.

⁷ Waan isin rakkisu maraa isa irratti dhiifadhaa'a.

⁸ Diinni keessan daabiloos akka Leenca waan nyaatu soqa'aa asii achi naannaya'aa aaduu waan ta'eef, hagatti jiraadhaa'a, dammaqaa'a.

⁹ Obboleeyyan keessan ka adunyaa kana irra jiran rakkinni akkanaa kun akka isaan irra gayu beekaa'a; amanti'iin cima'aa dhaabadhaa'a daabiloosiin mormaa'a.

¹⁰ Karaa Yesuus Kiristoosiitiin gara badhaadha ulfinna maraa Waandhi isin waame hennaa diqqoo haga rakkinni isin irra gayeen maayessa, inninuu guutuu isin taasisa. Isin dhaaba, isin jajjabeessa.

¹¹ Isaaf ulfinninii fi hunni baraa haga bara baraa haa ta'u! Amiin.

Dhaamsa Dhumaa

¹² Badhaani dhaabattaniin badhaadha dhuga'aa ka Rabbii akka ta'u isin gorsa'aa, isinii raga'aa ka akka obboleessa amanamaa ta'etti isa laakkaye, karaa Siliwaanosii irraan gabaabamatti kana isinii barreesseera.

¹³ Woldeenni Kiristaanaa ta baabilooniin keessatti filatamteertuuf ilmi kiyya Maarqoosillee nagaya isinii dhaamaniiran.

¹⁴ Dhungoo jaalalaatiin wol reebbata'aa, nagaa wol gaafadhaa'a. Nageenni worra Kiristoosiin keessa jiraniif isiniillee haa ta'u! Amiin.