Matthaiga 6 - Winnebego Bible Portions 1907

¹ Hirakara‐uwiaje washa woga hashiniwira inke wankshig‐jowehireja uwinianje, hajawarnagii, shesgerawigi Hianjrawiga wangreginagre inke woirowe ningiunikjanihawina.

² Esge jaja washa woga hashinira shunkjegi, inke joweraija duduera hisha howexu‐hiranikjena, hipokritra wohokhuhojhieja egi naguhoxeteja shesge hireshunura, wankshigra warajankhirekjege, hisgexjina hinigawina, woirowera kurusnankshana.

³ Eshi jaja washa woga hashinira shungi nab hoirajge hashinira inke hiperes‐hinianje nab hoishoro hashinira jagu ungi.

⁴ Washa woga hashinira harnuxawanje egi Hianjraga E nuxawara hajarnakshana exji harusharani hirowe ningigikjanena.

⁵ Egi jaja ragikarajgi, hipokritra jasgarnangra inke shesgarnianje. E wohokhuhojhieja egi naguhoxete hopasseja nashinarnaga wankshigra hajairekjawige. Hisgexjina hinigawina woirowe harninera kurusnankshana.

⁶ Eshi ne, jaja ragikaraijegi, jhiakohi hashinieja hoikawaje egi jhirobra hornassaje, Hianjraga E nuxawanagra gikarajaje egi Hianjraga E washa nuxawara wajarnakshana harusharani hirowe‐ningigikjanena.

⁷ Eshi jaja ragikarajwigi inke hoite hoinige hakihaha hiuwinianje, hirarujeja herera unagra shesge, e hit’et’era rokana wairegi naxguinekjanihawi hiranankshana.

⁸ Esge inke wawikisgawinianje, Hianjrawiga hiperesnankshana washa jagu hishunkjanihawira, kheni ragitawini.

⁹ Egi deshesge gikarajra wawiaje: Hianjniwira wangregi shanagre rash hashinira wakanjank‐ningigirekjena,

¹⁰ Hungma hashinira hiraijikjawina, woshga hashinira manegi uinekjena wangregi jasge hinankhi shesge manegi hirekjena.

¹¹ Hamb de‐e waisgabduj harniwira hunkuwianje ningikarajwina.

¹² Egi washa woishana warniwira waigit’unawire, washa hingishana warniwira wagit’untawira shesge.

¹³ Egi inke washa woishana uwahieja hunutiwinina, eshi wowonkjega eja hingijirawige khishibwiwine. Hungmara Ne‐hashinigaja egi homashjara Ne‐hashinigaja, egi hoishagra Ne‐hashinigaja manegusra, Amen.

¹⁴ Egi wankshigra washa hinigishana hirawigi waragit’usharawigi hishge wangregi Hianjrawiga‐nagre warnigit’unekjanihawina.

¹⁵ Eshi wankshigra washinigishana hirawigi inke waragit’u‐sharawinigi Hianjrawiga hishge washa woishana hashiniwira inke wanigit’unanikjanihawina.

¹⁶ Egi jaja hantara‐ginajwigi, inke hishjara najgeteg winianje woishjankera jasgaire‐shunura wikisgawinianje, hishja‐warninera hijawakaragirena, hantaginaj‐nagra wankshigra hajairekjawige. Hisgexjina hinigawina woirowera kurusnankshana.

¹⁷ Eshi ne, jaja hantara‐ginajgi nassu hashinira sarakaragiaje, egi hishja hashinira kurushaje.

¹⁸ Ne hantaraginajra inke wankshigeja jantinikjena, eshi Hianjraga E nuxawanagra egi Hianjraga washa nuxawara hajarnagra, harusharani hirowe‐ningigikjanena.

¹⁹ Ma‐tegi inke washa jexira sto‐wahinianje, eja wikiri egi hoxeg maisinj‐wahirekjanena egi shige wamanukera gixux hokawairanaga egi wamanuinekjanena.

²⁰ Eshi wangregi washa jexira sto‐wakshuwiaje, eja inke wikiri shige hoxeg maisinj wahiranikjanena, egi eja wamanukera inke gixux hokawairanaga wamanuhiranikjanena.

²¹ Higu hajinja washa jexi washinira nankhi, hishge najge hashiniwira eja harnihairekjanena.

²² Rora hatasha harnira hishjasura herena, esge hishjasu hashinira phingishi, ro‐hashinira harnaj hohambra hoixjinkjanena.

²³ Eshi hishjasu hashinira shishigkishi, ro‐hashinira harnaj hokawasra hoixjinkjanena. Esge hohamb hornishu harajega hokawasgi hokawas she‐e hokawasra washa hekjikjegishi.

²⁴ Warera hisha inke hirukanara nup wagire ruxurugninana, hisha hoshig’anaga egi hijanejega wogixetenana, egi shige hisha hakishuxji’uanaga egi hijanejega t’unarnana. Inke Maura egi shige’mamonra wawagire shuruxurugwinina.

²⁵ Esge hinigawina, wankshig‐hoi hashiniwira inke najge wokarajiwinina jagu raijanihawigi, egi shige jagu sharajgankjanihawigi, egi shige ro washiniwira jagu hoshawaxuikjanihawigi. Jasge inke wankshig‐hoira e hiraijeranaga, warujra worujisnishe, egi rora e hiraijeranaga wainira e warujisnishe?

²⁶ Woruxujwire, wanig wangregi herera, inke maxhoshuninankshana, egi inke max‐hikishere‐ninankshana, egi shige inke waisgabhojhieja hosto‐hininankshana, shesgarnunige Hianjrawiga wangreginagre waruj wogajena. Jasge inke ne hiraijaira niphiwinishe?

²⁷ Egi hajanga najge wornijiwishge hoserejra si‐hisha hijominagkhi ruxurugnashe?

²⁸ Egi jagu‐u wainieja najge‐wornijiwishe? Woruxujwire, Lili maxeja‐nagra hogura jasganagra e inke waraninankshana egi shige inke waini‐kik’uninankshana,

²⁹ Hisgexji hornigitagwina Salomonga glori harnira harnaj, wikikaxgishge inke de‐e hisha hikisgarninana.

³⁰ Maura xawi maxreginagre waini shesge wagiunjegi, e hamb de‐e shesgarnaganaga, egi hainigi jhitakajhi rogeja wot’unairanana, inke de‐shesge hiraijera waini ningiuwininashe? Jowexjinig harnaxgu hashanagre.

³¹ Esge inke najge wojiwianaga wawinianje, jagu hirujanihawishe shige jagu hirajgankjanihawishe, egi shige jagu hinkikaix‐janihawishe.

³² Higu washa de‐e hirarujeja herera harnaj warogunankshana, egi Hianjrawiga hiperesnankshana washa de‐e wawishunkjanihawira.

³³ Eshi jorni Maura hungma‐harnira ruxurug‐naixjiwine egi washa de‐e harnaj hijornigishu‐kjanihawina.

³⁴ Esge inke najge wojiwinianje hainigi jasgekjanegi, hainigishi washara kikunkjanena. Hamb‐hishanga wak’ina hina hiuanjena.