Matthaiga 4 - Winnebego Bible Portions 1907

¹ Egi shejananegi Jesus naxiragra mojainainja howaniarairena waxopinishishigra higishja‐hirekjege.

² Egi jaja hambra kerepanajobaha egi hahera kerepanajobaha hantaginajgi hageja dokewehina.

³ Egi jaja wawiunjara hirajigi wena: Maura hinigra neninegishi, ininagre wawigege waisgabduj hirekjena.

⁴ Eshi horniharna egi wena: Wagaxankshana, wankshigjane inke waisgabduj‐rashana wankshig‐hi‐inijena, eshi hoitera jarnaga Maura iarnieja howaji‐akishi.

⁵ Egi waxopinishishigjega rusanaga jhinag wakanjangeja harnihina, egi wohokhuhojhixete‐hissawaija kerena.

⁶ Egi wagena: Maura hinigra neninegishi dampkarare, wagaxankshana waxopiniwarajire warnira u‐washianaga haji horniuinarnaga, hiranikarairekjena, egi nabra wikuinarnaga nirua uinekjena, inke si hashinira inieja hirokijianaga washanigishganikjena.

⁷ Egi Jesus wagena: Shige wagaxankshana, inke Hirukana Mau’hashinira gishjarnine.

⁸ Egi shige waxopinishishigjega xexete hankshi hihageja harnihina, egi manegi hung‐mara harnaj hajagigina egi gloria hoshurnakhi.

⁹ Egi wagena: Washa de‐e harnaj hornikunkjena, manegi rajimp‐harnaga egi hinagikarajgi.

¹⁰ Egi Jesus wagena: Hijahi howeune Satanra, wagaxankshana Hirukana Mau hashinira gikarajre, egi eshana ragikaraijanihena.

¹¹ Egi waxopinishishigra t’unakerena, egi horuxujre waxopiniwarajire hirajiranaga egi wagirairena.

¹² Egi jaja Jesus naxgungi Johnga jhi‐hornassairegi, Galilea‐eja howarena.

¹³ Egi Nasarethra t’unena, Kapernaum‐eja hahi‐jhina, e deja hijejeja‐nankshana, Sabulon egi Naphtalim moagax hojakenainja herena.

¹⁴ Exji herekjege Esaias prophetra e wagarnihera, wena:

¹⁵ Sabulon mainja egi Naphtalim mainja, deja hijejeja, Jordan ageja, hirarujeja herera Galilea harnineja,

¹⁶ Wankshig de‐e hokawasrogeja minagnagra hohamb xete hajairena, egi jarnaga ma‐sheja egi hot’e hoirahasieja minagnankhi hohamb jinaghirena.

¹⁷ Epa Jesus wahokhunjirena egi wena: Najgerakarategwire hung‐ma wangregi herera hiwusunsh jina.

¹⁸ Egi Jesus Galilea deja hijejeja manianku, Kikhinubra nupiwi hajarna, Simon hahi Peter higairera egi khinubra Andreas, hoigixera dejainja wot’unanankshana, hoikishere waunanke.

¹⁹ Egi wawagena: Hiroinagwire, egi wankshig hikishere niunkjanihawina.

²⁰ Egi higuana hoigixe warninera wakarat’urairena egi hironaghirena.

²¹ Egi eja regi kikhinub hijanera nupiwi hajarna, Jakob egi khinubra Johnga, Sebedai hinigwahira. Hianjhirera Sebedai wajeja hakarakishu unankshana, hoigixe warninera waphinkunankshana, egi wagigorna.

²² Egi higuana wajra egi hianjhirera wat’unairena egi hironaghirena.

²³ Egi Jesus Galilea mara harnaj howena wohokhuhojhi warnineja washa wagigus, egi hung‐ma woragphira wihokhunjena, egi howashara harnaj egi ro‐tegra harnaj rushja‐wahina wankshignanka horogeja.

²⁴ Egi Siria mara harnaj hornaxguinena egi jarnaga howashara harnaj wagarni hahirena howasha hokirajra egi hotegjura, egi jarnaga waxopinishishig harninankhi, egi jarnaga wanaxi howankhi egi ro‐tegra egi harnaj rushjawahina.

²⁵ Egi Galilea eja howaji wankshigra worohaxji hironagshana, egi jhinag kerepanashainja howaji egi Jerusalem‐eja howaji egi Judea eja howaji egi Jordan ageja howaji.