Matthaiga 27 - Winnebego Bible Portions 1907

¹ Jaja haini hakirigi nabhoruxaj hirukana hungra egi wankshigra xete warninera harnaj Jesus haehirena, d’ehirekjege.

² Egi rusgij‐hiranaga nigeharni‐howarairena, egi mowagax hirukanara Pontio Pilato eja rushjarehirena.

³ Egi Judas, e himanagra, jaja Jesus d’ehirekjanera hajagi, najgerakarategshana, egi shura‐sgara kerepanadanianka nabhoruxaj hirukana hungnanka egi xetenanka wagarnijina.

⁴ Wena: Inke phini hagaja, wai‐phisha himantagra. Egi wairena: Jagu niauwishe? Hajash’unajegaja.

⁵ Egi shura‐sgananka wohokhuho‐jhixeteja wot’unena, egi nigeowakaranaga egi rarnaga egi doxorushga kikuna.

⁶ Egi nabhoruxaj hirukana hungnanka shura‐sgara warus‐hirena egi wairena: Shura de‐e Maura shura‐hogishuwieja hoshura woehieja roxirena, wai hiruwinege esge.

⁷ Egi karagus‐hirena, egi rexoro‐rexunga max‐harnira shura she‐e higiruwinena, hijahi herera eja waxairekjege.

⁸ Esge max she‐e wai‐maxra higairena hamb de‐e hipa.

⁹ Egi Jeremias prophetra jagu arnihera exji herena, wena: Egi shurasga kerepana‐danianka rus‐hirena, hoikisgera E hikisgehirera, e Israel ninkjangeja ruwinera.

¹⁰ Egi rexoro‐rexunga max harnira higiruwinena, Hirukanara shesge ningigina.

¹¹ Egi Jesus mowagax hirukana joweja nashina. Egi mowagax hirukanajega wigiwaxshana wena: Judra hung harninera nenineshe? Egi Jesus wagena: Hisharajane shesgajena.

¹² Egi jaja nabhoruxaj hirukana hungra egi xetera washinaraj hiregi inke wagixabnina.

¹³ Egi Pilatus wagena: Inke nanaxguni‐rajeshe washara jarnaga hiranirajnagre?

¹⁴ Egi inke hoit’eisha rareshge gixabnina, hirukanajega reshge khorera rokana hina.

¹⁵ Woruj‐eja hirukanajega waushununa hornassairera hisha wankshignanka wagirushja rehinana, hajanjega giphinega.

¹⁶ Egi shejananegi hijaira wowonk hornassaireisha hijarnakshana, Barabbas higairena.

¹⁷ Esge jaja stoiregi, Pilatus wawagena: Hajanjega ningitushja‐rehawigi raiphiwinashe? Barabbas nigeshge Jesus, E Kristus higairera.

¹⁸ Hiperesjena khiwassainege esge rushjarehirera.

¹⁹ Egi jaja Pilatus (waehi) waminageja minagkhi, hijawina woraghisha hirajihina, wena: Wang phi she‐e inke washara hisha giunianje, washara rohaxji hirawajena hamb de‐e E hiahantera.

²⁰ Eshi nabhoruxaj hirukana hungra egi xetera worohanka waraxurughirena Barabbas e tairanaga egi Jesus d’ehirekjege.

²¹ Mowagax hirukanara horniharna egi wawagena: Nup hajawine hajanjega e ningitushja rehawigi raiphiwinashe? Wairena: Barabbas.

²² Pilatus wawagena: Jesus jasge hagigikjaneshe E Kristus higairera? Harnaj wagairena: Naramiheja haisaraj‐wagigire.

²³ Egi mowagax hirukanajega wena: Jagu‐u, jagu wowong hisha ushe? Eshi hiraijera uwainena, wairena: Naramiheja haisarajwagigire.

²⁴ Egi jaja Pilatus inke washa raxurugnira hajagi, eshi hiraijera mashja airege, ni russana egi nabra kurusharna worohanka jowehireja, wena: Wang phi de‐e wai harnieja inke ne hiaishananina, hajash’u‐harajawingaja.

²⁵ Egi wankshigra harnaj hornihairena egi wairena: Wai earnira wangashu‐hirawina egi ninkjang hiwarniwina.

²⁶ Egi shejanagi Barabbas wawagi‐rushjarehina. Egi jaja Jesus washa pahi higipsinsh rushjanegi, wagirushjarehina naramiheja haisaraj‐hirekjege.

²⁷ Egi mowagax hirukanara manape warnira Jesus rushiranaga jhihoxorojikeja harniokawairena, egi manape hornihera harnaj eja stoirena.

²⁸ Egi wainira wagirushoroj‐hirena egi waini shuj hisha hogiwaxug‐hirena.

²⁹ Egi jaja na‐pahi hirakhiweja hung wokanag hisha urushjainegi, nassu hihageja hagikanag‐hirena, egi raxgeisha nabhoishoroija harnigigirena. Egi jowehieja huporohiminaghirena, egi igixja wairena: Hinikaragina Judra hung harninera.

³⁰ Egi hashoirena egi raxgeaka rus‐hiranaga egi nassueja hojinena.

³¹ Egi igixjara rashjainegi hageja wonashira girushorojhirena egi waini ewarnira wogiwaxug‐hiranaga egi nigeharnihowarairena naramiheja haisaraj‐hirekjege.

³² Egi harahairau wang Kirene‐eja hereisha hakijairena Simon higairera, e hiniharninarnaga naramihera gik’ingigirena.

³³ Egi jaja ma‐nige eja hahiregi Golgotha higairera, wankshig‐pa‐hushereg hominagra e wairena.

³⁴ Egi ninash hok’uinena pisda hirokishuire rajgankjege, egi jaja rajgagi inke rajganina.

³⁵ Egi naramiheja haisarajhiregi waini warnira khiruje wakhinena, hushereg gishox uinena rewahire: Prophetra jagu airanihera exji herekjege: Waini warnira khiruje wakhinena egi wonashi harnira hushereg gishox‐u rehirena.

³⁶ Egi minag‐hiranaga hirakaranakshana.

³⁷ Egi nassuhi wangeja hiraraj‐hirera wagaxankshana: De‐e Jesus herena Judra hung harninera.

³⁸ Egi wamanukera nupiwi hakishu naramiheja haisaraj‐hirena, hisha hoishorohieja nankshana egi hijanera hoirajgehieja nankshana.

³⁹ Egi jarnaga ehahiowega washingagarnankshana, para hirunanahirena.

⁴⁰ Egi wairena: Wohokhu‐hojhixetera maisinsh‐ranaga egi hambra danihangi shige sh’u‐shurushjanashe hishera, niamb‐khine, Maura Hinigra neninegi, naramiheja d’ambre.

⁴¹ Egi hishge nabhoruxaj hirukana hungra igixjarnankshana, wowagaxhiperesra wakishu egi xetera, wairena:

⁴² Hijanera niamb wahijegaja, exji inke niambkhiruxurugnina. Israelra E hung harninegi, naramiheja d’ambgigiwire, egi harnaxgunkjawina.

⁴³ Maura hinashina, shegunegi girushjane‐higigiwire, gijire rogunankhi. Wena: Maura Hinigra newinena.

⁴⁴ Wamanukenanka hishge, e naramiheja wakishu haisarajhirera washingagar‐nankshana.

⁴⁵ Egi howagix hirakewe‐hainja hokawas‐shana managre harnaj, howagix hishanki‐jushgunieja hipa.

⁴⁶ Egi howagix hishanki‐jushguni‐hainja Jesus mashja uwana, wena: Eloi, Eloi, Lamma Sabaxthani! Deshesge ewairena: Mau‐harnixji, Mau‐harnixji, jagu‐u hinat’ushereshe?

⁴⁷ Hota hijarnashinankhi, jaja she‐e naxguinegi wairena: Wang de‐e Elias gigornankshana.

⁴⁸ Egi higuana hisha nuwang‐anaga egi sponsh hisha rusanaga egi ninashra hoixji hoshurna, egi raxgeja hakanag‐anaga egi rajgangigina.

⁴⁹ Hijanenanka wairena: Shegunag‐hiwire, horuxuijhawina Elias jianaga niamb‐hikjanegi.

⁵⁰ Jesus, jaja shige mashja uwanaga rashjangi, d’ena.

⁵¹ Egi horuxujre, wohokhu‐hojhixeteja hagijara nupihi hogasrerana, wangeja hugi mainja hipa. Egi mara hixgana egi inixetera gshabrairena.

⁵² Egi wanaxi homigra gihas‐hirena, egi wakanjangra rowarninera rohaxji nanankhi kikawa‐ahirena.

⁵³ Egi wanaxi homingeja hihinab‐hirena hakiha‐wankshigianaga hageja egi jhinag wakanjankeja hoikewena, egi roha jantingikhina.

⁵⁴ Egi jaja manape hungjega egi wakishu‐unjegi Jesus hirakara, mara hixgangi hajairena egi washa jagushana uinegi, naxirera rokana hirena, wairena: Hisgexji de‐e Maura Hinigra heregaja.

⁵⁵ Egi hinugra roha hija‐uankshana hari woruxuj‐nankshana, e Galilea‐eja Jesus hakishu hironag howajiregi, wagirananke.

⁵⁶ Hisha Maria Magdalena herena, egi Jakob egi Joses hiunihirera Maria, egi Sebedai ninkjang warnira hiunihirera.

⁵⁷ Egi jaja hoxjarna hakirigi, wang hitajeisha jina Arimathea eja hereisha Joseph higairera, e hishge Jesus hironag warnira hisha herena.

⁵⁸ E Pilatus eja hina egi Jesus ro harnira tarna. Egi Pilatus rora hok’u wash’ina.

⁵⁹ Egi jaja Joseph rora rusgi, linen waipere sgexji hirowejana.

⁶⁰ Egi warnaxi‐homig jeg earnieja hot’umbshana, e k’era inieja egi warnaxi‐hoshuaka jhirobra ini xeteisha eja hawanana, egi nigeowakerena.

⁶¹ Egi Maria Magdalena eja jena egi Maria hijanera warnaxihoshuaka joweja minagnankshana.

⁶² Egi hoikoroho‐hambra hereanaga haininegi nab‐horuxaj hirukana hungra egi Pharisera Pilatus stoirena,

⁶³ Wairena: Hirukanara, hiapereswina waishjanke she‐e niambjanegi wena: Hambra danihangi shige hakikawa‐ankjanena.

⁶⁴ Esge warnaxihoshura hamb‐hidanihainja hipa hirakara washire, nigete wironag warnira haheregi hahiranaga manu hirege, egi wankshigra wawagairekjanena: D’arnagra eja niamb howakirina, egi woishjanke hirowagnira hiraijera shishiggikjanena jegeja herera hiroheg‐hirena.

⁶⁵ Pilatus wawagena: Wirakara shuruis‐jawina, rawianaga egi jasge hishuruxurugwigi hirakarawire.

⁶⁶ Egi harairena, egi warnaxihoshura hirakarawagigirena, egi inira haixiri hirena, egi wirakarara hijawakererena.