Matthaiga 26 - Winnebego Bible Portions 1907

¹ Egi herena jaja Jesus harnaj horag rashjangi hironag warnira wawagena:

² Hirapereswina nupahangi Pasxa worujra herekjanera, egi Wankshig‐hinigra himarag‐hirekjanena naramiheja haisarajhirekjege.

³ Egi nab‐horuxaj hirukana hungra egi wowagax‐hiperesra egi wankshigra xete warninera nab‐horuxaj hirukana hungra Kaiaphas higairera jhixete‐hojhieja stoirena.

⁴ Egi karagus‐hirena kerej‐hiranaga Jesus rus‐hiranaga egi d’ehirekjege.

⁵ Eshi wairena: Inke hamb‐warujeja herenikjena, inke wankshigra hiwarupurunikjawige.

⁶ Egi jaja Jesus Bethania‐eja jigi, Simon leper‐unga hojhieja hokewena.

⁷ Eja hinugisha hirajina alabaster kog‐hisha wikinipanaphi hoshu harnijina egi nassueja hawaxuna, warujnank’u.

⁸ Egi jaja wironag warnira hajairegi inke giphini‐hirena, wairena: Jagua‐wau washa de‐e hoinige xawarnihishe?

⁹ De‐e roha hiruwianaga egi wanajojaisgeja woga phingaja.

¹⁰ Jaja Jesus hiperesgi, wawagena: Jagu‐u hinugnagre najgewojirawishe? Wore phi hingiu waunakaja.

¹¹ Wanajojaisgera hoishib warakishu sh’unkjanihawina, eshi ne inke hoishib hinakishu sh’unikjanihawina.

¹² Wikini de‐e ro‐harninegi hingiwaxune, hoxaire harnina wagiu wauna.

¹³ Hisgexjina hinigawina higu‐hajinja managre eja woragphi de‐e wihokhuinegi, hinug de‐e jagu une hishge horag‐hirekjanena wewirarnihekjege.

¹⁴ Egi nup‐hashanananka hisha Judas Iskariot higairera, nab‐horuxaj hirukana hungra wirahina,

¹⁵ Egi wawagena: Jagu hunak’uwinashe, himanigitagwigi? Egi shurasgara kerapana‐dani hok’uinekje higairena.

¹⁶ Egi epa himanag houphi hornirena.

¹⁷ Egi waisgab winawohi rokani worujra hamb jornira heregaja wironagra Jesus hirajirena, wagairena: Hajinja Pasxa worujra hirushja ningigikjanihawishe?

¹⁸ Egi wena: Jhinageja wang‐hishajera eowarawire egi wagawiaje, Hirukanara wena, howagix harnira hiwusunsh jina, horajhieja Pasxa worujra haunkjena wironag warnira wakarakishu.

¹⁹ Egi wironagnanka uinena, jasge Jesus hiwashira egi Pasxa worujra hirushjahirena.

²⁰ Egi jaja hoxjarna hakirigi, nuphashanara wakishu minagshana.

²¹ Egi warujnank’u wena: Hisgexjina hinigawina, hisha himaisharaikjanihawina.

²² Egi najgerategra rokanainena, egi jarnaga harnagwiga wage‐hajiarairena: Hirukanara newineshe?

²³ Egi horniharna egi wena: Hisha wasgeja hiroshu hakishu haungi e‐himairaikjanena.

²⁴ Wankshig‐hinigra wowagaxeja jasge wagaxhirera eowakshana eshi hawekjanena wang‐jagura hisha Wankshig‐hinigra himanakhi, wang she‐e phi howarnana inkaga wankshig‐iningishi.

²⁵ Egi Judas, e himanaikjanera horniharna egi wena: Hirukanara inkeshi newinenishe? Wagena: Hishare shesgena.

²⁶ Egi warujnank’u Jesus waisgabduj russana egi wainabshana egi rujhena egi wironagnanka wawogarna egi wena: Ruswianaga egi rujwire, de‐e ro‐harnira herena.

²⁷ Egi niwirajgara russana egi winab‐anaga egi wawogarna, wena: Harnaj rajgawine.

²⁸ De‐e wai‐harnira herena Testament jeg hauna. E roha xu‐wagigirena, washa woishana wagit’une.

²⁹ Eshi hinigawina, epa inke habsinsh‐hueja hasni dajganikjanena, hambeja epa jeg harnikishu dajgankjanihawina Jajiga hungma harnieja.

³⁰ Egi jaja nawa rashjainegi, Oliw‐xeja howarairena.

³¹ Egi Jesus wawagena: Hahe de‐e harnaj watoiragixikjanihawina deshesge wagaxankshana: Jhasga hirakarara wajinkjanena egi jhasga hornihera mokhiekjanena.

³² Eshi hakikawa‐anaga hageja Galilea mowagaxeja jornigini hagikjanihawina.

³³ Peter horniharna egi wagena: Harnaj watornigixi hireshge inkaga watoaxinikjanena.

³⁴ Jesus wagena: Hisgexjina hinigena, hahe de‐e kheni bagawaxge wangra xagni daniha khiba‐hinakhinkjanena.

³⁵ Peter wagena: Harnikishu jekjanegishge inke khibanikinikjanena. Hishge wironag hijanenanka harnaj shesge airena.

³⁶ Egi max‐hisha Gethsemane higairegi eja Jesus wironagra wakishu hina egi wawagena: Eegi minagwire, gojaira hagikaraj tekjanaregi.

³⁷ Egi Peter egi Sebedai hinigwahira nupiwi wakishurena, egi najgerategra rokanajirena egi warnaira mashja hirawasunsh‐shana.

³⁸ Egi wawagena: Naxirag harnira najgetegra rokanana jowe d’ewinana, eegi hiwushawire, egi hikhi hinkishu uwine.

³⁹ Egi jowexjinig hiraijera howarena, egi hishjara mainja herehi himpshana egi gikarajra wena: Jaji, ruxurugphingi, niwirajga de‐e hinxagjena egi inke woshga harnira herenina eshi hashinira herena.

⁴⁰ Egi wironagra wirakirigaja egi nanank’u wiena, egi Peter wagena: Jasgegaja inke howagix‐hisha hikhi hinakishu sh’uwinishe?

⁴¹ Hikhiwine egi gikarajwire inke washa woishana uwahieja horakit’u‐sharanikjawina. Naxiragra hisgexji giphinangnunige eshi rora inke mashjanina.

⁴² Egi shige hinupahana rena egi gikarajgi wena: Jaji, niwirajga de‐e inke hinxa‐ruxurugnigi, jasgegi dajgangishana herenagi, woshga hashinira haunana.

⁴³ Egi kirigaja shige nanank’u wiena, hishjasu warninera shjuwara hoixjinanke.

⁴⁴ Egi wat’unarena egi shige nigiowarena egi hitanihara gikarajshana, shige hoit’era e waena.

⁴⁵ Egi wironag warnira wirakirina egi wawagena: Nawinane, egi xgasigiwire. Horuxujwire howagixra hiwusunsh jiginina egi Wankshig‐hinigra washa woishana ura nab warnineja horushjarehirekjanena.

⁴⁶ Nashiwine, hinekjawina, horuxujwire hiwusunshjiginina himainaikjanera.

⁴⁷ Egi hit’at’ajau, horuxujre, Judas jina nup‐hashanara hisha herera egi hornihexetexji hakishu jina, wigijgux egi wiwapox harni, nabhoruxaj hirukana hungra egi wankshigra xete warninera e huwagigire.

⁴⁸ Egi hisha himanaikjanera wijanti wagiungi wena: Hisha i‐wakhiwankjanera erena, shja harukoswiaje.

⁴⁹ Egi higuana Jesus hirajina egi wena: Hirukanara hinikaragina, egi i‐okhiwankshana.

⁵⁰ Egi Jesus wagena: Hijakoronira, jagu‐u wash’unajishe? Egi hajirena egi Jesus harukos‐hiranaga egi rushirena.

⁵¹ Egi horuxujre, Jesus wakishu unjega hisha, ara wajigrehianaga egi wigijguxra kurusanaga egi nabhoruxaj hirukanara warnihi warnira hisha hojina egi najawara hisha gixguna.

⁵² Egi Jesus wagena: Wigijgux hashinira hotumbeja shige hotumbre, jarnaga wigijgux rusgi wigijgux hit’airekjanege.

⁵³ Inke shegunegi Jajiga khijire hashi duxurugniguni hirareshe? Egi higuana waxopiniwarajirera Legionra nup‐hashana hiraijera jingiginana.

⁵⁴ Eshi wowagaxra jasgehianaga exji herekjaneshe, jasgegi herekjanena.

⁵⁵ Howagixeja Jesus worohanka wawagena: Wamanuke hiraji hinagish’uwishe, wigijgux egi wiwapox hashini rajiwi hishgurajiwigi? Hambga harnikishu mianag hajena wohokhuhojhixeteja washa ningiguswi egi inkaga hinshurukoswinina.

⁵⁶ Eshi washa de‐e harnaj uinare, prophetra wowagax warninera exji herekjege. Egi shejananegi wironagra harnaj t’unairena egi gias‐hirena.

⁵⁷ Egi Jesus harukos‐hirera nabhoruxaj hirukana hungra Kaiaphas eja harniahirena, hajinja wowagax‐hiperesra egi xetera hostonankhi eja.

⁵⁸ Eshi Peter hari hironagshana, nabhoruxaj hirukana hungra jhixete harnineja hina, egi hijokewena, egi warera wakishu minagshana, jasge hinankhi hajakjege.

⁵⁹ Egi nabhoruxaj hirukana hungra egi xetera egi waehira harnaj Jesus wihohi woishjanke hirakira horninankshana d’ehirekjege.

⁶⁰ Eshi inke washa hieranina. Egi wihohi woishjankera roha jinunige inke washa hieranina. Hirowageja wihohi woishjankera nupiwi jina,

⁶¹ Egi wairena: De‐e wena, Maura wohokhuhojhi‐xete harnira maisinsh hatuxurugshana egi hambra danihangi shige hautushjanana.

⁶² Egi nabhoruxaj hirukana hungra nashina egi Jesus wagena: Inke waragi‐xabnishe, de‐e jagu hinigarnagre?

⁶³ Eshi Jesus inke xabnina. Egi nabhoruxaj hirukana hungjega horniharna egi wagena: Wihohire Mau niambra jowehieja, hungiragwire Kristus ninegi Maura Hinigra.

⁶⁴ Jesus wagena: Hishare shesgena. Egi wanigena, epa Wankshig‐hinigra hashjakjanihawina homashjara hoishorohieja minagnainkjanena, egi wangregi maxiwieja jikjanena hashjakjanihawina.

⁶⁵ Esge nabhoruxaj hirukana hungjega wainira kurugas‐shana, wena: Maura raxjashgunina, jagu‐u hijaira wihohi hiunkjawishe? Horuxujwire, Maura raxjashgunira hinaxguwingaja.

⁶⁶ Jagu hirarawishe? Hornihairena egi wairena: D’ehire phingaja.

⁶⁷ Egi hishjara hoshoirena, egi nab‐ruporog hirojinena egi hijanenanka nab‐ruparas hirojinena.

⁶⁸ Wairena: Prophet‐wiwine Kristus neninegi peshe waushe hornijinga?

⁶⁹ Egi Peter jhixete hakohieja minaganankshana, egi hinugisha hirahina wena: Hishge ne‐hisha ninena Jesus Galilea‐eja herera hakishu uinera.

⁷⁰ Eshi jowehireja khibakhina, wena: Inke hiaperesnina jagu hishegi.

⁷¹ Egi jaja jang‐jhioxoro‐jhikeja higi, hinug hijaneisha hajagi egi hijarnankhi wawagena: Wang de‐e hishge Jesus Nasareth‐eja herera hakishu una.

⁷² Egi shige khibakhina wihohi, inke hiaperesnina wang she‐e.

⁷³ Egi hagregi hijanashinankhi hirajirena egi Peter wagairena: Hisgexjingaja hishge ne hisha ninena hoit’e hashinira wijantina.

⁷⁴ Egi washoshishig howe rokigujirena egi wihohina wena: Wang she‐e inke hiaperesnina, egi higuana bagawaxge wangra xagshana.

⁷⁵ Egi Peter Jesus hoit’e harnira wewina, E wagena: Kheni bagawaxge wangra xagni, daniha khibaina‐khinkjanena. Egi hihinabanaga egi xagra rokanawena.