Matthaiga 25 - Winnebego Bible Portions 1907

¹ Egi shejanagi hungma wangregi herera hinugwajegra kerepanaisha hikisgekjanena, e hiratasha‐kerehira wakurus‐hiranaga egi hinug‐kanaikjanega hirakjambharairena.

² Egi saja wanaiksabwina egi saja wanaiwowonkhirena.

³ Wanaiwowonk‐nanka hiratashakerehi warninera wakurus‐hiranaga egi inke wikini harniarairanina.

⁴ Eshi wanaiksab‐nanka wikini rus‐hiranaga woshura wawokshuirena egi hiratasha‐kerehi warninera hirassa.

⁵ Egi hinug‐kanaikjanega si‐nihege harnaj shjuwainena egi nainena.

⁶ Egi hahekissagkaja, uwaine naxguinena, horuxujwire hinugkanaikjanera huhena, hikipa howarawire.

⁷ Egi hinugwajegnanka harnaj nashinena, egi hiratasha‐kerehi warninera tae‐wakaragirena.

⁸ Egi wanaiwowonknanka wanaiksabnanka wawagairena: Wikini hashiniwira hunkuwine, hiratasha‐kerehi warniwira gisebhirena.

⁹ Eshi wanaiksabnanka hornihairena, wairena: Inke shesgarnina, inke hinuinke wanginani‐kjanihawina. Eshi woruwieja howarawianaga egi hisge khiruwiwine.

¹⁰ Egi waruwi harairegaja hinug‐kanaikjanega jina, egi jarnaga hikorohornankhi kikanag‐houeja wakishu hokewena, egi jhirobra hornassairena.

¹¹ Hageja hinugwajeg hijanenanka hishge hajirena, wairena: Hirukanara, Hirukanara hingiruhaswire.

¹² Eshi horniharna egi wena: Hisgexjina hinigawina, inke hiniperes‐winina.

¹³ Esge hirakara‐uwine, hamb hajinja egi howagix hajinja Wankshig‐hinigra jikjanegi inke hiraperes‐winina.

¹⁴ Egi hungma wangregi herera wang‐hisha ma‐harixji hikiwarare hikisgena, e ware warnira wakaragigo‐arnaga egi washa warnira harniu‐wagigina.

¹⁵ Egi hisha Talentra saja hokuna, hijanera nupiwi hokuna egi hijanera hishankira hokuna, jasgeshana hokiphinegi wagiuna, egi higuana hikiwararena.

¹⁶ Egi hisha Talentra saja rusga rarnaga wirehiuna egi Talent hijanera saja wiruxurugshana.

¹⁷ Egi hishge hijane nup rusjega hishge hijanera nupi wiruxurugshana.

¹⁸ Eshi hisha hishankira rusra rarnaga egi mara k’arnaga egi hirukana harnira shura harnira eja nuxawakanakshana.

¹⁹ Hageja sixjingaja warananka hirukana harninera kirina, egi wawigikarabshana.

²⁰ Egi hisha Talentra saja rus‐nihera jina egi Talent hijanera saja harnijina, wena: Hirukanara Talentra saja harniragigira, horuxujre hawinjeja Talentra saja hiduxurugshana.

²¹ Hirukana harnira wagena: Phirana, ware phi egi wogisogranina, wataginigra phi hirarakarana washara roha hirukana ningigikjanena, hirukana hashinira wogishowa harnieja horakewekjena.

²² Egi Talentra nupiwi rus‐nihera hishge jina egi wena: Hirukanara, Talentra nupiwi harniuinagigira, horuxujre hawinjeja Talentra nupiwi hiduxurugshana.

²³ Hirukana harnira wagena: Phirana, ware phi egi wogisogranina, wataginigra phi hirarakarana, washara roha hirukana ningigikjanena, hirukana hashinira wogishowa harnieja horakewekjena.

²⁴ Egi hisha Talentra hishankira rus‐nihera jina egi wena: Hirukanara hiniperes‐shana wang shja‐ranira maxhirakisherena inke ne horashunira egi stowarana inke ne horaieninunige.

²⁵ Egi nanikewege, tarnaga egi Talent hashinira marogeja nuxawa‐hakanakshana, horuxujre hakaranine hashinira heregaja.

²⁶ Hirukana harnira horniharna egi wagena: Ware wowonk egi worushake ranina, hiraperesgaja max‐hiakisheregi hajinja inke washurnigi egi stohagi hajinja inke waienigi.

²⁷ Shura hojhieja shura harnira hogishu phianigaja, egi hakirigi shura harnira hakurusanaga egi hiroshura hirassa.

²⁸ Esge Talentra giruswire egi hisha Talentra kerepanaisha harnira hokuwine.

²⁹ Egi higu peshe junjegi hokuinekjanena, egi juxjinkjege, eshi hisha jushgunijegi, girus‐hirekjanena jagu harnijegi.

³⁰ Egi ware inke washa hikisgarnira hokawasrogeja hornit’urairekjanihawina eja raxag‐wianaga egi hi‐rusgesgexji haranishekjanihawina.

³¹ Jaja Wankshig‐hinigra gloria harnieja jigi egi waxopiniwarajira harnaj wakishu, shejanagi glori hungwaminag harnieja minaikjanena.

³² Egi jowehieja wankshig hokirajra harnaj stowagigirekjanena egi khiruje wahikjanena, jhasga hirakarara jhasga warnira egi jharnaxra khiruje‐wahireshununa shesge.

³³ Egi jhasgara hoishorohieja wakerekjanena, eshi jharnaxra hoirajge‐hieja wakerekjanena.

³⁴ Egi Hungnaka hoishoroijananka wawagekjanena, guwire neninewina, Jajiga wogishawa wahira, managre jinagreja hungmara hirushja‐ningigirawira hashiniwina.

³⁵ Doikewehira egi waruj hunakuwige, iwusra egi rajga hunakuwige, hijahi harnira egi hokewe hinagigiwige,

³⁶ Nanoka harnira, egi waini hunagi‐shawaxuke, hopashara egi homaira‐kiniwige, jhi‐hornaisairera egi hirairajiwige.

³⁷ Egi phira hornihairekjanena egi wairekjanena, Hirukanara, jajanane donikewe‐hirajau harnijawishe egi waruj hornikuwishe? Egi iniwusgi egi rajga hornikuwishe?

³⁸ Jajanane hijahi hererani harnijawishe egi hokewe‐nigigiwishe? Egi shige nanoka ranigi egi waini ningiuwishe?

³⁹ Shige jajanane howasha harnijawianaga egi jhi‐hornassaire harnijawishe egi hiranihiwishe?

⁴⁰ Egi Hungra hornihakjanena egi wawagekjanena: Hisgexjina hinigawina, xunuxjinig warnira hisha jagu ragish’uwingi ne wairagish’uwina.

⁴¹ Egi hishge hoirajgejananka wawagekjanena, hijahi howeuwine hoshishigowe hire raniwina, manegus pejeja nihawire, e waxopinishishigra egi waxopiniwarajire warninera hirushjawagigirera eja:

⁴² Doikewehira egi inke waruj hunakuwinige, iwusra, egi inke rajga hunak’uwinige.

⁴³ Hijahi here harnira egi inke hokewe‐hinagigiwinige, nanoka harnira egi inke waini hunagi‐shawaxugnige, hopashara egi jhi‐hornaisairera egi inke homaira‐kiniwinige.

⁴⁴ Egi hishge hornigi‐hairekjanena, wairekjanena: Hirukanara, jajanane dokewehi egi iwus egi hijahi here ranigi egi nanoka ranigi egi hoshawashagi egi jhi‐hornanissaire harnijawigi egi inke harnini‐hauwishe?

⁴⁵ Egi wawornigihakjanena, wekjanena: Hisgexjina hinigawina, xununig warnira hisha inke washa ragish’uwinigi, hishge inke washa hinagish’uwinina.

⁴⁶ Egi she‐e manegus haweja howarairekjanena eshi phira wankshig‐hoi hisgejaija hokawairekjanena.