Matthaiga 23 - Winnebego Bible Portions 1907

¹ Egi Jesus worohanka egi hironag warnira wokit’ena,

² Wena: Wowagaxhiperesra egi Pharisera Mosesga waminag harnira haminaganankshana,

³ Esge higu jagu unishirawigi she‐e uwianje, eshi wore warninera inke wiraruxe uwinianje, airanaga egi inke uninankshana.

⁴ Wak’in sgingrexji hiuinarnaga egi k’ira wojexi hirena egi wankshigra k’in‐wagiginankshana, eshi exji nabwaisa warninera hinkisha hija hiuninankshana.

⁵ Eshi worera jranaga unagra wankshigra hajairekjawi wagiunankshana, Seniba wowagaxra paras wakaraginankshana egi waini warninera ugra hiraijera xete wawajenankshana.

⁶ Egi worujeja waminag‐hohankshi haminagra giphinankshana, egi wohokhu‐hojhieja waminag joweja here haminag giphinankshana.

⁷ Egi nagueja hikaragirera egi wankshigra Rabbi, Rabbi higairawira giphinankshana.

⁸ Egi inke Rabbi higaire khiwinianje, hisha Hirukana hashiniwira, Kristus herena egi harnaj rakhikhinub‐wina.

⁹ Egi managre‐egi hinkisha hianjhi gikaraj‐winianje, hisha hianjrawira E wangregi‐nankshana.

¹⁰ Egi inke shige hirukanara higaire khiwinianje, hisha hirukana hashiniwira, Kristus herena.

¹¹ Eshi hajanga nixetekjawigi horograwiregi ware hashinikjawina.

¹² Egi higu peshe hankshi khikeregi khushi kererekjanena, egi hisha khushi khikeregi hankshi kererekjanena.

¹³ Eshi harawekjanihawina wowagax‐hiperesra egi Pharisera, hipokrit raniwina. Wankshinagre hungma wangregi herera wornaragissawina, ne inke hijora‐kawawini‐anaga egi shige jarnaga hijokewe‐naiankhi inke waragish’uwinina.

¹⁴ Harawekjanihawina wowagax‐hiperesra egi Pharisera, hipokrit raniwina, hikhanagitera jhi wojhirera jebwaragigiwige egi gikaraj serej unakhiwinge, esge hawera hiraijera xete shuruiskjanihawina.

¹⁵ Harawekjanihawina wowagax‐hiperesra egi Pharisera, hipokrit raniwina, tejana washurujawianaga egi mara hosh’uwianaga proselitra hisha shunana‐shiwina egi jaja hisha shesga jijega, e nupaha hiraijera pejshishigra ninkjang harni wash’uwina ne hoshurujiswina.

¹⁶ Harawekjanihawina hishjarning wajogini raniwina, e wairena higu peshe wohokhu‐hojhixetera raxjashgunigi, inke washa ninana, eshi higu peshe wohokhu‐hojhixetera shurasi hiunaka raxjashgunegi washa woishana uwaunana.

¹⁷ Warnai worniwankwina egi hishjarning raniwira, hajanga hiraijera xetewishe, shurasira nigeshge wohokhuhojhixetera e shurasinaka wakanjankhirena.

¹⁸ Egi washawina higu peshe Altarra raxjashgunigi inke washa ninana, eshi higu peshe nab‐hiruxajra hijarnankhi raxjashgunigi, washa woishana uwaunana.

¹⁹ Warnai worniwankwina, egi hishjarning raniwira, hajanga hiraijera xetewishe, nab‐hiruxajra nigeshge Altarra, e nab‐hiruxajra wakanjankhirena.

²⁰ Esge higu peshe Altarra raxjashgunigi, Altar hiungi egi washara jarnaga hijakhi wagarnana.

²¹ Egi higu peshe wohokhu‐hojhixetera raxjashgunigi, wohokhuhojhixetera hiungi egi Hisha hija‐jhinakhi wagarnana.

²² Egi hisha wangregiagre raxjashgunigi, Maura hungwaminag harnira raxjashguni hiungi egi Hisha hijaminagnanka wagarnana.

²³ Harawekjanihawina wowagax‐hiperesra egi Pharisera hipokrit raniwira, mintra egi anisra egi kumminra hikerepanaishara woragawina, egi woehieja washa rokana hirera warat’ambwina de‐e hererena hophira egi najwojana egi harnaxgura, washa de‐e wawau phi‐raniwingaja egi washinjahinanka hirassa wauphiraniwingaja.

²⁴ Hishjarning wajogini raniwina, ne raxoj suwura washuwusebwina egi washa huxashogra warnanahiwina.

²⁵ Harawekjanihawina wowagax‐hiperesra egi Pharisera, hipokrit raniwira, niwirajga hihagra egi wasge hihagra sge‐warawina eshi rogra washa manuinera egi waruj‐inera hoixjinakshana.

²⁶ Pharise hishjaning ranira, jorni niwirajga rogra egi wasge rogra sge‐hire, egi hihagnanka hishge sge‐hiranana.

²⁷ Harawekjanihawina wowagax‐hiperesra egi Pharisera hipokrit raniwira, wanaxi‐hoshu sga‐hire hirakisgawina, e hihagra hajara phixji hirarnaga eshi rogra wankshig husheregra hoixjinankshana egi washa shishigra harnaj.

²⁸ Hishge shenisge harajena, wankshignanka phi hihagra harnija‐nangwina, eshi rogra hipokritra hornixjiwina egi wigishanara.

²⁹ Harawekjenena wowagax‐hiperesra egi Pharisera hipokrit raniwira, prophetra wanaxi homig waragish’uwina egi wangphira wanaxi‐homigeja ini waragikerewina waphi‐shuxjiwianaga,

³⁰ Egi washawinana: Hianjwahawira hamb warnineja harnihawigi inke prophetra wai warninera xu‐wahiregi wakishu hauwininana.

³¹ Esge ne horakikarag harajena prophetra d’ewahi hiranihera ninkjang warninera neninewira.

³² Hianjwarawiga wigus harninera hoixjihiwire.

³³ Wakha raniwira wakha hi‐pahi wankshighii raniwira, jasgerawianaga pej‐shishig haweja rakishib‐janihawishe?

³⁴ Esge horuxujwire, prophetra egi wang‐wanaiksabra egi wowagax‐hiperesra huwanigigi‐kjanihawina, egi hota d’ewarawianaga egi nanamiheja waraisaraijanihawina egi hota wohokhuhojhi washiniwieja washa pahi wawiraipsinsh‐janihawina egi jhinagra hirakhiware wawiraishana nanash’inkjanihawina.

³⁵ Esge ne harnirus‐janihawina jarnaga wai phira manegi xuhiregi, Abel phi wai harnira epa Baraxias hinigra Saxarias wai harnieja hipa, e wohokhu‐hojhixete egi Altar hojakenainja d’erawina.

³⁶ Hisgexjina hinigawina washa de‐e harnaj wankshighoi degi hirawairekjanena.

³⁷ Jerusalemra, Jerusalemra, prophetra d’ewarana, egi ini wawiraisagshana e jiwanigigirera, hoja jarnaha ninkjang washinira sto‐wanigigiguni, bagawaxge hinugra ninginig warnira ahukhuha wakshui‐reshunura shesge wagiginaira egi inke sh’uwinina.

³⁸ Horuxujwire, jhi‐washiniwira manra wornigigirawina.

³⁹ Hinigawina howarehikjanare inke hinshjarnikjanihawina, wogishawajena Hirukanara rash harnira hiunjina hishawigi epa.