Matthaiga 22 - Winnebego Bible Portions 1907

¹ Egi Jesus horniharna egi shige washa hisgera wirokit’ena egi wena:

² Hungma wangregi herera hung hisha ejanak hikisgena, e hinigra hinug‐khanag‐gigina.

³ Egi ware warnira rewagigina jarnaga kikanaggeja waruj washiregi wagigoirena, egi inke hajiranina.

⁴ Shige ware hijanera rewagigina wena: Wawogiragwiaje jiwashirera horuxujwire wirarojonje woruj harnira hirushjaharna, jewaruti warnira egi wanoijge shin warnira d’ewaharna, egi washara harnaj hirushjankshana, kikanagregi hajirekjena.

⁵ Eshi inke washa hiranairanina, egi nigeshana howarairena, hisha max‐earnieja, hijanera woruwi‐earnieja, howarena.

⁶ Egi hijanenanka ware warnira warus‐hiranaga egi wawikshakshahirena egi d’ewahirena.

⁷ Eshi jaja hunganaka warnaxgungi wogitegra rokanana, egi manape‐hornihe warnira rewagigina egi wankshig‐d’ehinanka maisinsh‐wahina, egi jhinag warninera taxu‐wahina.

⁸ Egi ware warnira wawagena: Kikanag worujra hirushjankshana, eshi jarnaga waruj‐washirera wowonghirege inke hijawouinanikjanena.

⁹ Esge nagu hoxetera wowarawire egi jarnaga hish’ewigishi kikanagregi howahu washiwiaje.

¹⁰ Egi warananka nagu‐hoxetera wowarairena, egi jarnaga hieregi stowahirena, shishigra egi phira, egi kikanag worujra wagiruj hoshuirena.

¹¹ Egi jaja hungananka hijokawarnaga wagirujnanka wajahigi, wangisha eja hajarna e inke kikanag‐woruj waini uninankshana.

¹² Egi wagena: Hijakoronina, jasgeragaja horakeweshe, egi inke kikanag‐woruj waini sh’unigaja? Egi inke xabnina.

¹³ Egi hungjega warananka wawagena: Nabra egi sira wagirusgijwige egi ruswige egi hokawas‐rogeja hot’unawire egi eja xag‐nihekjena egi hi‐rusgesgexji.

¹⁴ Roha gigoiranunige egi gijainera jarnagkhirana.

¹⁵ Egi Pharisera harairanaga egi haehirena jasge hounahiranaga hoit’e earnira hirarukos‐hiranangi.

¹⁶ Egi wironag warninera egi Herodes ware warninera wakishu hijoware‐wagigirena, wairena: Hirukanara, hinipereswina wogisog ranira, egi Maura nagu harnira wogisog waragigus rajera, egi inkisha washa hiranash’inina, egi jarnagagre inkisha hiranigi‐jeranina.

¹⁷ Esge hungiragwire jagu hiraregishi? Kaiser woirowera hokura phinashe, nigeshge inke shesgarnishe?

¹⁸ Eshi Jesus wawigiperes‐shana howowongra egi wena: Jagu‐u hish’ushjawishe, hipokrit raniwina?

¹⁹ Shura woirowera higiwahawire. Egi Denaria hisha hagarni hahirena.

²⁰ Egi wawagena: Hokiwagax de‐e peshe hereshe egi ihageja wagaxnanka?

²¹ Egi wagairena: Kaiser harnira herena. Egi wawagena: Esge hokuwine Kaiser, washa jagu Kaiser harnigi, egi hokuwine Maura washa jagu Maura harnigi.

²² Egi washa de‐e naxguinegi, khorairena, egi t’unenigehowakarairena.

²³ Hambeja Sadusera hirahirena, e inke hakiha wankshig‐hoi junishe airena, egi higiwaxhirena.

²⁴ Wairena: Hirukanara Mosesga wena, wangra hisha d’egi inke ninkjang harninigi, khinubra hijawina khanaikje egi khinubra ninkjang shu’giginana.

²⁵ Egi wang kikinubra shagowi hinkishu uwina, egi jowejajega jaja hinug‐kanagra d’ena, egi inke ninkjang junina, esge hijawina khinubra git’unarena.

²⁶ Hinubeja‐jega hishge shesge howena, egi hidanina, egi hishagowinka harnaj shesgairena.

²⁷ Egi hirowagjina hinugra hishge d’ena.

²⁸ Egi hakiha wankshig‐hoieja shagowihajega hajanga kanaikjanihawishe, harnaj hakishuiregaja.

²⁹ Jesus horniharna egi wawagena: Sharagashwina, wowagaxra inke hirapereswinige egi shige Maura homashja harnira inke hirapereswinige.

³⁰ Hakiha wankshig‐hoieja inke hinug‐kanag hiranikjanena, shige inke kikanag wagigiranikjanena, eshi Maura waxopini‐warajire warnira wangreginagre wikisgairekjanena.

³¹ Eshi jasge inkaga wowagaxeja hashjawinishe d’era hakiha wankshig‐inekjanera e Maura hornigiragwina, wena:

³² Abraham Mau harnira newinena, egi Isaak Mau harnira egi Jakob Mau harnira. Maura inke d’arnankhi Mau harniranina eshi niambnankhi harninena.

³³ Egi jaja worohanka washa de‐e naxguinegi wogus earnira gixixhirena.

³⁴ Eshi jaja Pharisera naxguinegi Sadusera inke xabniwaigira sto‐khinena.

³⁵ Egi hisha waehisha heregi woiwax hisha higiwaxshana hiunja, wena:

³⁶ Hirukanara woehieja hajanjega uwashi xetera hereshe?

³⁷ Jesus wagena: Hirukanara Mau hashinira najge hashinira harnaj hiwoxetehire egi naxirag hashinira harnaj hiu egi warnai hashinira harnaj.

³⁸ De‐e jowera herena egi uwashi xetera.

³⁹ Egi hinubra higu hikisgena: Hirakishu‐wusunshra wogixeteaje hikisge khianje.

⁴⁰ Woehira harnaj‐anaga egi prophetra uwashi de‐e hinuwinke eja nankshana.

⁴¹ Pharisera stokhinanku Jesus wawigiwaxshana,

⁴² Wena: Kristus jagu hiragirawishe, peshe hinigra hereshe? Wagairena, Dawid hinigra heregaja.

⁴³ Wawagena: Jasgegaja Dawidga naxirag harnieja Hirukanara higena, wena:

⁴⁴ Hirukanara, Hirukana harnira wagena, hoishoro‐haregi minagre hornish’ighirera si‐hakere warningiungi epa?

⁴⁵ Egi Dawidga Hirukanara higegi jasgehianaga hinighikjaneshe?

⁴⁶ Egi hinkisha hoit’e hisha hornigiha ruxurugnina, inke shigisha hamb‐eja woiwax higiwax hiranina.