Matthaiga 21 - Winnebego Bible Portions 1907

¹ Egi jaja Jerusalemra hiwusunsh hajiregi egi Bethphageeja hajirena Oliw‐xeja hina, egi Jesus hironag warnira nupiwi regigina.

² Wawagena: Jowerawiregi jhinagnagre eowarawire, egi higuana shungxetenajawaxeteisha rusgij‐jau hish’ekjanihawina egi ningra hakarakishu, girushgawige egi waigarni‐kiriwiaje.

³ Egi hisha washa hinigawigi, wawiaje, Hirukanara wiunkjanege, egi higuana huwagigikjanena.

⁴ Washa de‐e harnaj uinare exji herekjege, wauna jagu prophetra arnihera, wena:

⁵ Sion hinugra hogiragwire; horuxujre, hung hashinira hiranihina najgera shawa egi shungxetenajawaxete haminagshana, harexirighisha, wanoijge‐wakingigireisha hinigra herena.

⁶ Egi hironagra harairena, egi jasge Jesus hiwash’ira uinena.

⁷ Egi shungxetenajawaxetera harniakirirena egi harexirigra hirassa, egi waini warninera hijawashuirena, egi haminag‐gigirena.

⁸ Egi worohanka harnaj‐nisge waini warninera nagueja womishhirena hijanenanka na‐akarajge gijgis‐hiranaga egi nagueja horuerena.

⁹ Egi woroha jowera howarena egi woroha hironaganangkhi uwainena, wairena, Hosanna Dawid hinigra giuinera. Rajankwire Hirukanara rash harnira harnijira, Hosanna wangregi herera hirekjanena.

¹⁰ Egi jaja Jerusalem‐eja jigi, jhinagananka harnaj hixgana, wairena: Peshe de‐e hereshe?

¹¹ Egi worohanka wairena: De‐e Jesus prophet Nasareth‐eja herera herena Galilea mowagax‐eja.

¹² Egi Jesus Maura wohokhu‐hojhixete harnieja hokewena, egi jarnaga wohokhu‐hojhixeteja washa wiruwinankhi egi waruwinankhi harnaj jangra wowahas‐shana, egi shura‐hoikiruja warujra wawakhana, egi rujgesga wiruwi waminagnankhi.

¹³ Egi wawagena: Wagaxankshana: Jhi‐harnira gikaraj‐hojhira higairekjanena, eshi wamanuke hojhi sh’uwina.

¹⁴ Egi hishjarningra egi manirushagra wohokhu‐hojhixeteja hirajirena, egi rushjawahina.

¹⁵ Egi jaja nabhoruxaj‐hirukana hungra egi wowagaxhiperesra washa wowakanjank unga wajairegi egi ninkjangnigra e wohokhuhojhixeteja uwanankhi egi wairena: Hosanna Dawid hinigra giuinena, mashja inke giphihiranina,

¹⁶ Egi wagairena: Nanaxgu rajeshe jagu arnangre? Egi Jesus wawagena: Hojia, jasge inkaga (wowagaxra) hashjawinishe, ninkjang xununigra egi wasinankhi ira shesge‐wahige rajank‐nankshana?

¹⁷ Egi eja wat’unena, egi jhinageja hihinabanaga egi Bethania‐eja howarena egi hahe‐eja hiwusharna.

¹⁸ Egi haininegi jhinageja hakja howakarahau dokewehina.

¹⁹ Egi jaja nagueja Fig‐na‐hisha hajagi hijahina, egi inke washa haminagnina, eshi na‐abrashana‐jena, egi najega wagena: howarehikjanihare manegus inkaga has hamininagnikjanena. Egi higuana Fig‐najega hatat’egshana.

²⁰ Egi jaja hironagnanka najega hajairegi, khorairena, wairena: Xapgexjinig Fig‐najane hatat’eg.

²¹ Jesus horniharna egi wawagena: Hisgexjina hinigawina, harnaxgu hashiniwingi egi inke khibarawinigi, inke Fig‐nanagreshana shesge waragigiwininana, eshi xenagre waragarnana, gixanane egi tejainja hokit’unare hiragegi, nigiunana.

²² Egi washara harnaj, jagurisha ratawigi, harnanaxguwingi, shurusikjanihawina.

²³ Egi jaja wohokhu‐hojhixeteja hokewegi egi washa wagigus‐jau nabhoruxaj hirukana hungra egi wankshigra xete warninera hirajirena, egi wairena: Homashja jaguisha hiu washa de‐e sh’ushe egi homashja de‐e peshe hornik’ushe?

²⁴ Egi Jesus horniharna egi wawagena: Nishge washaisha hinigipaixjanihawina, e hunagisharagwigi, nishge hornigitaikjanihawina homashja jaguisha hiu washa de‐e hauanjane.

²⁵ John niwawaxu harnira hajinja howajishe? Wangregi nigeshge wankshigregi? Egi hokikit’airena wairena: Wangregi howajina hiawigi jagu‐u inke harnanaxguwinishe wangigekjanihawina,

²⁶ Eshi wankshigregi hiawigi wankshigra hiwarnakawa‐wigaja, Johnga harnaj prophet hiranai hirege.

²⁷ Egi Jesus hornigihairena egi wairena: Inkehiapereswinina. Egi wawagena: Hishge inke hornigitagwinina homashja jaguisha hiu washa de‐e haura.

²⁸ Eshi jagu hirarawishe? Wangisha nupiwi hinighigi, egi jegejajega hirahina egi wagena: Hinighaxji, habsinshmax harnieja hamb de‐e wararare.

²⁹ Horniharna egi wena: Inke haunina, eshi hageja najgerakarateg harnaga egi rena.

³⁰ Egi hinubeja‐jega hirahina egi shige shesge higena, egi horniharna egi wena: Tekjanena hirukanara, egi inke ranina.

³¹ Nup hajawinga hajanga hianjhiwira jagu era giuwishe? Wagairena: Jegejajega. Jesus wawagena: Hisgexjina hinigawina, Publikanra egi hinug‐wowongra e jorni jowerawieja Maura hungma harnieja hokawairena.

³² Johnga hiranijiwina, nagu hophira ningigus‐jiwina egi inke harnanaxguwinina, eshi Publikanra egi hinugwowongra harnaxguinena. Egi ne hashjawira inke hageja najgerarakarategwianaga harnanaxguwinina.

³³ Hisgera hijaneisha naxguwine: Jhirukanaisha ejanankhi e habsinsh hoshuna, egi mara k’arnaga habsinshhowaxgink hisha hijakanagshana, egi jhi‐hankshi hisha una egi max‐hirakaraija hornaj‐wagigina, egi ma‐harixji howarena.

³⁴ Egi jaja hasra dujhiregi ware warnira max‐hirakarananka eja howarewagigina, hasra hisge rus‐hirekjege.

³⁵ Egi max hirakarananka jhirukanara ware warnira warusanaga egi hisha hojina, egi hisha d’ehina egi hisha inihigissagshana.

³⁶ Shige ware hijane regigina hiraijera jorni hahirera, egi shige shesge wagigirena.

³⁷ Eshi hirowageja hinigra hijo‐waregigina, wena: Hinighara hingish’aghirekjanegaja.

³⁸ Eshi jaja max‐hirakarananka hinig hirajega hajairegi, wakigairena: De‐e hoishjana harnira herena, huwire, d’ehikjawina egi hoishjaine harnira harnikjawina.

³⁹ Egi harukos‐hirena, egi habsinsh‐max jangeja hot’unairanaga egi d’ehirena.

⁴⁰ Jaja habsinsh‐max‐hirukanajega jigi max‐hirakarananka jagu wagiunkjaneshe?

⁴¹ Wagairena: Wangwowongnanka mashja maisinsh wahikjanegaja egi maxhirakara hijaneja habsinsh‐max harnira hornaj‐wagigikjanena, e has‐hodujra herega hokaraik’u‐hirekjanena.

⁴² Jesus wawagena: Jasge inkaga wowagaxeja hashjawinishe: Inisha e jhiura nigiot’unairegi e ini haminag hopassera hahi herenana? Maura E shesge hina, egi hajara khorewahina.

⁴³ Esge wanigawina: Maura hungma harnira ningirushirekjanihawina egi wankshig‐howajehieja wogairekjanena e hasra Maura wagarni‐hahirekjanena.

⁴⁴ Higu peshe ini de‐e hashibregi gishishishjanena, eshi ininaka peshe hashibregi rujoibjanena.

⁴⁵ Egi jaja nabhoruxaj‐hirukana‐hungra egi Pharisera hisgera harnira naxguinegi, hiperes‐hirena e wawagera.

⁴⁶ Egi harukos‐nainena, eshi worohanka wanakawairena, prophet hisha here hirana‐inanke esge.