Matthaiga 19 - Winnebego Bible Portions 1907

¹ Egi wauna jaja Jesus washa de‐e erashjangi Galilea mowagaxeja nigehowarena, egi Judea mowagax‐hijejeja hina Jordan ageja.

² Egi hornihe‐xetera hironag hajirena egi eja harnaj rushjawahina.

³ Egi Pharisera hishge hirajirena hiunjaire egi wagairena: Woehieja uwashiagshe washara hisha hawau wangra hisha hijawina karat’uranashe?

⁴ Egi horniharna egi wawagena: Jasge inke wowagaxeja hashjawinishe E jeghojikerehieja‐reja wauna wangra egi hinugra wauna.

⁵ Egi wena: Esge wangra hisha heregi hianjra egi hiunira wat’uranana egi hijawina harusherejnana. Egi de‐e hinuwinke rora hishankira hirekjanena.

⁶ Esge inke nup hiranikjanena eshi rora hishankira hirekjanena. Esge jagu Maura hakishjeghigi, inke wankshigra rushe‐hiraninana.

⁷ Egi wagairena: Jagu ungaja Mosesga uwashishe kit’una wawagaxra hisha wogairekje, egi hijawira t’unekjegi.

⁸ Egi wawagena: Mosesga hijawi warawiga wakarat’une ningigiwina najge washiniwira shjananke esge, eshi jeg‐hojikerehieja inke shesgarnina.

⁹ Egi hinigawina: Higu peshe hijawira karat’unenara (hijawihirajega hikikshakshagishana), egi hijahira hisha khanakhi khikhanagra rushe waunana egi higu peshe hinug‐t’unairega khanagkhi, hishge khikhanagra rushe waunana.

¹⁰ Egi hironag warnira wagairena: Waehieja deshesgakhi wangra egi hijawihirera hakikishu inke wankshig hakishu phihiranigaja.

¹¹ Eshi wawagena: Inke wankshignagre harnaj washo’e de‐e hiperes ruxurug‐hiraninana, jarnaga hokuinegishana.

¹² Egi hota eunux‐nankshana e hiuni‐wahirera waujganag hiregi shesge wajhuinena, egi hota eunux‐nankshana e wankshigra eunux‐wauinege, egi hota eunux‐nankshana e eunux‐kikuinege hungma wangregi hereja hawau wauinena. Higu peshe de‐e hiperes‐ruxurugkhi hipereshiwiaje.

¹³ Egi ninkjang xununig hagarni hajirena, egi nab harnira hijawatumb‐harnaga egi gikaraj wagigikjege, egi wironag warnira najwisgi‐hirena.

¹⁴ Egi Jesus wena: Ninkjang xununignanka hiraji waigigiwire egi inke warogixiwinine, shesgera hungma wangregi herera wagiuinena.

¹⁵ Egi nab harnira hijawatumb‐harnaga egi eja nigehowarena.

¹⁶ Egi horuxujre hisha jina egi wagena: Hirukana phira, washa jagu phi haungi, wankshig‐hoi‐hisgejara harninashe?

¹⁷ Egi Jesus wagena: Jagu‐u phi hinageshe? Hinkisha phinina, eshi hishaukira phina Maura herena. Egi wankshig‐hoieja horakewekjegi woehira wauanje.

¹⁸ Egi wagena: Hajananka? Jesus wena: Inke wankshig d’ehinianje, inke khikanag rushenianje, inke wamanunianje, inke washa retunk‐arnianje.

¹⁹ Karaishagre hianjraga egi hiuniraga egi hirakishuwusunshra wogixeteaje hikisge khianje.

²⁰ Egi hojinjinjega wagena: Woehi de‐e harnaj hixununigreja hauhajina, jaguisha hinujis‐she?

²¹ Jesus wagena: Inke washa nisha hironihiranikjegi, kararnaga egi jagu hashinigi harnaj wiruwine egi wanajojaisgeja wogaje, egi washa jexira wangregi hashinikjena, egi jiarnaga egi hiroinagre.

²² Eshi jaja hojinjinjega washa de‐e naxgungi, najgerateg nige‐howakerena, washara rohaxji harnijege.

²³ Egi Jesus wironag warnira wawagena: Hisgexjina hinigawina, hitajenagre Maura hungma harnieja hokewera mashja gijexinakshana.

²⁴ Egi shige wanigawina: Wanoijge‐huxash’ogra hisha wiruxug hopoxeja hokewera e wogiwategnana egi wang hitajera Maura hungma harnieja hokewera e hiraijera gijexinankshana.

²⁵ Egi jaja wironag warnira de‐e naxguinegi mashja khorairena, wairena: Peshe niamb‐ruxuruigjeshe?

²⁶ Eshi Jesus woruxujshana egi wawagena: Wankshig homashja harnine hiura inke ruxurug phinina eshi Maura inke washara hisha gijexinina.

²⁷ Egi Peter horniharna egi wagena: Horuxujre, washara harnaj wat’untawianaga egi hironinagwina, jagura hisha harnikjanihawishe?

²⁸ Egi Jesus wawagena: Hisgexjina hinigawina, jarnaga hiroishanagwire, jeg‐wankshighoira heregi, jaja Wankshig‐hinigra glori hung waminag harnieja minagkhi, nishge hung waminagra nuphashana hamishanaikjanihawina, Israel wankshig howajehi nuphashanara haehira waragishunkjanihawina.

²⁹ Egi jarnaga jhira egi wakhinubra egi hinugwajabra egi hianjra egi hiunira egi hijawira egi ninkjangnigra egi mara wat’unegi rash harnira hawau waungi, hogihisha hawinjeja hirogiwekjanena, egi wankshig‐hoi hisgejara harnikjanena.

³⁰ Eshi roha jowera hereregi, hagra hererekjanena, egi hageja herera jowera hererekjanena.