Matthaiga 16 - Winnebego Bible Portions 1907

¹ Egi Pharisera egi Sadusera wakishu hajirena, egi hiunjairena, wangregi washa woijanti wagiunkje rogiguinena.

² Egi horniharna egi wawagena: Hoxjarnaga washa wishununa, hamb phinkjanena, maxira shujge esge.

³ Egi hainiga washa wishununa hamb de‐e hamb shishig gikjanena maxira shujanaga egi maxiwixiwiga. Hipokrit raniwina, maxira hashjawiga hambra jasgekjanega hirapereswina, eshi jasgegaja washa woijanti hambnagre inke wiperes‐shuruxurugwinishe?

⁴ Wankshighol wowonk egi kikanag‐rushe raniwira washa woijanti horaniwina, egi inke washa woijanti hornikui‐ranikjanihawina eshi Jonas prophetga washa woijanti harninahshana. Egi wat’unenashina egi nigeowarena.

⁵ Egi jaja hironag warnira ageja hahiregaja, waisgabdujra harninekjanegi wakikununi hirena.

⁶ Egi Jesus wawagena: Hirakara‐uwine Pharisera egi Sadusera winawohi harninera hinakewe khiwianje.

⁷ Egi hokikit’airena wairena: Inke waisgab‐duj harnin‐jiwinina esge weguni.

⁸ Egi jaja Jesus de‐e wawiperesgi wawagena: Harnaxgu xununig raniwingaja, jagu‐u horakikit’e hashanakshe, inke waisgab‐duj hashinirajiwinigi?

⁹ Jasge higu kheni washa hiraperes‐winishe? egi shige inke shewewiwinishe? Waisgab‐horok’ira sajara hogihixete‐saja wakura, egi napara jarnaga hoixji storawishe?

¹⁰ Egi shige inke shewewi‐winishe waisgab‐horok’ira shagowira hogihixete‐job wakura, egi napara jarnaga hoixji storawishe?

¹¹ Jasgegaja inke hirapers‐winishe, inke hornikit’awire waisgab waganina, eshi Pharisera egi Sadusera winawohi harninera hinakewe rakinkjawige.

¹² Gajanga hiperes‐hirena, inke waisgab‐hinawohi hinakewe khi washi warnira, eshi Pharisera egi Sadusera wogus harninera wagena.

¹³ Jaja Jesus Kesarea Philippi hijejeja higi, wironag warnira wawigiwaxshana, wena: Wankshig‐hinig hire hajera peshe wiheshe wankshigra arnankshe?

¹⁴ Egi wairena: Hota warnankshana John Niwawaxunga nineshe, hota Elias nineshe, egi hota Jeremias nineshe nigeshge prophet hijanera hisha nineguni airena.

¹⁵ Egi wawagena: Eshi peshe wineshe hishawishe?

¹⁶ Egi Simon Peter horniharna egi wena: Kristus neninegaja, Mau niambra Hinigra.

¹⁷ Egi Jesus horniharna egi wagena: Wornigishawashanakshana Simon Jona hinigra, rora egi waira inke de‐e hiperes‐ninina, eshi Jajiga wangregi nagre.

¹⁸ Egi hinigena: Peter ninena, egi ini hihag degi wohokhubojhi harnira hakarakanaikjanena, egi hote homashjara inke hakiranaga warnanikjanena.

¹⁹ Egi hung‐ma wangregi herera jhirob‐hiruhasra hornikunkjanena, egi jagura hisha manegi shurusgijgi, wangregi rusgijaikjanena, egi jagura hisha manegi shurushgegi, wangregi rushgagikjanena.

²⁰ Egi wironag warnira warogixina, inke hisha hogiraghiranikje E Jesus Kristus herejera.

²¹ Epa Jesus wironag warnira wawogiragshana, jasgegi Jerusalem‐eja howaranaga egi washara rohaxji hawekjanegi, xetera wauinekjanena egi nabhoruxaj‐hirukana hungra egi Wowagax‐hiperesra, egi d’ehirekjanegi egi hamb hidani‐hangi shige kikawa‐akjanegi.

²² Egi Peter Jesus russana egi najisgijirena wena: Inke shesgarnigaja Hirukanara, inke deshesge ningigi‐hiranikjanena.

²³ Eshi hijopahi‐jijeanaga egi Peter wagena: Hagregi une Satanra, joweregi hinagi shurujena, wowewi hashinira inke Maura washa warnieja herenina, eshi wankshig washa warnieja herena.

²⁴ Egi Jesus wironag warnira wawagena: Hisha hiroinaikjegi, kikurushjarehikjena egi nanamihera kurusanaga egi hiroinaikjena.

²⁵ Higu peshe wankshighoi harnira niambkhingi, wankshighoira xawarnikaragikjanena, egi higu peshe wankshighoira xawarnikaragigi rash harnira hawau, wankshig‐hoira hik’ekjanena.

²⁶ Egi wangrisha managre harnaj ruxurugkhi jaguophi howekjaneshe egi naxirag earnira xawarnihigi? Egi wangjega naxirag earnira jaguisha hakja hikuruwinashe?

²⁷ Egi Wankshig‐hinigra, Hianjra gloria harnieja jikjanena, waxopiniwarajire warnira wakishu, egi eja wankshigra jarnaga worera jagushana unankhi hirowe‐wagigikjanena.

²⁸ Hisgexjina hinigawina, eegi hotanankshana e inke hot’e harajab‐hiranikjanena, Wankshig‐hinigra hung‐ma harnieja howaji hajairegi epa.