Matthaiga 15 - Winnebego Bible Portions 1907

¹ Egi Jesus hirajirena Wowagax‐hiperesra egi Pharisera e Jerusalem‐eja howajirena, wairena:

² Jagu‐u hironag washinira xetera woshga warninera wigishana hireshe? E inke nab warninera wakurusharninankshana waisgab ruj hirega.

³ Egi horniharna egi wawagena: Jagu‐u Maura uwashi harnira nishge hiraishanawishe woshga hashiniwira hawau.

⁴ Maura uwashina ena: Hianjraga karaishagre egi hiuniraga, egi hisha hianjra egi hiunira washoshishig howe warogigungi, d’ehirekjena.

⁵ Eshi washawina: Higu peshe hianjra egi hiunira wagarnana, wogaisha herena, jagu hophi egi hu‐shuruswinara,

⁶ Shesgera wauiranana inke hianjra egi hiunira wakaraishagnina. Deshesgerawina Maura uwashi harnira inke washinkisge rawinina woshga hashiniwira hawau.

⁷ Hipokrit‐raniwina, Esaias phi prophet‐ningigiwina wena:

⁸ Wankshignagre hiwusunsh hahuirena irashana egi hingishaghirena ixura wik’u, eshi najge warninera hari hingiunankshana.

⁹ Eshi hoinigexji hingikaraj‐nankshana wankshig uwashi wogus wagigusnanke esge.

¹⁰ Egi worohanka wagigorna egi wawagena: Naxguwine egi hipereswire,

¹¹ Inke she‐e ieja howairajega wankshigra shishig‐hininana, eshi jagu ieja howajinanka she‐e wankshigra shishig‐hinana.

¹² Egi wironag warnira hirakirirena egi wagairena: Hiraperesshe Pharisera wogiteg‐hirera washa de‐e hishera naxguinera?

¹³ Egi horniharna egi wena: Washa jagu haxebnankhi e wangregi Hianjhara inke woshuni waunankhi, rejuna wirushoroj‐hirekjanena.

¹⁴ Shegu unang‐wahiwire, hishjarning hishjarning‐rutiwaunankshana, egi hishjarningra hisha hishjarningra rutigi, hinuinke mopoxeja hoshibrairekjanena.

¹⁵ Egi Peter horniharna egi wagena: Washinsgera de‐e wijanti‐hungiragwire.

¹⁶ Egi Jesus wena: Nishge inke nanaxguwinishe?

¹⁷ Kheni higu hiraperes‐winishe, jagura hisha ieja howairanaga nixaija howairegi, egi jangeja horeja hot’unarnana?

¹⁸ Eshi washa jagu ieja haxebanka, najge‐eja howajiakshana, egi she‐e wankshigra shishig‐hinana.

¹⁹ Najge‐eja howajiakshana wowewi shishigra, wankshigd’ehira, kikanag‐rushera, hikikshakshara, wamanura, retungra egi waraxjashgunira.

²⁰ Washa de‐e wankshigra shishig‐wahinana. Eshi nabra inke rusharani warujra, inke wankshigra shishig‐hininana.

²¹ Egi Jesus eja rena egi Tirus egi Sidon hijejera howarena.

²² Egi horuxujre Kanaan hinugisha hijej‐eja howajina egi giuwana, wena: Naj‐hungijane Hirukanara Dawid hinigra ninegaja, hinughara waxopinishishig hawehira rokana wagiunankshana.

²³ Eshi inke hoit’eisha hornigiharnina. Eshi wironag warnira hirajiranaga gitairena, wairena: Hinugra keregigire, uwa wangaruxe hahanke.

²⁴ Eshi horniharna egi wena: Jhasga xawarnira Israeljhira eshana wawagiu huingigina.

²⁵ Egi hinugjega jiarnaga egi gikaraj‐shana, wena: Hirukanara hingijirare.

²⁶ Eshi horniharna egi wagena: Inkephinina ninkjangnigra waisgab harnira wagirusanaga egi shung‐eja wogit’unera.

²⁷ Egi hinugjega wena: Hirukanara hisgegaja. Shesgarnunige shungnagre hoxjugra ruj‐nankshana, hirukana warninera waruj harnieja shibrairega.

²⁸ Egi Jesus horniharna egi hinugjega wagena: Hinugra harnaxgu hashinira rokanagaja, jasge waragera ningiuinekjena. Egi hinugjega hinugra rushjahirena howagixeja.

²⁹ Egi Jesus eja rena, egi Galilea tera hiwusunsh hina, egi xexeteisha eja hotina egi eja minagshana.

³⁰ Egi worohaxji hirahina, jarnaga manirushagra wakarani egi hishjaningra, iningra, hokishigra egi hijanera rohaxji, egi Jesus sii‐hieja wagishuirena, egi rushjawahina.

³¹ Sheshesgehigi worohanka khorairena, jaja i‐ningra hit’et’e wajairegi, hokishigra rushjainegi, manirushagra maninegi, egi hishjarningra wajairegi, egi Israel Mau harninera rajank‐hirena.

³² Egi Jesus wironag warnira wakaragigorna egi wena: Worohangre naj‐wagijana, hambra daniha hinkishu uinege, egi inke waruj juiranina, egi inke kere‐wagiginikjanena inke warujni, nigete nagueja hagi hokikurushag‐hirege.

³³ Egi wironag warnira wagairena: Hajinja waisgabra rokana horus‐kjanihawishe mojainanegi worohaxjiangre wainaj‐wahira.

³⁴ Egi Jesus wawagena: Horok’ina jarnaga hashiniwishe? Egi wairena: Shagowe egi ho‐xununigra jarnagi.

³⁵ Egi worohanka mainja minag wa’shina.

³⁶ Egi horok’i shagoweanka egi hora warussana egi wainabshana egi warujhena egi wironag warnira wawogarna egi wironagnanka worohanka‐eja wawogairena.

³⁷ Egi harnaj waruj‐hirena, egi wainaj‐hirena, egi waruj horujejera warus‐hiregi napara shagowe hoixji hotarna.

³⁸ Egi jarnaga warujga wangra hogihixete‐jobshana, hinugra egi ninkjangnigra inke gikarabnira.

³⁹ Egi worohanka kere‐wagigina egi wajeja hominaganaga egi Magdalara hijejeja hina.