Matthaiga 13 - Winnebego Bible Portions 1907

¹ Hamb‐eja Jesus jhieja hihinabshana egi tejaijejeja minagshana.

² Egi hornihe xetexji sto‐khinarnaga hirahirena esge waj hisha‐eja hokawarnaga egi minagshana, egi worohanka harnaj nijejeja nashinena.

³ Egi washara roha wirokit’ena, washa hisgera wigiu, wena: Horuxujwire max‐hoshuisha max hoshurena,

⁴ Egi jaja woshugi sura hota nagueja kirinakhirena, egi wanigra hajiranaga egi jeb‐wahirena.

⁵ Hota ininjaija kirinakhirena egi inke makax junina, egi higuana haxebhirena, inke makaxra shewenige esge.

⁶ Egi jaja wira hankshi‐jinakhi, daxuirena, egi inke reju juranige esge dawus‐hirena.

⁷ Egi hota napahi horogeja kirinankhirena egi napahira haxebhirena egi warnassag‐hirena.

⁸ Eshi hota makax hophieja kirinankhirena egi waisgab haminaghirena hota hogihisha haminaghirena egi hota kerepana‐hakewe, egi hota kerepana‐dani.

⁹ Higu peshe nuxhopox winaxgu jungi, naxguhiwiaje.

¹⁰ Egi wironagra hajirena egi wagairena: Jagu‐u washa hisgera wirorag‐gisharagshe?

¹¹ Horniharna egi wawagena: Hornikunawina hungma wangregi hereja washa nuxawara hiperes‐ninawige, eshi de‐e inke wawogairanina.

¹² Higu peshe harnijegi e hokuinekjanena egi hiraijera junkjanena, eshi higu peshe inke harnijanigi, e girus‐hirekjanena, higu jagu harnijegi.

¹³ Esge washa hisgera wiroakit’ena: Wajarnankhi inke wajairanikjege, egi warnaxgunankhi inke warnaxgu hiranikjege, inke shige naxgu hiranikjege esge.

¹⁴ Egi minnagre exji hererena Esaias prophet‐nihera e‐wena: Nuxhopoxra winanaxgunkjanihawina egi inke nanaxgunikjanihawina, egi hishjasura wirashjakjanihawina egi inke hiraginikjanihawina.

¹⁵ Egi wankshig de‐e najge warninera shjainena egi nuxhopox warninera winaxgu jexirena, egi hishjanuwishnakshana, hishjasu warninera wirajairekjanege egi nuxhopox warninera winaxguinekjanege egi najge warninera wiperes‐hirekjanege, egi wakshainekjanege egi rushjawahakjanege esge.

¹⁶ Eshi hishjasu washiniwira wogishawarnankshana wajairege egi nuxhopox washiniwira warnaxgunanke.

¹⁷ Hisgexjina hinigawina, prophetra roha egi wangphira washa washjawire, waja roguinena, egi inke wajairanina, egi washa warnanaxguwine warnaxgu‐roguinena, egi inke warnaxguiranina.

¹⁸ Esge max‐hoshuisha washa hisgera hiroragra naxguwine.

¹⁹ Jaja hisha hung‐ma hoit’era naxgungi egi inke naxgunegi, wowongra jinana egi washa jagu najgeja hoshurega warnashenana. De‐e e‐herena, nagueja su rusra.

²⁰ Egi hisha ininjainja su rusgi e herena, hoit’era naxgungi egi higuana wogishawaxji russana,

²¹ Eshi inke reju junina, eshi hijajanana, jaja hawegi egi shige higishana‐nainegi hoit’era hawau, higuana watoxinana.

²² Egi hisha napahi horogeja sura rusgi e‐herena hoit’era naxgungi, egi ma‐tegi najge‐wojianaga egi hitajera‐waishjankejege hoit’era nihaijeb‐hinana egi inke washa haminagninana.

²³ Eshi hisha sura makax hophieja rusgi e‐herena hoit’era naxguanaga egi naxgunana, e washa haminagnana, egi hota hogihisha haminag‐hiranana egi hota kerepanahakewe, egi hota kerepana‐dani.

²⁴ Egi washinsgera hijaneisha wawogiragshana, wena: Hung‐ma wangregi herera wangisha hisgerana, e su phira max‐earnieja woshurna.

²⁵ Eshi jaja wankshigra nainegi, hosh’igra jianaga egi xawishishig waisgab horogeja hogishurna, egi nigiowakerena.

²⁶ Egi jaja hura haxeb‐hiregi egi waisgab haminag‐hiregi, hishge xawishishigra jantinena.

²⁷ Egi jhi‐hirukanara ware warnira hajirena egi wagairena: Hirukanara, jasge inke su‐phira max‐hashinieja horashunishe, xawishishignagre hajinja howajireshe?

²⁸ E wawagena: Wankshig‐wawoshigkera wauna. Warananka wagairena: Jasge dawianaga watusharakjawishe?

²⁹ Eshi wena: Inkaa, ningete waisgabra hirassa washurushorojwiege xawishishigra washurusharawigi.

³⁰ Hinuinke hakikishu xete wagigiwire max‐hoikishereja hipa, egi max‐hoikisherera heregi max‐hikisherera wawagekjanena: Xawishishigra jorni stowahiwire egi warusgij‐wige taxuirekjena, eshi waisgabra waisgab‐hoshu harnieja hosto‐wahiwire.

³¹ Egi washinsgera hijaneisha wawogiragshana, wena: Hung‐ma wangregi herera mustard su hisha hikisgena, e wangra hisha rusanaga egi max‐earnieja hoshunana.

³² E washa sura harnajra eshana xunuxjinigshana, eshi jaja xetegi xawi abxetera eshana xeteraherenana, egi na‐xetejijenana, e wanig wangregi herera hajiranaga egi akarajgeja jhiranana.

³³ Washinsgera hijaneisha wawogiragshana, hung‐ma wangregi herera winawohi hikisgena, e hinugra hisha rusanaga egi waisgabra wigus danigi eja hirokishunana, hahiharnaj nawornana.

³⁴ Jesus worohanka eja washa de‐e harnaj washinsgera wirogiragshana, egi washinsgera‐rashana wawirokit’ena.

³⁵ Exji herekjege prophetra arnihera, wena: Hiat’et’egi washinsgera hihekjanena, washa nuxawara managre jinakhi epa, she‐e wotaikjanena.

³⁶ Egi Jesus worohanka kerewagigina egi jhieja hokewena, egi wironag warnira hiragirena, wairena: Wijanti hungiragwire, washinsgera maxeja xawishishignankhi.

³⁷ Egi horniharna egi wawagena: Hisha su‐phi hoshujega Wankshig‐hinigra herena.

³⁸ Maxnanka managre herena, su‐phinanka hung‐mara ninkjang warnira hererena, eshi xawishishignanka wowonkjega ninkjang warnira hererena.

³⁹ Wawosh’igjega wawoshugi waxopinishishigra herena, max‐hoikisherera ma‐hoshejana herena, egi max‐hikisherera waxopiniwarajirera hererena.

⁴⁰ Xawishishigra stowahinankhi egi taxuwahinankhi, hikisge shesgekjanena ma de‐e hoshejara.

⁴¹ Wankshig‐hinigra waxopiniwarajire warnira huwagigikjanena, egi hung‐ma harnieja horus sto‐wahirekjanena washara jarnaga najgeteg wahinankhi egi jarnaga washa wowonk‐uankhi.

⁴² Egi pejxeteja wot’unairekjanena, eja xaghirekjanena egi hirusgesgexji.

⁴³ Egi phira hatashairekjanena hambwira hikisge Hianj‐hirera hung‐ma harnieja, peshe nuxhopox winaxgu jungi, naxgu‐hiwiaje.

⁴⁴ Egi shige hung‐ma wangregi herera washa jexi maxeja nuxawanag hikisgena, e wang hisha hiegi hanuxawana, egi wogishawa karanaga, egi washara jarnaga harnigi wiruwianaga egi max‐naka ruwina.

⁴⁵ Egi shige hung‐ma wangregi herera waruwisha periphira hornije hikisgena.

⁴⁶ E jaja perl‐phi jexira hisha hiegi, rarnaga egi washara jarnaga harnigi wawiruwinana, egi ruwinana.

⁴⁷ Egi shige hung‐ma wangregi herera hoigixeisha tejainja hot’unairanaga egi hokirajra waixe hikisgena.

⁴⁸ E jaja hoixjingi ninjejeja horutiranaga, egi minaganaga egi phira woshueja hostowahina, eshi shishigra nigewotunena.

⁴⁹ Shesgekjanena ma‐hoshejara heregi, waxopiniwarajirera hajiranaga egi wowongra injab‐wahirekjanena phieja horognankhi.

⁵⁰ Egi pej‐xeteja wot’unairekjanena, egi eja xag‐hirekjanena, egi hi‐rusgesgexji.

⁵¹ Egi Jesus wawagena: washa de‐e harnaj nanaxguwishe? Wagairena hojia Hirukanara.

⁵² Egi wawagena: Esge wawagax‐hiperesra jarnaga hung‐ma wangregi herera wagigus‐hiregi, wanghisha jhirukana hikisgarnana, e rujgusgi washara warusnana jegra egi shagra.

⁵³ Egi wauna: Jaja Jesus washa hisgera de‐e rashjangi, eja nigiowarena.

⁵⁴ Egi jaja ma‐e hojabeja‐gigi, wohokhuhojhi harnineja washa wagigusra deshesge wahina khorairena, egi wairena: Wang de‐e washoiperes de‐e hajinja horus‐she, egi wore rokana de‐e?

⁵⁵ Jasge inke de‐e jhi‐unga hinigra herenishe? Jasge inke hiunira Maria higairanishe? Egi wakhinubra Jakob egi Joses egi Simon egi Judas wigairanishe?

⁵⁶ Egi jasge inke hinug‐wajabra harnaj hiwakishu hiunianjeshe, wang de‐e hajinja howaji washa de‐e worusshe?

⁵⁷ Egi howa’shere hirena. Egi Jesus wawagena: Prophetra e mojabejashana egi eojhiejashana inke gish’aghiraninana.

⁵⁸ Egi eja inke wore rokana wagiunina inke harnaxguiranige esge.