Matthaiga 12 - Winnebego Bible Portions 1907

¹ Egi wauna Sabath hambregi Jesus waisgab‐maxeja howena egi hironag warnira dokewehi hirena, egi waisgab rusoj hiranaga egi waruj hirena.

² Eshi jaja Pharisera hajairegi, wagairena: Horuxujre, hironag washinira washa de‐e unankshana woehieja e Sabath‐hambregi ura roxirera.

³ Eshi wawagena: Jasge, inke wawagaxeja hashjawinishe Dawid jagu ura, jaja dokewehigi egi jarnaga wakishu unjegi.

⁴ Maura hojhieja hokewena egi waisgab duj wahara ruj‐shana e woehieja rujra rogixirera shige jarnaga wakishu unjega, eshi nabhoruxaj hirukanara eshana rujhiranana.

⁵ Egi shige inke woehieja hashjawinishe Sabath‐hambregi nabhoruxaj hirukanara wohokhuhojhixeteja Sabathra higishana‐nanknunige egi inke washinohire uwauninankshana.

⁶ Eshi hinigawina: Eegi xeteisha unjena wohokhuhojhixetera worujisshana.

⁷ Egi hirapereswigi jagu de‐e wagairera: Najwojara hiraijera waiphi‐hajena nabruxajra worujis‐waharna, inke wigishananira inke hawewahi phiraniwinina.

⁸ Wankshig‐hinigra hishge Sabath‐hambra hirukanajena.

⁹ Egi jaja eja regi wohokhuhojhi warnineja hokewena.

¹⁰ Egi horuxujre, wangisha eja nankshana e nab harnira dakaserena. Egi higiwaxhirena wairena: Jasge Sabath‐hambregi rushjawahira woehieja roxishe? washinaraj hirekjege wairena.

¹¹ Egi wawagena: Wankshigra hisha horogregi hashanankshe jhasgara hisha harnigi, egi Sabath‐hambregi mopoxeja hoshibregi, jasge inke harukosanaga egi a‐tumbninashe?

¹² Jasge inke wankshigra e hiraijera phirarnaga jhasgara worujis‐hiranishe? Esge woehira inke roxinina Sabath‐hambregi washophi ura.

¹³ Egi wangjega wagena: Ara kawajigre. Egi wajigshana, egi rushjana hijanera kikarakisgena.

¹⁴ Egi Pharisera hihinab‐hiranaga egi haehi hirena hakira, jasge houna hiranaga d’ehirekjegi.

¹⁵ Egi jaja Jesus hiperesgi, eja nige‐howarena egi worohaxji hironakshana, egi harnaj rushjawahina.

¹⁶ Egi winakewe wahina inke hiperes‐hire‐hiranikjege.

¹⁷ Exji herekjege Esaias prophetra arnihera, wena:

¹⁸ Horuxujre ware harnira, E haijhana, wagixetera, E naxirag harnira giphixjina. Naxirag harnira hashukjanena, egi hirarujeja herera woehira wogiraikjanena.

¹⁹ Inke wakitagnikjanena inke shige uwanikjanena inke shige hisha hora naxguinikjanena nagu‐hoxeteja.

²⁰ Raxge kshabrera inke shishre‐wahinikjanena, egi hotaxij‐jegi inke giseb‐hinikjanena, warninanaga woehira wirahi‐hiarnaga wawanakjanena ejipa.

²¹ Rash earnira hiuinarnaga hirarujeja herera woinashi juinekjanena.

²² Egi hisha hagarni hahirena waxopinishishig harnineisha, hishjaraning egi iraning, egi rushjahina deshesge hina, hishjaningra egi iraningra hit’ete hianaga egi wajarna.

²³ Egi wankshigra harnaj khorairena egi wairena: Jasge inke de‐e Dawidga hinigra herenishe?

²⁴ Eshi jaja Pharisera naxguinegi wairena: Wang de‐e inke washinjahi hiuanaga waxopinishishig jangra howahasnijena eshi Beelsebubra hiunjena waxopinishishig hungra.

²⁵ Egi Jesus wowewira wawigiperes‐shana, egi wawagena: Hungmara hisha khiruje‐khianaga hakikiragi maisinsh‐khinana, egi jhinagra hisha egi shige jhira hisha khiruje‐khianaga hakikiragi inke nashini‐janana.

²⁶ Egi Satanra Satan jangra howahasgi e khiruje‐khianaga hakikira waunana, jasgehianaga hung‐mara nangishi‐janeshe?

²⁷ Egi Beelsebub hiuanaga waxopinishishig jangra hopahasgi, homashja peshe harnigi hiuinarnaga ninkjang washiniwira jangra howahasnankshe? Esge e woehira hiningiuinekjanihawina.

²⁸ Eshi Maura naxirag harnira hiauanaga waxopinishishig jangra hopahas‐hajege, Maura hung‐ma harnira hiranijiwina.

²⁹ Egi shige jasge hisha hiarnaga egi wang mashjara hisha hojhieja hokawanashe egi washa warnira wanashenashe inke jorni wang mashja‐jega rusgij‐ninashe? Egi hagenigi washara wanashenana.

³⁰ Hisha inke hakishu haunianjegi inkirajanana, egi hisha inke wastohi hakishu haunianjegi hoere‐hijanana.

³¹ Esge wanigawina: Washa woishana hokirajra harnaj egi raxjashgunira wankshigra wagit’unairekjanena, eshi peshe Naxirag Wakanjangra raxjashgunigi inke wagit’unairanikjanena.

³² Egi higu peshe Wankshig‐hinigra hoit’e hirakira hit’egi, gitunairekjanena, eshi higu peshe Naxirag Wakanjangra hakira hit’egi inke git’unairanikjanena, inke ma‐egi egi shige inke ma‐joweregi.

³³ Hisherewinana na‐phira hisha hoshugi egi hasra phihiranana, egi shige na‐shishigra hisha hoshugi, egi hasra shishig‐hiranana, nara wijantinakshana has warnineja.

³⁴ Wakha‐hipahi ning raniwira, jasge rawianaga nishishig harajege washa phi hishawininana, najge hashiniwira hawuhinshuanke i‐eja haxebnankshana.

³⁵ Wang‐phira najge harnira washa phi horujgusjegi, washa phi haxebhinana, egi wang‐shishigra washa shishig rujgusjegi washa shishig haxebhinana.

³⁶ Eshi hinigawina: Wankshigra hit’e hoinigera jarnaga airegi hamb woehieja e wawigairekjanena.

³⁷ Hoit’e washinira e phininekjanihawina egi hoit’e washinira e washoshishig howeninekjanena.

³⁸ Egi Wowagax‐hiperesra egi Pharisera hota hornihairena, wairena: Hirukanara washa woijantira hisha harnigijhawigi haiphiwinana.

³⁹ Eshi horniharna egi wawagena: Wankshighoi kikanag rushe egi wowong raniwira washa woijanti horaniwina, egi inke washa woijanti hornikui‐ranikjanihawina, Jonas prophetga washa woijanti harninashana.

⁴⁰ Jonasga hambra danihanaga egi hahera daniha hoxete nixarogeja nihera hikisge Wankshig‐hinigra hambra danihanaga egi hahera daniha ma‐rogeja nihekjanena.

⁴¹ Niniweh wankshigra hamb woehieja wankshighoi de‐e wakishu nashinekjanena egi washoshishig howewahirekjanena, Jona wahokhura najgera‐karateghirege esge, egi horuxujwire eegi hiraijera xeteisha jena, Jona worujisshana.

⁴² Hiungiwi wiorojanjeregi herera hamb woehieja wankshighoi de‐e hakishu nashinekjanena egi washoshishig howewahikjanena, e ma‐harixji howajianaga Salomon washoiperes harnira naxgujige, egi horuxujre eegi hiraijera xeteisha jena, Salomon worujis.

⁴³ Jaja naxirag shishigra wankshig‐eja hihinabgi, mawusra howarahena hoxgasigi hokini, egi inke washa hienina.

⁴⁴ Esge wena: Jhi‐wajhieja hakja wawakerekje, hajinja hiahinabra eja, egi jaja gigi mananaku hiena gisinshjina egi phiuxjine.

⁴⁵ Egi rarnaga, egi naxirag hijanera shagowi harnikirina e hiraijera wowonk hirena, egi hokawairanaga egi eja jhirena. Egi wang she‐e hageja wakhinikjanena jorni hirohekshana. Wankshighoi wowonk de‐e hishge shesgairekjanena.

⁴⁶ Wankshigra wawokit’arnanku, horuxujre hiunira egi wakhinubra jangeja nashinankshana, hokit’e roguxjine.

⁴⁷ Egi hisha wagena: Horuxujre hiuniraga egi warakhinubra jangregi nashinankshana, hornikit’e roguxjine.

⁴⁸ Eshi horniharna egi wagena hogiragjega: Peshe hiunihashe egi peshe wakhinubshe?

⁴⁹ Egi wironag warnieja hapahi ara wajigshana egi wena: horuxujre hiunihara egi wakhinubra.

⁵⁰ Higu peshe Jajiga wangreginagre woshga harnira ungi e wakhinubra hererena egi hinugwajabshana egi hiuniharna.