Markga 9 - Winnebego Bible Portions 1907

¹ Egi wawagena: Hisgexjina hinigawina, hota higinashinankshana e inke hot’era harajab‐hiranikjanena jaja Maura hungma harnira homashjara hakaraniji hajairegi epa.

² Egi hambra akewehanaga hageja Jesus Peter egi Jakobga egi Johnga warussana, egi xe‐hankshi hihageja inekhi warnihina. Egi hajara hija‐khina jowehireja.

³ Egi waini warnira rukanakanap‐hirena, sgaxjina wa hikisge, inke wasse wiwashara ma‐hihagregi‐nankhi hisha hosgara wikisge hininana.

⁴ Egi Elias egi Moses hakishu janti wagikhinena egi Jesus hokit’airena.

⁵ Egi Peter horniharna egi Jesus wagena: Hirukanara, hophiwawawigaja higihajiwira. Jhira dani haunkjawina, hisha ne‐hashinianaga egi hisha Mosesga harnikjena egi hisha Elias harnikjena.

⁶ Jagu arnagre hinke hiperesni wena, naxirera rokana hirege.

⁷ Egi eja maxiwi nigenagra hoirahasi wagigina, egi maxiwinanka eja hit’et’e howajina, wena: De‐e Hinigha wagixetera herena, harnaxguwine.

⁸ Egi higuana, jaja woruxuj‐hiregi inke hisha hajairanina Jesus eshana wakishu‐unjena.

⁹ Egi jaja xera harnukanag haguiregi warogixina inke hisha hogirag‐hiranikjege, washa jagu hajairega, Wankshig‐hinigra d’arnagra eja howakiri niambgi ejipa.

¹⁰ Egi washa de‐e are inekhi wewinankshana hikiwaxhirena d’arnagra eja niamb howakirikjane ega jagu wagegi.

¹¹ Egi higiwax‐hirena, wairena: Jagu‐u waireshe wowagax‐hiperesra, Elias jasgegi jorni jikjanena?

¹² Egi horniharna egi wawogiragshana, hisgexjina Elias jorni jikjanena egi washara harnaj shige waphiunkjanena. Egi Wankshig‐hinigra jagu higaire wagaxankshe, washara roha jasgegi hawekjanena, egi inke washanisha hikisge‐hiranikjanena.

¹³ Eshi hinigawina, Elias hisgexji jiginina, egi higu jagu giphinera giuinena, jasge e horaghire wagaxangra.

¹⁴ Egi jaja wironag warnira wiragigi, hornihe xete hija‐nanku wajarna, egi wowagax‐hiperesra wironag warnira wakitagnankshana.

¹⁵ Egi higuana wankshignanka harnaj jaja hajairegi khorera rokana hirena. Egi nang‐hirajiranaga hikaragihirena.

¹⁶ Egi wowagax‐hiperesnanka wawigiwaxshana, jaguisha hawau warakitagwishe?

¹⁷ Egi worohanka eja hisha horniharna egi wena: Hirukanara, hinighara harnigarni hajina, e naxirag ining hisha harnijena.

¹⁸ Egi higu hajinja harukosga, higinini‐shununa, egi ira jax‐harawojanaga egi hira‐giginsh‐anaga egi hushawashununa. Egi wironag washinira wiroakit’era jangra howahas‐hirekjege, egi inke ruxurug hiranina.

¹⁹ Hornigiharna egi wena: Wankshig harnaxgu jushguni raniwingaja, jajaixji hoja harnikishu hauwishe? Jajaixji harnini hauwishe? Higarni huwire.

²⁰ Egi hagarni hajirena, egi jaja hajagi, higuana naxiragra higinini‐jirena egi mainja khinipshana egi ira jaxharawoj hokikawajana.

²¹ Egi hianjra higiwaxshana, jajanane, epa de‐e hirajishe? Egi wena: Ninkjangnig‐reja.

²² Egi tejankhi pejeja hot’uneshununa egi ni‐eja d’ehikjege. Eshi washanisha shuruxurugkhi, najungijawinge hingijirawire.

²³ Jesus wagena: Harnaxgu shuruxurugkhi, hisha harnaxgungi washara harnaj ruxurugnana.

²⁴ Egi higuana ninkjankjega hianjra uwana egi xag wena: Hirukanara harnaxguna, inke harnaxguni harnira parnakjena hingijirare.

²⁵ Jaja Jesus wankshigananka nang‐hajire sto wajagi, naxirag shishigra najisgina, wagena: Naxirag ining ranira egi nuxning ranira, unishina eja hihinabre egi inke hinupahana hija hokawarnianje.

²⁶ Egi ijanigshana egi ruksu‐ksunshra rokana wagiuna egi eja hihinabshana. Egi hojinjinigra d’e hikisgena, d’egaja roha ena.

²⁷ Eshi Jesus nabeja harukos‐anaga egi ruana, egi nashina.

²⁸ Egi jaja jhieja hoikawairegi, wironag warnira inekhi higiwax‐hirena: Jagu‐u inke jangra hopahas‐winishe?

²⁹ Egi wawagena: (Naxirag) deshesgera inke washinjahi hiuanaga jangra wowahas‐ninana eshi gikaraj egi hantaginaj hiungishana.

³⁰ Egi eja nigiowarena egi Galilea mowagaxra e hahiowena, egi inke hisha hiperes‐nangi‐inina.

³¹ Egi wironag warnira washa wagigus‐shana egi wawagena: Wankshig‐hinigra wankshig nab‐eja horushjarehirekjanena, egi d’ehirekjanena, egi d’ehiranaga hageja hamb hidanihangi kikawa‐ankjanena.

³² Eshi washa ega inke naxgu hiranina, egi higiwaxra nakawairena.

³³ Egi Kapernaum eja gina, egi jhieja hagiregi wawigiwaxshana: Jaguisha naguregi harakikitagwishe?

³⁴ Eshi inke xab‐hiranina, nagueja kikitagnanka hajanga e xetekjanihawigi wagairege esge.

³⁵ Egi minagshana egi nup‐hashanara wagigorna egi wawagena: Hisha jornira herekjegi e hirowagnira herekjanena egi harnaj ware harninek‐janena.

³⁶ Egi ninkjangnig hisha rus‐anaga egi horog‐hireja kerena, egi jaja ruangi wawagena:

³⁷ Higu peshe ninkjangnig deshesgera hisha rusgi rash harnira hawau waungi hirus‐waunana, egi higu peshe hirusgi inke ne hirus‐wauni eshi hu‐ingigira rus‐waunana.

³⁸ Egi Johnga horniharna egi wena: Hirukanara hisha hajawina waxopinishishig jangra howahas‐shana rash hashinira hiu, egi roagixiwina, inke wang‐wironagwinige esge.

³⁹ Egi Jesus wena: Inke rogixinine, inke hisha washa wowakanjank ungi rash harnira hiu waungi egi higuana washinohire hinge ruxurug‐ninana.

⁴⁰ Hisha inke wang‐akirawinigi, harniwinegi‐jarnana.

⁴¹ Higu peshe niwirajgara hisha ni‐hoshu rajga hornik’u‐hirawigi rash harnira hawau, Kristus eja ninewige, hisgexjina hinigawina woirowera inke gixawarninikjanena.

⁴² Egi higu peshe xununignagre harnaixgu‐nagre hisha watoxi‐higi ini‐wirujobra hisha nap’in gigirarnaga tejainja hot’unairegi e hiraijera phingigi‐ranana.

⁴³ Egi nab hashinira washinohire u‐ningi gikunug‐gaja, hiraijera phi horawanana wankshig‐hoieja kunug horakewegi, sarni pej‐shishigeja horakewegi e hiraijera shishignana, pej inkaga giseb‐nikjanega eja.

⁴⁴ Eja wikiri warninera inke d’arninankshana egi pejra inke giseb‐niankshana.

⁴⁵ Egi si hashinira washinohire u‐ningi gikunug‐gaja, hiraijera phi horawanana wankshig‐hoieja manirushag horakewegi, sira sarni pej‐shishigeja hornit’unairegi e hiraijera shishignana, pej inkaga giseb‐nikjanega eja.

⁴⁶ Egi wikiri warninera inke d’arninankshana egi pejra inke giseb‐niankshana.

⁴⁷ Egi hishjasu hashinira washinohire u‐ningi rushorojaje, hiraijera phi horawanana Maura hungma harnieja hishjasura hishankira harni horakewegi, hishjasura nup harni pej‐shishigeja hot’unairegi e hiraijera shishignana.

⁴⁸ Eja wikiri warninera inke d’arninankshana egi pejra inke giseb‐ninankshana.

⁴⁹ Jarnagaka pej hisgu‐wahirekjanena, egi nab‐hiruxajra harnaj nisgu hisgu‐wahirekjanena.

⁵⁰ Nisgura phinena, eshi nisgura hosgura gixawarnigi, jaguisha hisgu‐warakjanihawishe? Nisgu harajena egi rashguni hakikishu uwianje.