Markga 8 - Winnebego Bible Portions 1907

¹ Hambeja worohana rokanaxjina, egi inke waruj junina, Jesus wironag warnira wakaragigorna, egi wawagena:

² Worohangre naj‐wawagijana, hambra daniha hinkishu uinege egi inke waruj juinarnige.

³ Egi inke waruj‐hirani eojhireja howakere‐wagigigi naguregi hagi hokikurushag‐hirekjanegaja, egi woroha hari howaji wa’uanke.

⁴ Egi wironag warnira hornigi‐hairena: Hajinja hisha waisgab horus‐wianaga wang‐nagre wainaj‐hiwahikjawishe mojainanegi?

⁵ Egi wawigiwaxshana, horok’ina jarnaga hashiniwishe, egi wairena: Shagowi.

⁶ Egi wankshigra mainja minag wa’shina, egi horok’in shagowianka warussana, egi wainabshana, egi warujhena, egi wironag warnieja wawogarna jowehireja wawagishuirekjege, egi wankshignanka jowehireja wawagishuirena.

⁷ Egi ho‐xununigra jarnagi harninena egi wainabshana, egi shige jowehireja wawagishu wa’shina.

⁸ Egi waruj‐hirena egi wainaj‐hirena egi waruj horujhera stowahiregi napara shagowi hota‐hirena.

⁹ Egi warujanka harnajra hogihixete‐jopshana, egi kerewagigina.

¹⁰ Egi higuana waj‐hisha eja hominagshana, wironag warnira wakarakishu egi Dalmanutha hijejeja hina.

¹¹ Egi Pharisera hajirena, egi wigiwax‐hajiarairena, washa woijanti wangregi howajihi rogigu‐hirena, gishja.

¹² Egi nihasigina naxirag harnira egi wena: Jagu‐u wankshighoi de‐e washa woijanti horninankshe? Hisgexjina hinigawina, wankshighoi de‐e inke washa woijanti hok’uiranikjanena.

¹³ Egi wat’unarena egi shige waj‐eja hominag‐anaga teagra howarena.

¹⁴ Egi wironagra waisgabduj harnirera wakikununinena egi waj‐eja inke hiraijerani horok’ina hishankira harninena.

¹⁵ Egi wawagena, wena: Hirakara‐uwine, Pharisera winawohi harninera hinakewe khiwianje, egi Herodes winawohi harnira hinakewe khiwianje.

¹⁶ Egi hokikit’airena, wairena: Inke waisgabduj harniwinina esge wegaja.

¹⁷ Egi jaja Jesus wawiperesgi, wawagena: Jagu‐u horakikit’awishe, inke waisgabduj hashiniwinigi? Jasge kheni hinapereswinishe? Shige inke hashjawinishe? Najge washiniwira higu shjanankshe?

¹⁸ Hishjasu nijuwianaga egi inke wirashjawinishe? Egi nux‐hopox nijuwianaga egi inke winanaxguwinishe? Egi inke wawewi shuruxurugwinishe?

¹⁹ Jaja waisgab‐horok’ina saja dujhera hogihixete‐saja hikiweninera, hoxjugra napara jarnaga hoixji storawishe? wagairena: Nup‐hashana.

²⁰ Egi jaja shagowina hogihixete‐jop hikiweninera hoxjugra napara jarnaga hoixji storawishe? Egi wairena: Shagowi.

²¹ Egi wawagena: Jasgerawigaja inke hashjawinishe?

²² Egi Bethsaida eja hina, egi wang hishjarning hisha hagarni‐hahirena, egi hikiokje gitairena.

²³ Egi wang‐hishjaninkjega airutianaga egi jhinag jangeja howaninena. Egi jaja hishjasueja hashogi egi nabra (nassueja) hatumbshana, higiwaxshana, washara hisha hajaguni higena.

²⁴ Egi woruxujshana, egi wena: Wankshig hajarna na hikisgaire maninankshana.

²⁵ Hageja shige hishjasura higikiorna egi woruxuj gigina egi rushjana, egi washara harnaj warushaxji wajarna.

²⁶ Egi eojhieja howakere‐gigina, wagena: Inke jhinageja howaranine, shige inke jhinageja hisha hogiragnianje.

²⁷ Egi Jesus rena egi wironag warnira, Kesarea Philippi jhinag harnieja hokawairena, egi harahairau wironag warnira wawigiwaxshana, wawagena: Peshe wineshe wankshigra arnankshe?

²⁸ Egi hornihairena, John Niwawaxunga, eshi hota wairena Elias, egi hijanera wairena Prophetra hisha nineshe airena.

²⁹ Egi wawagena: Eshi peshe wineshe hishawishe? Egi Peter horniharna egi wagena: Kristus neninegaja.

³⁰ Egi warogixina inke hisha hogirag‐hiranikjege.

³¹ Egi washa wagigus‐jirena, Wankshig‐hinigra jasgegi washara roha hawekjanena, egi xetera egi nabhoruxaj hirukana hungra egi wowagax‐hiperesra wajis‐hirekjanegi, egi d’ehirekjanegi egi hamb hitanihainja niaimbkjanena.

³² Egi hoit’e she‐e ega harusharani wena. Egi Peter rusanaga, egi rogixijirena.

³³ Eshi jaja hijopahi nashingi, egi wironag warnira woruxujgi Peter najisgina, wena: Satanra hageja howeune, Maura washa warnira inke wowewina eja niniharnina, eshi wankshignagre washa warnineja.

³⁴ Egi jaja wankshigra wagigogi egi wironag warnira hishge, wawagena: Higu peshe hiroinaikjegi, jasgegi kikurushjarehikjena, egi naramihera kurus‐anaga egi hiroinaikjena.

³⁵ Higu peshe wankshig‐hoira niamb‐khingi wankshig‐hoira xawarni‐karagikjanena, egi higu peshe wankshig‐hoira xawarni‐karagigi rash harnira hawau egi woragphira hawau e wankshig‐hoi harnira niamb‐karagikjanena.

³⁶ Egi wangrisha managre harnaj ruxurugkhi jagu‐ophi howekjaneshe, egi naxirag earnira xawarnihigi?

³⁷ Egi wangjega naxirag earnira jaguisha hakja hikuruwinashe?

³⁸ Higu peshe hiroigishikhi egi hoit’e warnira, de‐e wankshig‐hoi khikanagrushe raniwina egi wowong raniwina, Wankshig‐hinigra hishge wawirogishig‐gikjanena, jaja waxopiniwarajire wakanjangra wakishu Hianjra gloria harnieja gigi.