Markga 6 - Winnebego Bible Portions 1907

¹ Egi eja nigiowarena, egi e mojabeja gina, egi wironag warnira hironag‐hirena.

² Egi jaja Sabathra jigi, wohokhu‐hojhieja wahokunjirena, egi roha harnagixguinena khorairena, wairena: Washa de‐e hajinja worusshe? Egi washoiperes jaguisha de‐e hokuineshe? Washa rokanaxji nab earnira hik’ungaja.

³ Jasge inke de‐e jhi‐unga herenishe, Maria hinigra, Jakob egi Joses egi Juda egi Simon wakhinubra, jasge inke hinugwajabra hiwakishu hiunianjeshe? Egi howashere‐hirena.

⁴ Egi Jesus wawagena: Prophetra inke gishaghire rokani unijena eshi e mojabeja egi washawahieja egi eojhieja eja inke gishag‐ninankshana.

⁵ Egi eja inke wore rokana u‐ruxurugnina, howashara jarnagkira hikiorna egi rushjawahina.

⁶ Egi khorena inke harnaxgu‐hiranira hawau. Egi jhinag xununigra howewouna washa wagigus.

⁷ Egi nup‐hashanara wakara‐gigorna, egi nupshana nigeoware wagigina, egi homashja wawogarna naxirag shishigra wawirukana wagigina.

⁸ Egi wawagena: Hikiwarera inke washanisha harniharairanikje, hissaguna eshana, inke waxupa harniranikje, inke waisgabduj, egi shuroshu washiniwira inke shura woshuwinianje.

⁹ Eshi hokijawiaje, egi inke wonashixetera nupiwi hornashiwinianje.

¹⁰ Egi wawagena: Higu hajinja jhira hisha horakawawigi, eja hiwusha‐hajau, eja rawiaje.

¹¹ Egi higu peshe inke niruswinigi, shige inke nanixguwinigi, jaja eja nige‐horawa‐sharawigi, si washiniwieja majushig hiranirajawingi hakja warnajowiaje, e wihohi hakikira kikuinekjanena. Hisgexjina hinigawina, Sodom egi Gomorah eja herera hiraijera hiroheg hawairekjanena woehi hambeja, jhinag she‐e hiraijera hawekjanena.

¹² Egi harairena, egi wahokhuinena wankshigra najgerakarateghirekjege.

¹³ Egi waxopinishishigra roha jangra howahas‐hirena, egi roha howashagi wikini wawaxu‐hirena, egi rushjawahirena.

¹⁴ Egi hungra Herodes hornaxguna (rash earnira harnaj hornaege) egi wena: John niwawaxunga d’arnagra eja howakiri niambguni, esge wore rokanaxji jantihijegaja.

¹⁵ Hijanera wairena: Elias herena, hijanera wairena: Prophet hisha herena, nigeshge prophetra hisha herejeguni.

¹⁶ Eshi jaja Herodes she‐e naxgungi wena: Johnga herena, e para haiwaxra, e d’arnagra eja niamb howakirina.

¹⁷ Herodes exji rewagigianaga egi Johnga harukoswagigina, egi hornassanaga rusgijshana, Herodias hawau, khinubra Philip hijawina, Herodes khananke.

¹⁸ Johnga Herodes wagena: Woehieja roxiagshana rakhinubra hijawina rakhanagre.

¹⁹ Esge Herodias Johnga higishananaina egi d’ehi roguna, eshi inke ruxurugnina.

²⁰ Herodes Johnga nakewena, wang phisha egi wakanjank hisha herera hiperesge, egi rujgus‐shana, egi jaja hornaxgungi washara roha una, egi naxguna giphina.

²¹ Egi jaja hamb houngiphira jigi Herodes hamb hojuine harnieja hoxjarna woruj hirukana warnira wagiuna egi manape hung xetera egi Galilea mowagaxeja wang washinukana xetera.

²² Egi jaja Herodias, hiwagawira, hinugra hokewegi egi washina egi Herodes giphina egi hija wakishu minaganaka, hunganaka hinugnigjega wagena: Hingitare jagura hisha roragungi, egi hornikunkjena.

²³ Egi wihogigina: Higu jagura hisha hinagitagi hornikunkjena, hungma harnira hokiwassig‐khishge.

²⁴ Egi karanaga egi hiunira wagena: Jagu hagitakjeshe? Egi wena: John Niwawaxunga nassura gitare.

²⁵ Egi higuana hikuhexji hungra hirajina, egi tarna, wena: Higuana John Niwawaxunga nassu harnira wasge hokanag hunakungi roaguna.

²⁶ Egi hunganaka mashja najgerategshana. Eshi wihohiga hawau egi wakishu minagananka e hawau, inke watara rushag’hi ruxurugnina.

²⁷ Egi higuana hunganaka wat’ehira regigina egi nassura harnikiri washina. Egi rarnaga egi jhiwornasse hojhiejanaki para giwaxshana.

²⁸ Egi nassura wasge hokanag harnikirina egi hinugnigjega hokuna, egi hinugnigjega hiunira hokuna.

²⁹ Egi jaja wironag warnira naxguinegi hajiranaga egi rora rus‐hirena egi wanaxi homigeja tumb‐hirena.

³⁰ Egi Apostelra Jesus eja sto‐khinena, egi washara harnaj hogirag‐hirena jagu uinegi egi jagu wagigushiregi.

³¹ Egi wawagena: Huwire mojainainja injab howarawire egi xgasigiwire roha huhena egi hakara‐harnankshana inke waruj ruxurug‐niwahinankshana.

³² Egi inekhi wajowe mojainara howarairena.

³³ Egi nigeowarairegi wankshigra wajairena, egi roha higirena egi mowe eja hornuwang‐hirena jhinagnankhi harnaj hisgeshana harairena egi warnajis‐hahirena egi Jesus eja stoirena.

³⁴ Egi Jesus jaja hihinabgi wankshigra roha hajarna egi najwawogijana, jhasga hikisgairegi jhasga‐hirakarara jushguni hirege. Egi washara roha wagigus‐jirena.

³⁵ Egi jaja hoxjananegi, wironagra hirahirena egi wairena: De‐e mojaina heregaja, egi hambra jowe hiuwinagaja.

³⁶ Kerewagigire e jhinageja howakarairekjena egi jhinagxununigeja hogigixangre egi waisgab khiruwinekjena, waruj rokani waunanke.

³⁷ Horniharna egi wawagena: Ne waruj wogawire. Egi wagairena: Jasge tawianaga egi Denariara hogihinup hikisge waisgabdujra duwinkjawishe, egi waruj wogagi?

³⁸ Wawagena: Waisgab‐horokina jarnaga hashiniwishe? Rawire egi horuxujwire. Egi jaja hiperes‐hiregi, wairena: Sajana egi hora nupiwi.

³⁹ Egi horniheishashana harnaj minag wagigi washina xawijojaija.

⁴⁰ Egi horniheishashana minag‐hirena hogihisha‐shana egi kerepanasaja‐shana.

⁴¹ Egi jaja waisgab‐horokin sajanka warusgi egi ho nuphahanka, wangeja horuxujshana, egi wainabshana egi horokina warujhena, egi wironag warnira wawogarna, joweja wagishuirekjege, egi ho nuphahanka harnaj hikiweninena.

⁴² Egi harnaj waruj‐hirena, egi wainaj‐hirena.

⁴³ Egi hoxjugra egi hora napara kerepanaishanaganuphashana stohirena.

⁴⁴ Egi jarnaga horokin rujga ejaxji wangra hogihixete sajanguni.

⁴⁵ Egi higuana wironag warnira waraxurug‐shana wajeja hominag‐hirekjege egi ageja joweja howakere washina Bethsaida‐eja, wankshignanka kerewagigi‐janegi.

⁴⁶ Egi jaja kerewagigigi xexeteisha eja hotina gikaraj.

⁴⁷ Egi jaja hoxjarna hakirigi wajra tenajeja unakshana egi inekhi moroija unjena.

⁴⁸ Egi wajarna niwara uxjinagra, mahaxji unanka. Egi haheregi wirakara hijobeja eowakerena, teja hihagra hamani egi wawaixa‐kjanihau herena.

⁴⁹ Eshi jaja tejara hamanianku hajairegi, naxirag hisha hereguni hirairena, egi uwainena.

⁵⁰ Harnaj hajairegi, egi naxirairena, egi higuana wawokit’ena egi wawagena: Wanaishguni hajane, newinena, inke naxirawinine.

⁵¹ Egi wirakirina wajeja howakiri gugi egi maintajehira rushjana. Egi khorera rokana hirena inke horag phini, egi xix‐hirena.

⁵² Waisgab horokinanka hawau inke washara hisha hiperes‐hiranina, najge warninera shjainege esge.

⁵³ Egi jaja harujairegi, Genesareth mainja hahirena egi hauninena.

⁵⁴ Egi jaja wajeja hihinabhiregi higuana higirena.

⁵⁵ Egi ma‐she‐e hogigix harnaj hornuwang‐hirena, egi howasha hiregi homig hotumb warni‐hajiarairena, hajinja unje naxguinegi eja.

⁵⁶ Egi higu‐hajinja hokewega jhinag‐xununigeja, shige jhinageja, shige hojainainja higa, howashara nagueja watumb‐hiranaga, egi gitairena hikioirekjege higu wainiugnig harniejashana, egi jarnaga hikiogi rushjawahirena.