Markga 5 - Winnebego Bible Portions 1907

¹ Egi teageja hahirena Gadarera ma harnineja hahirena.

² Egi jaja wajeja hihinab hiregi, higuana wang hisha naxirag shishig hisha harni warnaxi homigeja howaji hikiparna.

³ E warnaxi homig horogeja jhijena, egi hinkisha rusgij ruxurugnina, inkaa, inke mas‐hokiwaxuxug hirusgij phinina.

⁴ Mas‐wirusgij egi mas‐hokiwaxuxug hirusgij‐kairege egi mas‐hokiwaxuxugra waiwaxshununa egi mas‐wirusgijra waishishish, hinkisha waphi hiruxurugnina.

⁵ Egi hoishib hahega egi hambga xexeteja egi warnaxi homigeja uniheshununa, uwanaga egi ini hirokijianaga khikunugshununa.

⁶ Eshi jaja Jesus hari hajagi nuwanganaga egi gikarajshana.

⁷ Egi mashja uwana egi wena: Jagu ningiu hajeshe, Jesus Maura eshana xetenagra Hinigra neninegaja? Wihohire Maura jowehieja, inke hawe‐hinanikjege.

⁸ Wangjega eja hihinabre naxirag shishigranina hihege esge.

⁹ Egi Jesus higiwaxshana, rashra jagu hinigaireshe? Egi horniharna, wena: Rashra Legion hingairena, woirohawige esge.

¹⁰ Egi gitara rokana wena: Inke ma‐sheja hijahi howahasnikjege.

¹¹ Egi xexetenanki hiwusunsheja xguxguishe hornihe xeteisha wakanankshana.

¹² Egi waxopinishishig‐nanka harnaj gitairena, wairena: Xguxgushenanka eja howare‐hingigiwire, xguxgusheja wakewekjawina.

¹³ Egi higuana Jesus wagiuna. Egi naxirag shishignanka hihinab‐hirena, egi xguxguisheja hokawairena. Egi xguxguishe horniheaka hiranukanageja nuwangra rokana wauinena tejainja howahiarairena egi nieja d’airena (ejaxji hogihixete nupguni).

¹⁴ Egi wirakaranankhi gias‐hirena, egi jhinageja hagi horaghirena egi hojainainja. Egi hihinabhirena jagu uinegi hajarairena.

¹⁵ Egi Jesus hirajirena, egi waxopinishishig harniranihera hajairena, minaganagshana egi waini‐un, egi wanaina wogisog, wankshig she‐e e legion harniranihera, egi nakawairena.

¹⁶ Egi jarnaga hajagi, horaghirena wankshig waxopinishishig harnirajega jasgegigira egi shige xguxguishenanka jasgewagigira.

¹⁷ Egi gita hajiarairena ma‐hiwusunsh harnineja nige howakereshirena.

¹⁸ Egi jaja wajeja hoikewegi, hisha waxopinishishig harniranihera gitarna hakishu unjekjege.

¹⁹ Eshi Jesus inke giunina, eshi wagena: Hijakorowaraija howakarare, egi Hirukanara washa rokanaisha ningiuna horagaje, egi najhonigijara.

²⁰ Egi nigeowarena egi jhinagra kerepanaishara wogiragshana, washa rokanaxji Jesus giuna, egi harnaj khorairena.

²¹ Egi jaja Jesus shige wajowe ageja gigi, wankshigra rokana hirahina, egi tehijejeja unjena.

²² Egi horuxujre, wohokhu‐hojhi hirukanaisha jina, Jairus higairera egi jaja hajagi si‐hieja jimpshana.

²³ Egi gitara rokana wena: hinugha xununigra d’e hikorohorna, huarnaga egi hikiore, e rushjankjena, egi niambhikjena.

²⁴ Egi Jesus hakishu kerena, egi wankshigra roha hironaghirena, egi hiranassunsh‐hirena.

²⁵ Egi hinugisha ma kerepanaishanaga‐nuphashana wai‐xuna.

²⁶ Egi makanira roha washara roha hirawe‐hirena, egi washa harnigi harnaj shena‐hina, egi inkaga hirohegnina, eshi hiraijera wakinina.

²⁷ Jaja hinugjega Jesus naxgungi woroha horogeja hageja howajianaga egi wainira higikiorna.

²⁸ Wakigena: Wonashi harnira hiagikio duxurugkhi, hirushja‐shgunina.

²⁹ Egi higuana hinugjega mai wai harnira wussana, egi ro earnira hikaraperes‐shana howasha she‐e rushjana.

³⁰ Egi Jesus higuana hikiperes‐shana homashjara higihinabge, worohainja hapahi‐nashianaga, egi wena: Peshe wonashi harnira hingikioshe?

³¹ Egi hironag warnira wagairena: Washjarajegaja worohangre hiranani‐kissunshnangra egi washena, peshe hinkioshe?

³² Egi hogigix horuxujshana, hinug washa de‐e una hajakjege.

³³ Eshi hinugra naxirena egi gissasana, jagu giuinera hikiperesge, hiarnaga egi jowehieja himpshana, egi wogisogji harnaj hogiragshana.

³⁴ Egi wagena: Hinughaxji, harnaxgu hashinira rushjanina, wanaishguni karare egi howasha hashinira rushjane.

³⁵ Egi hit’at’ajau wohokhuhojhi hirukanajega hojhieja hisha howajina e wena: Hinugraga d’ena, jagu‐u Hirukanara hiraijera hoishanakjeshe?

³⁶ Higu Jesus hit’at’arnaka hoit’e she‐e naxgungi wohokhuhojhi hirukanajega wagena: Inke naxiranine, harnaxgurashana une.

³⁷ Egi hinkisha hironag‐hirekhinina Peter egi Jakob egi Jakob khinubra Johnga eshana hironag‐hirekhina.

³⁸ Egi wohokhu‐hojhi hirukanajega hojhieja hina, egi woxehi hajarna, egi xagnanka egi gixagra rokanawarnaukshana.

³⁹ Egi jaja hijokewegi, wawagena: Jagu‐ungaja woxerawishe, egi raxagwishe? Hinugnigra inke d’arniankshana, eshi na‐nankshana.

⁴⁰ Egi waixjairena igixja. Eshi jaja harnaj hihinabwagigigi hinugniganka hianjra egi hiunira warussana egi wakishu higa egi hinugniganka hajinja mingankhi eja hokawairena.

⁴¹ Egi hinugniganka nabeja harukos‐shana, egi wagena: Talitha kumi, hinigena, nashine.

⁴² Egi higuana hinuginiganka kikawa‐ana, egi manine, ma kerepanaishanaga‐nuphashanaisha herena, egi khorera rokanaxji hirena.

⁴³ Egi harojaxji roxina, inke hisha hiperes‐nikjege, egi washa ruj hoku washina.