Markga 15 - Winnebego Bible Portions 1907

¹ Egi haininegi higuana nabhoruxaj hirukana hungra, xetera egi wowagax‐hiperesra egi waehira harnaj wakishu haehirena, egi Jesus rusgij‐hirena, egi nige harniowarairena, egi Pilatus hagarniahirena.

² Egi Pilatus higiwaxshana: Judra hung harninera nenineshe? Egi hornigihashguni, wagena: Hisharajane shesgajena.

³ Egi nabhoruxaj hirukana hungra washara rohaxji hiraraj‐hiranunige, eshi Jesus inke xabnina.

⁴ Egi Pilatus shige higiwaxshana, wena: Inke raxabnishe? Horuxujre washara jarnaga hiranirajnagre.

⁵ Eshi Jesus higu inke xabnijena. Pilatus ereshge khorena.

⁶ Egi worujxete de‐e eja Pilatus hornassairera hisha wagirushja‐rehinana, hajanjega giphinegi.

⁷ Egi hisha hijarnakshana Barabbas higairera, e wakishu rusgijnankshana jarnaga wankshig rupuru hiregi wakishu hijarnakshana, e wankshig d’ehira, wankshig rupuruirega eja.

⁸ Egi worohanka mashja uwa‐hajiarairena gitairena, jasge houna his’agi, shesge wagigikjege.

⁹ Egi Pilatus wornigiharna wena: Judra hung harninera ningitushja‐rehawigi raiphiwinashe?

¹⁰ Hiperesjena, nabhoruxaj hirukana hungra rushjanehirega kiwassa wauinera.

¹¹ Eshi nabhoruxaj hirukana hungra wankshigra waraxurughirena, Barabbas e hiragijerairege girushjare‐hirekjawi airena.

¹² Egi Pilatus horniharna egi shige wawagena: Jagu hagiungi raiphiwinashe Judra hung harnine hiragawira?

¹³ Egi shige uwainena: Naramiheja haisarajre.

¹⁴ Egi Pilatus wawagena: Jagu wowong hisha ungaja? Egi hiraijera mashja uwainena, naramiheja haisarajre.

¹⁵ Egi Pilatus wankshigra giphi‐wahinaina, Barabbas wagirushjarehina, egi Jesus rushjarehina naramiheja haisaraj‐hirekjege, jaja washa pahi higipsinsh rushjainegi.

¹⁶ Egi manapenanka jhi‐hoxorojhikeja harniokawairena Praetorium higairera eja egi manape hornihera harnaj eja wagigoirena.

¹⁷ Egi waini shuj hornashi‐gigirena egi napahi hirakiweja hiranaga hungwokanag hisha uinena, egi nassueja hagikanaghirena.

¹⁸ Egi hikaragi hajiarairena: Hinikaragiwina, Judra hung harninera.

¹⁹ Egi raxgeisha nassueja hiroji‐hirena, egi hashoirena, egi jowehieja huporo‐himinahirena egi gikaraj‐hirena.

²⁰ Egi jaja igixja rushjainegi, waini shujra girushorojhirena egi waini ewarnira wogiwaxug‐hirena, egi harniarairena naramiheja haisaraj‐hirekjege.

²¹ Egi hisha Simon higairegi Kirena eja hereisha ehowegi, hojainainja howajina, e Aleksander egi Rufus hianjhirera herena, e hiniharni‐narnaga naramihera gik’ingigirena.

²² Egi ma Golgotha‐eja harnihahirena, wankshig‐pahushereg hominagra hiroragra wagairena.

²³ Egi nishuj mirrh hirokishu rajgankje hokuinena, eshi inke rajganina.

²⁴ Egi jaja naramiheja haisaraj rushjainegi, waini warnira khiruje wakhinena, egi hushereg gishox kikiuinena, jagura hishashana harninekjanegi.

²⁵ Egi howagix hidani‐hangaja wauinena naramiheja haisaraj hirega.

²⁶ Egi hihageja wagaxhirena jagu hiraraj‐hirera, Judra hung harninera.

²⁷ Egi wamanukera nupiwi hakishu naramiheja haisaraj‐hirena, hisha hoishorohieja nankshana egi hijanera hoirajgehieja nankshana.

²⁸ Egi wowagaxra exji herena, e wagra: Wigishana gikarab‐hirena.

²⁹ Egi jarnaga hija‐howegi washingagairena, para hirunanahirena egi wairena: Haha nenineshe, wohokhuhojhixetera maisinsh‐ranaga egi hambra danihangi shige sh’u‐shurushjaneshe hishera.

³⁰ Niambkhine, naramiheja d’ambre.

³¹ Egi hishge nabhoruxaj hirukana hungra, wowagax‐hiperesra wakishu wakigairena: Hijanera niamb‐wahianaga exji inke niamb‐khi ruxurugnina.

³² Kristus Israel hung harninera heregi shegunegi naramiheja d’ambikjena, hajawigi egi harnaxgunkjawina. Egi wakishu naramiheja haisaraj‐hirera washingagairena.

³³ Egi jaja howagix hirakewehara jigi managre harnaj hokawassana howagix hishanki‐jushguni hainja hipa.

³⁴ Egi howagix hishanki‐jushguni hainja Jesus mashja uwana, wena: Eloi, Eloi, Lamma Sabaxthani? Deshesge hiroragra wagairena: Mau‐harnixji, Mau‐harnixji, jagu‐u hinat’u‐shereshe?

³⁵ Egi hota eja nashinankhi, jaja she‐e naxguinegi, wairena: Horuxujwire, Elias gigornakshana.

³⁶ Egi hisha nuwangarnaga egi sponsh‐hisha ninashra hoixji hoshu‐arnaga egi raxgeja hakanag‐anaga egi rajgangigina, wena: Shegunag‐hire, hajakjawina Elias jiarnaga egi rushibgi.

³⁷ Egi Jesus mashja uwana, egi d’ena.

³⁸ Egi wohokhu‐hojhixeteja hagijara nubihi hogasrerana, wangeja hugi mainja hipa.

³⁹ Egi jaja manape hungjega, e jowehieja nashinjegi, hajarna Jesus uwangi egi d’ena, wena: Hisgexji wang de‐e Maura Hinigra heregaja.

⁴⁰ Egi eja hinugra hishge hari horuxuj‐nankshana, horogeja de‐e hijarnankshana Maria Magdalena, egi Jakob xunura egi Joses hiunihirera Maria, egi Salome.

⁴¹ De‐e jaja Galilea eja unjanegi hironaghirena egi wagirairena, egi hinug hijanera roha, hakishu hajirena Jerusalem eja hakishu hajirena.

⁴² Egi jaja hoxjarna hakirigi, hoikorohora hambeja hereake, Sabath‐hambra hambisha hotake.

⁴³ Esge Joseph Arimathea‐eja herera waehi gishag hireisha, e hishge Maura hungma harnira hapejegi, jiarnaga egi hiwanuxshagi Pilatus hirahina egi Jesus ro‐harnira tarna.

⁴⁴ Egi Pilatus khorena, Jesus d’aginigi, egi manape hungra gigoarnaga higiwaxshana, s’ireja‐nisge d’eshe?

⁴⁵ Egi jaja manape hungjega eja howahi hiperesgi, Joseph rora hok’una.

⁴⁶ Egi Joseph linen phixji ruwianaga, egi rushibshana, egi linen she‐e hirowejana, egi wanaxi‐hoshuisha eja hot’umbshana, e inieja k’airesha herena, egi wanaxi‐hoshu she‐e jhirobeja ini‐hisha hawanana.

⁴⁷ Egi Maria Magdalena egi Joses hiunira Maria hajairena, hajinja t’umbhirera.