Markga 14 - Winnebego Bible Portions 1907

¹ Hambra nupahanaga hageja Pasxa worujra hereanaga egi waisgab winawohi rokanira herena. Egi nabhoruxaj‐hirukana hungra egi wowagax‐hiperesra jasge‐hiranaga washokit’une hiranaga rus‐hiranagi horninena egi d’ehiranagi.

² Egi wairena: Inke woruj hambeja herenikjena inke wankshigra hiwarupuru‐nikjawige.

³ Egi Bethania eja unakshana Simon Leper‐unga hojhieja, warujeja minaganak’u, hinugisha jina Alabaster kog‐hisha harni Nard hoshu wikinipana phixji egi jexihirena. Egi kogra gixuxshana egi Jesus nassueja hawaxuinena.

⁴ Egi hota hijarnankhi inke giphini‐hirena egi wairena: Jagu‐u wikinipana phi de‐e hoinige xawarnihishe?

⁵ Denaria hogihi‐danira hiraijera hiruwinana, egi wanajojaisgeja wogarnana. Egi hinugananka haehirena.

⁶ Egi Jesus wena: Shegu unaghiwire jagu‐u najgewojirawishe? Wore phi hingiu waunakaja.

⁷ Wanajojaisgera hoishib warakishu sh’unkjanihawina, egi higu jajana raipiwingi washophi waragish’unkjawina. Eshi Ne inke hoishib hinakishu sh’unikjanihawina.

⁸ Hinug‐nagre jasge hiruxurugra unakshana. Hinug‐nagre jorni ro‐harnira wikini hingiwaxu jina hixairekjanera wagiu.

⁹ Hisgexjina hinigawina, higu hajinja managre harnaj woragphi de‐e wihokhuinegi, hinug de‐e jagu une hishge horag‐hiranaga wewi‐ranihekjanena.

¹⁰ Egi Judas Iskariot, nup‐hashanara hisha herera, nabhoruxaj‐hirukana hung‐eja howarena, wawimangiraikjege.

¹¹ Egi jaja naxguinegi giphinena, egi shura hokuinekje mangiraj‐hirena. Egi jasge‐hianaga himanagra houngiphinagi hornijirena.

¹² Egi waisgab winawohi rokani hamb‐jornineja, eja Pasxara d’ehirena, wironag warnira wagairena: Hajinja howare roiragiguwishe hirushjahi, Pasxara raijanegi.

¹³ Egi wironag warnira nupiwi regigina, egi wawagena: Jhinagregi howarawire, egi eja wang‐hisha harnikihikjanihawina, rexoro rex‐hisha ni hoshu ruankhi, hironag‐wiaje.

¹⁴ Egi higu hajinja hokewegi, jhi hirukanara wagawiaje, Hirukanara wena: Hajinja jhi‐worujra hereshe, eja wironag warnira wakarakishu Pasxara haijawina?

¹⁵ Egi jhiwang xeteisha womishhire egi hirushja himanigiraikjanihawina, eja hingi‐korohowiaje.

¹⁶ Egi wironag warnira harairena, egi jhinageja hahirena, egi jagu era shesge hierena. Egi Pasxara hirushjahirena.

¹⁷ Egi hoxjarnagi nuphashanara wakarakishu hina.

¹⁸ Egi minaghiranaga egi waruj‐nank’u, Jesus wena: Hisgexjina hinigawina, waruj hinakishu sh’u‐hashanagwire hisha himaisharaikjanihawina.

¹⁹ Egi najgerateg hajiarairena, egi hinikehishana wagairena: Newineshe? Egi hijanera wena: Newineshe?

²⁰ Egi horniharna egi wawagena: Nup‐hashanara hisha herena wasgeja hiroshu hakishu haungi.

²¹ Jasgegi Wankshig‐hinigra wowagax‐eja jasge wagaxhirera eowakshana, eshi hawekjanena wang‐jagura hisha Wankshig‐hinigra himanakhi, wang she‐e phi howarnana inkaga wankshig‐iningishi.

²² Egi warujnank’u Jesus waisgabduj russana egi wainabshana egi rujhena egi wironagnanka wawogarna egi wena: Ruswianaga egi rujwire, de‐e ro‐harnira herena.

²³ Egi ni‐wirajgara russana egi jaja wainab‐rashjangi wawogarna, egi harnaj rajgairena.

²⁴ Egi wawagena: De‐e wai‐harnira herena Testament jeg hauna. E roha xu‐wagigirena.

²⁵ Hisgexjina hinigawina, inke shige habsinsh‐hueja hasni dajganikjanena hamb‐eja epa shige jeg dajgankjanena Maura hung‐ma harnieja.

²⁶ Egi jaja nawa rashjainegi, Oliw‐xeja howarairena.

²⁷ Egi Jesus wawagena: Hahe de‐e harnaj watoiragixi‐kjanihawina, deshesge wagaxankshana: Jhasga hirakarara wajinkjanena, egi jhasga hornihera mokhiekja nena.

²⁸ Eshi hakikawa‐anaga hageja Galilea mowagaxeja jornigini hagikjanihawina.

²⁹ Eshi Peter wagena: Harnaj watornigixi hireshge inkaga watoaxinikjanena.

³⁰ Egi Jesus wagena: Hisgexjina hinigena, hamb, de‐e hahe de‐e, kheni bagawaxge‐wangra nupaha xagni daniha khiba hinakhinkjanena.

³¹ Eshi Peter mashja hiraijera wena: Harnikishu jekjanegi, inke washara hisha hawau khibani‐kinikjanena. Hishge wironag hijanenanka harnaj shesge airena.

³² Egi max‐hisha Gethsemane higairegi eja hahirena, egi wironag warnira wawagena: Eegi minagwire, hagikaraj hikjanihare.

³³ Egi Peter egi Jakob egi Johnga wakishu rena, egi Jesus naxirera rokana jirena egi warnaira mashja hirawassunsh‐shana.

³⁴ Egi wawagena: Naxirag harnira najgetegra rokanana jowe d’ewinana, eegi hiwushawire egi hikhianagwire.

³⁵ Egi jowexjinig hiraijera jowera howarena, egi mainja himpshana, egi gikarajshana, ruxurug‐phingi howagix de‐e hinxagjena.

³⁶ Egi wena: Abba, Jaji washara harnaj shuruxurugshanakaja, niwirajga de‐e hingirusre, egi inke jagu haiphingi eshi jagu Ne raiphingi herekjanena.

³⁷ Egi kirina egi nanank’u wiena, egi Peter wagena: Simon ranashanakshe? Inke howagix hisha hikhi shuruxurugnishe?

³⁸ Hikhiwine egi gikarajwire, nigete washa woishana u wahieja horakit’u‐sharawiege. Naxiragra hisgexji giphinang‐nunige eshi rora inke mashjanina.

³⁹ Egi shige rena egi gikarajshana egi shige hoit’era e waena.

⁴⁰ Egi jaja shige kirigi, shige nanank’u wiena hishjasu warninera shjuwara hoixjinanke, egi inke hiperes‐hiranina jagu higairekjera.

⁴¹ Egi hidanihana kirina egi wawagena: Nawinane, egi xgasigiwire. Sheguna, howagixra jina, horuxujwire Wankshig‐hinigra washa woishana ura nab‐warnieja horushjarehirena.

⁴² Nashiwine, hinekjawina, horuxujwire hiwusunshjiginina himainaikjanera.

⁴³ Egi hit’at’ajau higuana Judas jina nup‐hashanara hisha herena egi hornihe xetexji hakishu, wigijgux egi wiwapox harni, nabhoruxaj hirukana hungeja egi wowagax‐hipereseja egi xeteja howajirena.

⁴⁴ Egi hisha himanaikjanera wijanti wagiungi wena: Hisha iwakhiwankjanera erena, ruswiaje egi shja harukos harnikarawiaje.

⁴⁵ Egi higu jigi, higuana hirajina, egi wena: Hirukanara, Hirukanara, egi iokiwankshana.

⁴⁶ Egi harukos‐hiranaga egi rus‐hirena.

⁴⁷ Egi hisha hiwusunsh nashi‐jegi wigijgux hisha rushorojshana egi nabhoruxaj hirukana hungra ware harnira hojina, egi najawara gixgurna.

⁴⁸ Egi Jesus horniharna egi wawagena: Wamanuke hiraji hinagish’uwishe, wigijgux egi wiwapox hashini rajiwi hishgurajiwigi?

⁴⁹ Hambga harnikishu hauanjena wohokhu‐hojhixeteja washa ningiguswi egi inke hinshurukos‐winina. Eshi jasgegi wowagaxra exji herekjanena.

⁵⁰ Egi harnaj d’unairena egi gias‐hirena.

⁵¹ Egi wang hojinjisha hironagshana linen waini hirokikewejana nanokajege, egi wang hojinjisha harukoshirena,

⁵² Egi linen wainira d’unena egi nanoka wagigiasshana.

⁵³ Egi Jesus nabhoruxaj hirukana hung‐eja howe‐harniakarairena. Egi e nabhoruxaj hirukana hungra harnaj sto wakishu una egi xetera egi wowagax‐hiperesra.

⁵⁴ Egi Peter hari hironagshana, nabhoruxaj hungra jhixete harnieja hokewena. Egi warera wakishu minagshana, egi pejeja tashjuj khina.

⁵⁵ Egi nabhoruxaj hirukana hungra egi waehira wihohi horninena Jesus hiraki‐rairanaga d’ehirekjege, egi inke hisha hieranina.

⁵⁶ Egi woroha washa woretungra airena Jesus hakira, eshi jagu airega inke hakishjeg‐hiranina.

⁵⁷ Egi hota nashinena egi washa woretunk higairena, wairena:

⁵⁸ Naxguwina, wena, wohokhu‐hojhi de‐e maisinshhakjanena, nab‐hiuranagre, hambra danihangi hijanera inke nab‐hiuranira hisha haunana.

⁵⁹ Eshi jagu airera shige inke hikisge hiranina.

⁶⁰ Egi nabhoruxaj hirukana hungra horogeja nashinjirena, egi Jesus higiwaxshana wena: Inke waragi‐xabnishe? De‐e jagu hinigarnagre.

⁶¹ Eshi Jesus inke xabnina. Nabhoruxaj hirukana hungra shige higiwaxshana egi wagena: Jasge Kristus nenineshe, Rajanghirera hinigra nenineshe?

⁶² Egi Jesus wena: Newinena, egi Wankshig‐hinigra hashjakjanihawina homashjara hoishoro‐hieja minagnaikjanena egi wangregi maxiwieja jikjanena hashjakjanihawina.

⁶³ Esge nabhoruxaj hirukana hungjega wainira kurugasshana egi wena: Jagu‐u hijaira wihohi hiunkjawishe?

⁶⁴ Maura raxjashgunira hinaxguwingaja. Jagu hirarawishe? Egi harnaj wairena: D’ehire phingaja.

⁶⁵ Egi hota hasho hajiarairena egi hishjara hagirukainena egi nab‐hirojinena egi wagairena: Prophetre. Egi warera nab‐ruparas hirojinena.

⁶⁶ Egi Peter jhi‐xetenaka khuhainja unjau nabhoruxaj hirukana hungra hinug‐ware harnira eja hirahina.

⁶⁷ Egi jaja hinugjega Peter tashjuj‐khinjau hajagi, horuxuj‐shana egi wena: Nishge ne Jesus Nasareth‐eja herera harakishu‐shuna.

⁶⁸ Eshi khibakhina, wena: Inke hiaperesnina egi shige inke nanixgunina jagu hishare. Egi jang jhi‐oxorojhikeja higaja egi bagawaxge‐wangra xagshana.

⁶⁹ Egi shige hinughisha hajarna, egi hijarnashinankhi wawagajirena: De‐e hisha herejena.

⁷⁰ Egi shige khibakhina. Egi jowexjinig hageja hijarnashinankhi shige Peter wagairena: Hisgexji ne hisha ninegaja, Galilea ranina egi hoit’e hashinira wirakisgerajena.

⁷¹ Eshi washoshishig howe rokigujirena egi wihohina, wena: Wang waragarajane inke hiaperesnina.

⁷² Egi bagawaxge‐wangra hinupahana xagshana. Egi Peter hiperesjijena Jesus hoit’e jagu higarnihera: Kheni bagaxge‐wangra nupaha xagni, daniha khibaina‐khinkjanena. Egi jaja she‐e wewingi xagshana.