Markga 11 - Winnebego Bible Portions 1907

¹ Egi jaja Bethphage egi Bethania Oliw xeja hahiregi Jerusalem hiwusunsh, hironag warnira nupiwi regigina.

² Egi wawagena: Jhinag joweregi howarawire, egi higu horakawawigi harexirig‐isha rusgij‐jau hishekjanihawina, inkaga wankshig haminag hiranisha, rushgawianaga harni‐kiriwiaje.

³ Egi wankshigrisha jagu‐u de‐e wash’uwishe hinigawigi, wawiaje, Hirukanara hiunkjanege. Egi higuana hugigikjanena.

⁴ Egi harairena, egi harexirigra rusgij‐jau hierena jhirob jangeja, nagueja egi girushgairena.

⁵ Egi hota eja nashinankhi wawagairena: Jagu‐u wash’uwishe, harexirigra ragishurushgawire?

⁶ Egi Jesus e u‐washige wauineshe wawigairena, egi kerewagigirena.

⁷ Egi harexirigra Jesus hagarni‐hagirena, egi waini warninera hija washuirena egi haminakshana.

⁸ Egi roha waini warninera nagueja womish‐hirena. Egi hijanera na‐akarajge majgis‐hiranaga egi nagueja horuerena.

⁹ Egi jarnaga jornigi egi jarnaga hironag‐hiregi uwanankshana, wairena: Hosanna, rajankwire Hirukanara rash harnira harnijina.

¹⁰ Rajankwire hung‐ma Dawid hianj‐hihiwira harnira Hirukanara rash harnira harnijina. Hosanna wangregi herera hirekjanena.

¹¹ Egi Jesus Jerusalem‐eja hokewena egi wohokhu‐hojhixeteja hokewena, egi jaja washara harnaj woruxuj rushjangaja, egi hoxjarna hakirina, hihinabanaga Bethania‐eja gina nuphashanara wakarakishu.

¹² Egi haininegi jaja Bethania‐eja hahuiregi dokewehina.

¹³ Egi Fig‐naisha ab‐hirassa hari‐jau hajarna, hijowarena, washa hija hiege. Egi jaja hirahigaja inke washa hienina, eshi ab‐rashanajena. Fig‐has haminagra kheni herenige.

¹⁴ Egi Jesus horniharna egi najega wagena: Inkisha has ningiruj‐nikjanena epa manegus. Egi wironag warnira naxguinena.

¹⁵ Egi Jerusalem eja hahirena. Egi Jesus wohokhu‐hojhixeteja hokewena, egi wohokhu‐hojhixeteja washa wiruwinankhi egi waruwinankhi jangra wowahas‐shana egi shura hoikiruja warujra wawakana egi rujgesga wiruwi waminag‐nankhi.

¹⁶ Egi inkisha wohokhu‐hojhixeteja woshura hisha rua howe wagiginina.

¹⁷ Egi washa wagigus‐shana, wawagena: Jasge inke wagaxniankshe: Wa‐jhira wankshig hokirajra harnaj gikaraj hojhira higairekjanena? De‐eshi wamanuke hojhi sh’uwina.

¹⁸ Egi wowagax‐hiperesra egi nabhoruxaj hirukana hungra naxguinena, egi jasgehiranaga d’ehiranagi horninena. Nakawairena, wankshigra harnaj wogus earnira gixixhirege esge.

¹⁹ Egi jaja hoxjarna hakirigi jhinageja hihinabshana.

²⁰ Egi haininegi e howairegi Fig‐nara rejura hipa wusjau hajairena.

²¹ Egi Peter hiperessana, wagena: Hirukanara horuxujre, Fig‐nara washoshishig hiragera, wus‐jena.

²² Egi Jesus horniharna wawagena: Maura harnaxguwine.

²³ Hisgexjina hinigawina, higu peshe xe de‐e wagarnana, gixanage egi teja hosheweja hokit’unare, egi najge hashinira inke wakhibahinigi, eshi harnaxgugi washa jagu ega shesgarnana, higu jagu eegi giuinarnana.

²⁴ Esge wanigawina: Jagura hisha roraguwigi jaja ragikarajwigi ne harnanaxguwingi washurus‐winana, egi newashiniwinana.

²⁵ Egi jaja gikaraj nanashiwigi, wagit’unawiaje, ne hisha harakishararajegi, Hianjrawiga wangreginagre hishge washa woishanara warnigit’unekjanihawina.

²⁶ Eshi inke waragit’usharawinigi hishge wangregi Hianjrawiga‐nagre washa woishana washiniwira inke warnigit’uranikjanihawina.

²⁷ Egi shige Jerusalem‐eja hajirena, egi wohokhu‐hojhixeteja manijau, nabhoruxaj hirukana hungra hirajirena egi wowagax‐hiperesra egi xetera hirajirena.

²⁸ Egi wagairena: Homashja jaguisha hiu washa de‐e wash’ushe, egi peshe homashja de‐e hornik’uanaga washa de‐e sh’ushe?

²⁹ Egi Jesus horniharna egi wawagena: Washara hishankira hinigipaix‐janihawina, egi horningi‐hawiaje, egi hornigi‐taikjawina homashja jaguisha hiu washa de‐e haura.

³⁰ Johnga ni‐wawaxu harnira, jasge wangregi howajishe, nigeshge wankshigregi, horningihawire.

³¹ Egi hokikit’airena wairena: Wangregi howajina hiawigi, wekjanena: Jagu‐u inke harnanaxguwinishe?

³² Eshi wankshigregi howajina hiawigi, wankshigra hiwarnakawa‐wigaja, wankshigra harnaj Johnga prophet wogisog hiranainegaja.

³³ Egi hornihairena egi Jesus wagairena: Inke horag duxurugwinina. Egi Jesus wawornigiharna, nishge inke hornigitagwinina homashja jaguishe hiu washa de‐e haura.