Markga 1 - Winnebego Bible Portions 1907

¹ De‐e jeghojikerera herena woragphi Jesus Kristus harnira, Maura Hinigra.

² De‐shesge prophetra wagaxhirena: Horuxujre, worag harnira hishja joweraija howarehagigina, e joweraija nagura hirushjaningigikjege.

³ Hora jantinjena hisha mojainainja wahokhura. Hirukanara nagu harnira hirushjangigiwire egi mowe nagura roja‐gigiwire.

⁴ Johnga mojainainja niwawaxunjena, niwawaxu wihokhujena najgera‐karateghiregi washa woishanara wagit’unainekjanena.

⁵ Egi Judea mowagaxeja herera egi Jerusalem eja herera harnaj hirajirena. Egi harnaj niwawaxu‐hirena Jordan ni‐eja, washa woishanara wokaraghirege.

⁶ Egi Johnga washa huxashog‐hin wornashi‐isha hornashina egi waxui‐pirag hisha hipiragshana, egi sasajge rujshana egi hesig‐danishu hojainainja here.

⁷ Egi wahokhuna, wena: Hisha hiraijera mashjaisha hiroinag jikjanena, E waguje‐sika harnira inke pakhuanaga girushge hiakisgarnina.

⁸ Hisgexji ni wagiu hajena harnipaxu hajane, eshi E Naxirag Wakanjangra harniwaxu‐kjanihawina.

⁹ Egi hambanaka eja wauna, Jesus Nasaretheja howajina Galilea mowagaxeja, egi ni hawaxuinena Jordaneja Johnga wauna.

¹⁰ Egi higuana nieja anjinakshana wangregi ruhas‐hire hajarna egi Naxiragra rujgesga hikisge harnukanag hurna egi hasherena.

¹¹ Egi wangregi hora howajina wena: Neninena Hinignira wornigixetera E haiphixji‐shununa.

¹² Egi higuana Naxiragra wauna mojainainja howahas‐shana.

¹³ Egi mojainainja hambra kerepana‐jopaha una, egi Satan hiunjaire egi wanoijge hojaina horaje hakishu una, egi waxopiniwarajhirera harniuinena.

¹⁴ Egi hageja Johnga jhi‐hornassairena Jesus Galilea‐eja kirina, Maura hungma woragphi harnira wihokhunjena.

¹⁵ Egi wena: Hereginina egi Maura hungma harnira hiwusunsh jina, najgera‐karategwire, egi woragphira harnaxguwine.

¹⁶ Egi Galilea t’e hijejeja howe‐manianku Simon hajarna egi e khinubra Andreas, hoigixera teja hot’unanankshana, hoikishere waunanke.

¹⁷ Egi Jesus wawagena: Hiroinagwire, egi wankshig hikishere niunkjanihawina.

¹⁸ Egi higuana hoigixe warninera wat’unairena egi hironag‐hirena.

¹⁹ Egi jaja jowexjinig hiraijera howaregaja, Sebedai hinigra Jakobga hajarna egi e khinubra Johnga, e hishge wajeja hoigixe warninera wakurujag‐nankshana.

²⁰ Egi higuana wagigorna egi hianjhirera Sebedai t’unairena wajeja wang warera wakarakishu egi hironag‐hirena.

²¹ Egi Kapernaumeja hokawairena, egi higuana Sabath hambgi wohokhu‐hojhieja hokewena egi washa wagigusshana.

²² Egi wogus harnira gixixhirena washa wagigusra hisha homashja harni hikisgewena, egi inke wowagax‐hiperes hikisgarnina.

²³ Egi wohokhu‐hojhieja wangisha jena naxirag‐shishig hisha harnijena, egi uwana,

²⁴ Wena: Shegu unjewiwine, jagu ningiuhajeshe, Jesus Nasaretheja ninegaja? Maisinsh hinarajiwishe? Hiniperes‐shana peshe ninera Hishankira wakanjangra Maura eja howaji.

²⁵ Egi Jesus winakewehina, wena: Xapguni nashinge, egi eja hihinabre.

²⁶ Egi jaja naxirag shishigjega mainaje jirehigi, egi mashja uwana, eja hihinabshana.

²⁷ Egi harnaj khorairena, hikiwax‐hajiarairena, wairena: Jaguisha de‐e hereshe? Wogus jeg jaguisha de‐e hereshe? Homashja hiuanaga naxirag shishigra uwashira, egi giuinena.

²⁸ Egi higuana ma‐nanka harnaj hornaxgura hoerarena Galilea mara.

²⁹ Egi jaja wohokhu‐hojhieja hihinab‐hiregi, higuana Simon egi Andreas hojhireja hokawairena Jakob egi Johnga hakishu.

³⁰ Egi Simon hijawira hiunira rotakaj‐u howashakshana, egi higuana horaghirena.

³¹ Egi jiarnaga egi nabeja harukos‐shana egi nashingigina egi higuana rotakaj‐ura rushjana egi wawagirajirena.

³² Egi hoxjarnagi, jaja wira hiregi howashara harnaj wagarni hajirena, egi shige jarnaga waxopinishishig harninankhi.

³³ Egi jhinagananka harnaj jhirobeja stoirena.

³⁴ Egi howasha hokirajra roha rushjahina egi waxopinishishigra roha jangra howahas‐shana, egi waxopinishignanka inke hit’et’e wagiginina, hiperesnanke esge.

³⁵ Egi haininegi, kheni hamb‐wijejni, hihinabshana egi mojainainja howarena egi eja gikaraj‐shana.

³⁶ Egi Simon egi jarnaga wakishunankhi hagregi hironagharairena.

³⁷ Egi jaja hieregi, wagairena: Harnaj hornininankshana.

³⁸ Egi wawagena: Jhinag joweregi nagre eowainekjawina, e hishge wahowakunkjena, deshesge wagiu hajina.

³⁹ Egi wohokhu‐hojhi warnineja wahokhuna Galilea mowagaxra harnaj houna, egi waxopinishishigra jangra wowahas‐shana.

⁴⁰ Egi lepra hisha hirajina, gitarna egi huporo‐himingshana egi wagena: Hiraregi, rushjaina‐shgunina.

⁴¹ Egi Jesus najogijana, egi ara wajigre‐hianaga egi hikiorna egi wagena: Haunkjanena, ninushjankjena.

⁴² Egi higu hit’et’e rashjangi higuana lepra rushjana, egi sgeejijena.

⁴³ Egi harojaxji rogixina, egi higuana nigeowakeregigina.

⁴⁴ Egi wagena: Horuxujre hinkisha hogiragnianje, eshi karare, nabhoruxaj hirukanainja kikawahaje, egi nabruxajaje ninushjane Mosesga u‐washira hiu waworagisharag washunkjanena.

⁴⁵ Eshi ranaga egi horagra rokana wajirena egi washa de‐e hiraijera hornaehina, rokanawege, Jesus inke jhinageja harusharani hokewe ruxurugnina, eshi mojainainja unjena. Egi higu‐hajinja herera harnaj hiraji‐hirena.