Lukga 9 - Winnebego Bible Portions 1907

¹ Egi Jesus nuphashanara hironag warnira stowakaragina, egi homashja wogarna egi waxopinishishigra wirukana wagigina egi howashara rushjawahi wagigina.

² Egi Maura hungma harnira wihokhu rewagigina, egi howashara rushjawahi.

³ Egi Jesus wawagena: Hikiwarera inke washa harnirawinine. Inke hissagu, shige panra, shige waisgabdujra, shige shurara, shige wonashixetera nupshana harnirawinianje.

⁴ Egi jhi jagura eja hisha horakawawigi eja hiwushawiaje egi eja shige rawiaje.

⁵ Egi higu peshe inke hokewe‐ningigirawinigi, jaja jhinag eja hirahishanaib‐jawigi, majushishig si‐washiniwiejanankhi warnakara jowiaje, wihohira wakirakjanena.

⁶ Egi harairena, egi jhinagra wo’uanairena worag phira wihokhu egi higu hajinja howashairegi rushjawahirena.

⁷ Egi Herodes tetrarxga, washara jarnaga Jesus wagiunga harnaj naxguna, jagu ekjenisgena, hota wairena: Johnga d’arnanka eja howakiri niambshana airege esge.

⁸ Egi hota, Elias axebshana airena, egi hijanera, prophet shagisha shige niambshana.

⁹ Egi Herodes wena: Johnga para haiwaxra, eshi de‐e peshe hereshe washa de‐shesge naxgunagre? Egi haja roguxjina.

¹⁰ Egi Apostelra jaja hakja hagiregi, hogiraghirena harnaj jagu uinegi. Egi Jesus wakishurena egi inekhi mojainainja herena howarega, jhinagisha eja Bethsaida higairera.

¹¹ Egi wankshigra jaja hiperes‐hiregi, hironaghirena. Egi warussana, egi Maura hungma harnira wirokit’ena, egi howashara rushjawahina, jarnaga rushjangi phinagi.

¹² Egi jaja hoxjarnanegi, nup‐hashanara hajirena egi wagairena: Worohangre kerewagigire, e jhinageja howakarairekjena egi jhinag xununigeja hogigixangre, egi hornainja egi waruj kirus‐hirekjena, mojainanegi hiuanjege esge.

¹³ Eshi Jesus Wawagena: Ne waruj wogawire. Egi wairena: Waisgab‐horok’ina sajanaga egi hora nupiwi shegunkire harniwina. Eshi wankshig de‐e harnaj waruj wagiruwi regishana hereshgunina.

¹⁴ Ejaxji wangra hogihixete‐sajanguni. Egi hironaghirera wawagena: Minag wagigiwire kerepana‐sajashana stominag hirekjena.

¹⁵ Egi shesge hirena, egi harnaj minag wagigirena.

¹⁶ Egi waisgab‐horok’in sajanka egi ho nupahanka warussana, egi wangeja horuxujshana, wainabshana egi warujhena egi hironaghirera wawogarna egi worohanka eja wawigiweninena.

¹⁷ Egi waruj‐hirena, egi harnaj wainaj‐hirena, egi hoxjugra warus‐hirena hotawahiregi napanra kerepanaishanaga‐nuphashana hoixjina.

¹⁸ Egi herena inekhi Maura gikarajnihena, hironaghirera wakarakishu. Egi wawigiwaxshana wena: Peshe wineshe wankshigra arnankshe?

¹⁹ Hornihairena, wairena: John Niwawaxunga, egi hota wairena, Elias, egi hijanera wairena, prophet shagra shige hisha niambshana.

²⁰ Jesus wawagena: Nishge peshe wineshe hishawishe? Peter horniharna wena: Maura Kristus harnira neninegaja.

²¹ Egi harojaxji wawigena inke washa de‐e hisha hogirag hiranikje ena.

²² Wena: Wankshig‐hinigra washara roha jasgegi hawekjanena, egi washinukanara wajis‐hirekjanena, egi nabhoruxaj hirukanara egi wowagax hiperesra, egi jasgegi d’ehiregi phinana, egi niaimbkjanena hamb hidanihainja.

²³ Egi harnaj wawagena: Hisha hiroinaikjegi, kikurushjane hianaga, egi hambokahi nanramihera kuruk’inegi hiroinaikjena.

²⁴ Egi higu peshe wankshig‐hoina hikarashishighi, xawarni karagikjanena, eshi higu peshe wankshig‐hoira xawarnikaragigi Ne‐hawau waungi, e wankshiginkjanena.

²⁵ Jaguisha ruxurugnashe hisha managre harnaj ruxurugkhi, egi exji xawarnikhingi, egi nige‐hot’unairegi.

²⁶ Higu peshe hiroigishikhi egi hoit’e warnira, e Wankshig‐hinigra hishge hirogishigkjanena, jaja gloria harnieja gigi, egi Hianjra glori harnieja egi waxopiniwarajire wakanjank warnieja.

²⁷ Eshi wogisogra hornigitagwina, e‐gi hisge unakshana, e inke hot’era harajab‐hiranikjanena, unak’u Maura hungma harnira hajairekjanena.

²⁸ Egi hageja herena deshesge arnaga hamb haruwangahanegi, Peter russana egi Johnga egi Jakobga egi xexete hihageja howarairena Maura gikaraj.

²⁹ Egi Maura gikarajnank’u, hishjara hijanjinakshana, egi waini earnira sgarna egi rukanakanabshana.

³⁰ Egi horuxujre, eja wangra nup hokit’arnankshana, Moses egi Elias e hererena.

³¹ E gloria jantinena egi hokirujera jasge Jerusalem eja hikjanegi e hirokit’arnankshana.

³² Egi Peter egi jarnaga wakishuhiga shjuwana howashaxjinena, egi jaja hikhinegi, gloria harnira hagijairena egi wangra nupiwi hakishu nashinjena.

³³ Egi herena, jaja t’urakarairegi, Peter Jesus wagena: Hirukanara, phiwawawigaja higiajiwira jhira dani haunkjawina, hisha ningiuwianaga egi hisha Mosesga, egi hisha Eliasga, inke jagu wagarnankhi hipereswarnina.

³⁴ Deshesge arnak’u, eja maxiwi jina, egi hoirawahasi jinaghirena, egi nakawairena maxiwi rogeja howahiarairege.

³⁵ Egi eja maxiwieja hisha hora naxguinegi, wena: De‐e Hinigharna wagixetena, harnaxguwine.

³⁶ Egi jaja hit’et’era rashjangi Jesus inekhi jena. Egi inke xabhiranina, egi inke hisha hogiraghiranina hambnanka eja washa e hajairega.

³⁷ Egi herena, haininegi jaja xeja howakiriregi, wankshigra rokana hikiparna.

³⁸ Egi horuxujre, wangisha worohainja mashjint’et’ena wena: Hirukanara ningitarna hinighara hungiruxujre, eshana ninkjang harnira herena.

³⁹ Egi horuxujre, naxirag hisha russana, egi higuana ijanigshana, egi ruksunksunjshana unja‐u ira jax harawojshana egi washangishgashgana rokana wagiuna, t’unehira wojexi.

⁴⁰ Egi wironag washinira wagitara jangra howahas hirekjege egi rushaghirena.

⁴¹ Egi Jesus horniharna wena: Inke harnaxguniraniwina, egi wankshig hokixajanke raniwina, hojia jajaixji harnikishu hauwinguni, egi harninia’uwina? Hinigraga hakaranihure.

⁴² Egi hugaja waxopinishishigra mainja hot’unena egi ruksunksunjshana. Egi Jesus naxirag shishigjega najisgina, egi ninkjangjega rushjahina, egi hianjra shige hokaraikuna.

⁴³ Egi harnaj khorairena Maura hoxete harnira hiu. Egi jaja wankshigra harnaj khorairegi Jesus e washa ura harnaj, hironag warnira wawagena:

⁴⁴ Hoit’e de‐e nuxhopox washiniwieja nihe wahiwiaje: Wankshig‐hinigra wankshigeja rushjarehirekjanena.

⁴⁵ Eshi hoit’e de‐e inke naxguinanina, egi nuxawagimig hirege e inke naxguiranikjege, egi hoit’e de‐e higiwaxra nakawairena.

⁴⁶ Egi wowewiju hajiarairena, e hajanga rokanawiguni hirairena.

⁴⁷ Egi Jesus wawiperessana najge warninera wowewira, ninkjang hisha rusanaga egi hikija hieja kerena,

⁴⁸ Egi wawagena: Higu peshe ninkjang de‐e rusgi rash‐harnira hawau, hinruswaunana, egi higu peshe hinrusgi rusnana hisha huingigira ruswaunana. Hisha horograwiregi worujisjingi e xetekjanena.

⁴⁹ Egi Johnga horniharna egi wena: Hirukanara, hisha hajawina waxopinishishig jangra howahas‐shana rash hashinira hiu, egi roagixiwina, inke wangironagwinige esge.

⁵⁰ Egi Jesus wagena: Inke rogixinine, hisha inke wangakirawinigi, niarniajena.

⁵¹ Egi herena hambra higirerahena wangregi howaji rus‐hirekjanena, Jerusalem‐eja hapahi rahena.

⁵² Egi jowehieja woragra howarewagigina, egi harairena, egi Samaritra jhinagisha harninera eja hokawairena, higi‐korohoirekjege hornara.

⁵³ Egi inke hokewegigiranina, Jerusalem‐eja hapahi rahege esge.

⁵⁴ Egi jaja hironaghirera Jakob egi Johnga de‐e hajairegi wairena: Hirukanara, raiphingi uashikjawina wangregi pej howajianaga tajebhirekjena, Elias una shesge?

⁵⁵ Egi hakjampshana, egi najwisgina, egi wena: Inke hiraperes‐winishe naxirag jasgeisha eja ninewira?

⁵⁶ Wankshig‐hinigra inke wankshignagre maisinsh wahikje wagiunjinina, eshi niamb wahikjege. Egi jhinag hijanesha eja howarairena.

⁵⁷ Egi herena, nagueja harahairau, hisha wagena: Hirukanara hironinaikjanena higu hajinja horawasheregi.

⁵⁸ Egi Jesus wagena: Washerekesira mopox harninankshana, egi wanig wangregi herera homa harninankshana, eshi Wankshig‐hinigra inke washanisha harninina hajinja nasura khanaikjenisgena.

⁵⁹ Egi hijaneisha wagena: Hiroinagre. Egi wena: Hirukanara, jorni jajiga karaxe‐reingigire.

⁶⁰ Jesus wagena: D’arnanka d’era wakaraxairekjena, eshi Maura hungma harnira wihokhu rare.

⁶¹ Egi hijaneisha hishge wena: Hirukanara, hironinaikjanena, eshi jorni wikaragi hingigire, wajhieja nagra.

⁶² Egi Jesus wagena: Hisha mainupurueja harukosanaga egi hakjampgi, inke Maura hungma harnieja here phininana.