Lukga 7 - Winnebego Bible Portions 1907

¹ Egi jaja hit’et’era harnaj rashjangi wankshignanka jowehireja, Kapernaum eja, hokewena.

² Egi manape hungisha ware‐arnigi e wogixetena, howasharna egi d’e‐ikorohorna.

³ Egi jaja manape hungjega Jesus hornaxgungi, egi Judra xetera hija howarewagigina, gikarajhirena hijahiarnaga egi ware harnira rushjahikjege.

⁴ Egi jaja Jesus hirahiregi, egi hasohixji gitairena, wairena: Washinkisgeisha herena de‐e giuphingaja.

⁵ Wankshig warniwira wawogixetena egi wohokhuhojhisha hingiuwina esge.

⁶ Egi Jesus wakishu rena. Egi jaja jhiwusunsheja higi, manape hungjega hijakorowahira huwagigina Jesus eja, wagairena: Hirukanara, inke hawekhinine, inke jhi‐arninegi hokawarnine, inke washahiakisgarnige esge.

⁷ Inke washahiakisgarni hiarege esge inke nexji hiranihinina, eshi hoit’era hisha arnaga, egi ware harnira rushjankjena.

⁸ Egi hishge wankshig hirukanaine harnina, manape hirukana hingigirena, egi hisha rare hiagega, egi reshununa, egi hijanera hisha hure hiagega egi hushununa. Egi ware harnira de‐e une hiagega, egi u‐shununa.

⁹ Jaja Jesus washa de‐e naxgungi xixshana egi hakja hopahi nashina egi wankshig hironagnanka wawagena: Hinigawina Israelregi reshge inke hisha harnaxgu rokana shesgera hisha hiaenina.

¹⁰ Egi huwagigirega jhieja hakja hagirena, ware howashaka howashara rushjaxjingaja hajairena.

¹¹ Egi wauna, haininegi, jhinagisha eja howarena Nain higairera, egi hironaghirera roha hakishurena egi wankshigra roha.

¹² Egi jaja jhinaganaka jhirobra hiwusunsh higi, hajarna, eja hisha d’egi harni hihinab hirena, hinugisha hishankiraxji hinig higi herena, egi hikanagit’eisha herena. Egi wankshigra roha jhinageja herera hakishu wa‐uankshana.

¹³ Egi jaja Hirukanara hinuganka hajagi, najogijana, egi hinugjega wagena: Inke xagnine.

¹⁴ Egi hija jiranaga wanaxominganka hikiorna, egi ruanankhi nashi hijerena. Egi (Jesus) wena: Hojinjira hinigena, kikawa‐ane.

¹⁵ Egi d’arnihera minag‐kirinakshana, egi hit’at’ajirena. Egi hiunira hokaraikuna.

¹⁶ Egi harnaj eja naxirairena, egi Maura rajanghirena, wairena: Prophet rokanaisha horoghihiwiregi haxebshana, egi Maura wankshig warnira womakarakhini jina.

¹⁷ Egi worag de‐e Judea mowagaxra harnaj naxguinena, egi mara hogigixanka harnaj.

¹⁸ Egi Johnga hironaghirera washa de‐e harnaj hogirag hahirena.

¹⁹ Egi Johnga hironagnankhi nupiwi gigorna, Jesus eja howarewagigina, wairekjege: Neninesha hisha jikjanegi, nigeshge hijanera hisha hotuxuijanihawishe?

²⁰ Jaja wangananka hirahiregi, wairena: John Niwawaxunga egi howahuingigiwina, wena, Nenineshe hisha jikjanegi, nigeshge hijanera hisha hotuxuijanihawishe?

²¹ Egi howagixeja howashara roha rushjahina egi howashaisgejara egi naxirag shishig harninegi, egi roha hishjarningra waja hina.

²² Egi Jesus horniharna, wawagena: Karawire egi Johnga hogiragwiaje washa jagu hashjawire egi nanaxguwine. Hishjarningra wajairare, maninushagra manirare, lepra rushjairare, nuxningra warnaxguirare, d’era kikawaairare, wanajojaisgeja worag phira wihokhunangikjanena.

²³ Egi wogishawaxjira herenana higu peshe inke watoigixinigi.

²⁴ Egi jaja Johnga worag warnira hakarairegi, Jesus wankshigananka wawokit’e‐jirena Johnga haehi. Jaguisha mojainainja hashjarahiwishe? Raxge‐serejisha maintajehi haisosogjera?

²⁵ Nigeshge jaguisha hashjarahiwishe? Wankshigisha waini jexi hornashijera? Horuxujwire, jarnaga waini jexi unankhi egi jarnaga rora jagu rogu wankshig‐inegi hung hojhieja nankshana.

²⁶ Nigeshge jaguisha hashjarahiwishe? Prophet hisha? Hisgena hinigawina, prophet hiraijeraisha herena.

²⁷ De‐e erena, hisha wagairera wowagaxeja: Horuxujre, joweraija worag harnira howareagigina, e joweraija nagu hashinira hirushjahirena.

²⁸ Egi hinigawina: Horogejajena hinug wankshighiinanka eja inke hisha prophet hiraijera xetenina John Niwawaxunga waura. Eshi hisha hungma Maura harnieja worujisdingi, e hiraijera xetenana.

²⁹ Egi wankshignanka harnaj e naxguinegi egi Publikanra Maura phi weshe airena, egi ni‐hawaxuine waunankshana Johnga ni‐wawaxu harnira hiu.

³⁰ Egi Pharisera egi waehira Maura wohokhu harnira wajis‐hirena ewakik’uinena inke e ni‐wawaxunina.

³¹ Egi Hirukanara wena: Wankshignagre wankshighoi egi, peshe hisgerashe? Egi peshe hisgeraireshe?

³² Ninkjangnigra erenankshana woruwieja minagananka, egi washinkigarnank, egi wairena: Nigishushug harnakshana egi inke shawashiwinina, nigixagji hajegaja egi inke raxagwini.

³³ John Niwawaxunga jira inke waisgabduj rujnina inke shige nishuj rajganina, egi washawina: Waxopinishishig harnijeshe.

³⁴ Wankshig‐hinigra jira, warujarnaga egi rajgajena, egi washawina: Horuxujre wankshig de‐e waroijxeteisha, egi nishuj hiksi‐isha herena, egi Publikanra egi washa woishana ura hijakoro wahina.

³⁵ Eshi wowanaiksabra ninkjang warnira phi hiranainena.

³⁶ Pharisenanka hisha waruj hakishu u‐nainena. Egi Pharise hojhieja hokewena, egi minagshana warujeja.

³⁷ Egi horuxujre, hinugisha jhinageja jegi, washa woishana uisha, jaja hinugjega hiperesgi Jesus warujeja minagkhi Pharisejega hojhieja, Alabastra pexisha wikini panna phi hoixji harnijina.

³⁸ Egi si hieja nanke eja nashina xagjena, egi sira girusha jirena hishjanina hik’u, egi giwasharna hinugjega naju harnira hik’uanaga egi sira iokiwankshana, egi wikini panna phi hawaxuna.

³⁹ Egi jaja Pharise waruj‐shijega hajagi, hikigena egi wena: Wang de‐e prophet hisha heregi, hinug jasgeisha herera hiperes‐shgunina hikiornagre, hinug washa woishana uisha heregaja.

⁴⁰ Egi Jesus horniharna wagena: Simon, washa hinigekjanena. Egi wena: Hirukanara are.

⁴¹ Eja shura hornajwagigi‐isha nankhi nupiwi wawagaxgirushagshana, hisha Denaria hogwihisaja rushagshana egi hijanejega Denaria kerepana‐saja.

⁴² Egi jaja inke washa hirowe hiruxurug hiranigi, hinuinke wawogarna. Hungiragre, hajanjega e hiraijera wogixetegi?

⁴³ Simon horniharna egi wena: Hiarena hisha roha hokunga. Egi Jesus wagena: Phixji waragena.

⁴⁴ Egi Jesus hinugjega eja horuxujshana egi Simon wagena, hinug de‐e hashjashe? Jhi horajhiregi wakewera, inke ni si‐rusha hunak’unina, de‐eshi hinugnagre sira hingirusharna hishjanina hik’u, egi naju hinugnagre harnira hik’uanaga waigiwasharna.

⁴⁵ Inke iunakhiwangnina, eshi hinug de‐e higiwakawareja epa si harnira inke iokiwangra harushjaninankshana.

⁴⁶ Inke wikini panna phi nasu harnira hinagishawaxunina, eshi hinug de‐e si harnira wikini panna phi hingiwaxuna.

⁴⁷ Esge hinigena: Hinugnagre washa woishana warnira rohana wagit’unairena, wogixetera rokanage esge. Eshi hisha jowexjinig git’unegi, e jowexjinig wogixetenana.

⁴⁸ Egi Jesus hinugjega wegena: Washa woishana washinira warnigit’urairena.

⁴⁹ Egi jarnaga warujeja wakishu minagkhi wakigairena: Peshe de‐e heregaja, washa woishana hishge wagit’uneshe?

⁵⁰ Egi Jesus hinugjega wagena: Harnaxgu hashinira waunge wankshig‐shina, rashguni karare.