Lukga 5 - Winnebego Bible Portions 1907

¹ Egi wauinena, wankshigra woroha hiranassunsh harairena, Mau hoit’era harnaxgu, egi Genesareth te‐hijejeja nashina.

² Egi wajra nup hajarna teja, egi hoikisherera hihinabhiregajerena egi hoigixera wakurusharnankshana.

³ Egi wajnaka eja hisha howairena, Simon harnieja, egi higena jowexjinig najiraija hinagishina, egi minagshana, egi wajeja minaganaga wankshigra washa wagigussana.

⁴ Egi jaja hit’et’era rashjangi, Simon wagena, hosheweja wajra hinagire, egi hoigixe hashinira niokarat’unare horisge raixegjena.

⁵ Egi Simon horniharna wagena: Hirukanara, haiserej watawina, egi inke washa haixewinina, hisharajege esge hoigixera ni‐wat’untekjanena.

⁶ Egi jaja deshegu hiregaja, hora rokanaxji wagiuinena egi hoigixera gigas‐hirena.

⁷ Egi wawokishgara wawigigus‐hirena waj hijanejananka, hahuranaga wagijirairekjege. Egi hajirena egi wajnanka hinuinke hoixjinena, egi wajra howajib harairena.

⁸ Simon Peter jaja hajagi, egi mainja himpshana Jesus jowehieja, wena: Hirukanara hijahi howakarare, washa woishana u wankshig harnige.

⁹ Simon Peter khorena egi wakishu unjega harnaj, hora rokanaxji gixerege esge.

¹⁰ Egi hishge Jakobga egi Johnga Sebedai hinigwahira khorairena e Simon wawokishgara. Egi Jesus Simon wagena: Inke naxiranine, epa wankshig hirakisherekjawina.

¹¹ Egi jaja wajra moroija warnihagiregi, harnaj wat’unairena egi hironaghirena.

¹² Egi wauna, jaja jhinag hisha eja higi, horuxujre, wangisha lepra una rokanana, e Jesus hajarna hishjara mainja herehi jimpshana, egi gikarajshana wena: Hirukanara, hiraregi rushjainashgunina.

¹³ Egi Jesus ara wajigre‐hianaga hikiorna, wena: Haunkjanena, ninushjankjena. Egi higuana lepra rushjana.

¹⁴ Egi rogixina inke hisha hogiragnianje higena, eshi ranaga egi nabhoruxaj hirukanainja kikawahaje, egi nabruxajaje ninushjane, Mosesga uwashira hiu waworagisharag washunkjanena.

¹⁵ Eshi hijairaxji harnaj hornaxgu harairena egi worohaxji storna naxguhajire, egi howasharnankhi rushjawahikjege hajirena.

¹⁶ Egi mojainainja howarena egi Maura gikaraj.

¹⁷ Egi wauna, hambisha eja washa wagigusnankshana, Pharisera hijarnankshana egi woehi hirukana hungra hija minagnankshana e Galilea mowagaxeja jhinagnankhi eja howajirena egi Judea mowagaxeja, egi Jerusalem‐eja. Egi Maura homashja harnieja nankshana, rushjawahira.

¹⁸ Egi horuxujre, wang hajirena wangisha homig hot’umb harni, ro‐t’egisha, egi hija harniokewenainena, egi jowehieja t’umbhirekjege.

¹⁹ Egi jaja inke nige harni howairephi hieranigi, wankshigra rokanaxjinge esge, jhi‐hihageja hahirena, egi inidashuj parasra (hisge rus‐hiranaga) egi homigra hirassa eja howaji huhirena horogeja Jesus jowehieja.

²⁰ Egi jaja Jesus harnaxguinera wajagi wagena: Wankshigra, washa woishana washinira warnigit’untena.

²¹ Egi wowagax‐hiperesra egi Pharisera wewi‐hajiarairena, wairena: Peshe de‐e hereshe, Maura raxjashguni hit’at’arnagre? Peshe washa woishana wagit’une ruxurugnakshe, eshi Mau rashana?

²² Egi Jesus wagijarna wowewi warninera wornigiharna, egi wawagena: Najge washiniwieja jagu hirarashanakshe?

²³ Hajanjega era wowategenigshe, washa woishana washinira warnigit’untena era, nigeshge nashianaga manine era?

²⁴ Eshi hiraperes‐kjanihawina Wankshig‐hinigra homashja harnijena ma‐egi washa woishana wagit’une (howashaka wagena rot’eganka), hinigena, kikawa‐ane egi homigra kurusanaga jhi‐horajhieja howakarare.

²⁵ Egi higuana kikawa‐ana jowehireja, egi washaisha homing‐ankhi kurusanaga, egi eojhieja howakerena Maura rajank‐kerena.

²⁶ Egi harnaj khorairena egi Maura rajankhirena, egi nakewera rokanainena, wairena; Hamb de‐e washa jeg hajawigaja.

²⁷ Egi washa de‐e hageja nigeowarena, egi Publikanraisha hajarna, Lewi higairena, woirowe horus‐hojhieja nakshana, egi wagena: Hiroinagre.

²⁸ Egi harnaj wat’unena, nashianaga egi hironagshana.

²⁹ Egi Lewi warujxete giuna, eojhieja, egi eja Publikanra worohaxjiankshana egi hijanera wakishu minagnankshana.

³⁰ Egi eja wowagax‐hiperesra nankshana egi Pharisera, haegiginankshana wironag warnieja wairena: Jagu‐u Publikanra egi washa woishana ura wakishu warajhashanakshe egi rajga warakishu‐shuwishe?

³¹ Egi Jesus horniharna egi wawagena: Jarnaga wanaishguniankhi inke makhani hiuninankshana, eshi jarnaga howashakhi.

³² Inke phira wagigo hajinina, eshi washa woishana ura najgera wakarateg hirekjege.

³³ Egi wagairena: Jagu‐u Johnga hironaghirera hantaginajkaireshe egi Maura gikarajire, egi shige shesgairena Pharise wironag warninera? De‐eshi waruj hiranaga egi rajganak.

³⁴ Egi wawagena: Hinug‐khanaikjanarnaga waruj jiwarashiwianaga hajiregi jasge hantaginaj waragigiwinashe, jajaixji hinug‐khanaikjanega wakishu unjegi?

³⁵ Eshi hambra hajiregi, eja hinug‐khanaikjanega wagirus‐hirekjanena, egi hambanaka eja hantaginaj hirekjanena.

³⁶ Egi hishge hisgeraisha wogiragshana, inke wankshigra hisha wonashi jeg eja nige rusanaga wonashi shag’eja hirarujagninana, shesge higi hinuwinke poxwahinana, jegrashge jegnaka eja nige shuruswige shaganaka inke hikisgarninana.

³⁷ Inke wankshigra hisha nishuj‐jeg hiregi pex‐shageja hoshuninana, shesge higi nishuj‐jegjega pexra xuxrehinana egi xunanana egi pexjega maisinshnana.

³⁸ Eshi nishuj‐jegra pex‐jegeja woshuiranana, egi hinuwinke phinanana.

³⁹ Egi inke wankshigra hisha nishuj shag rajgangi, nishuj‐jeg rogujijeninana, eshi warnana: Shagra e phinena.