Lukga 22 - Winnebego Bible Portions 1907

¹ Egi waisgab hinawohi rokarni worujra hiwusunsh harena Pasxa higairena.

² Egi nabhoruxaj hirukana hungra egi wowagax hiperesra jasgehirarnaga d’ehirekjanegi horninena, eshi wankshigra warnakawairena.

³ Egi Judas rash hinubra Iskariot higairera, nuphashanara e hisha herera Satan hokawairena,

⁴ Egi rarnaga nabhoruxaj hirukana hungra wawokit’ena egi manape hungra, houna jasgehianaga wawimagiraikjanegi.

⁵ Egi hito‐inena egi warnaira horeishankira khinena shura hokuinena.

⁶ Egi Judas wamangirajshana egi houphi hornikjanena wimangiraikjanega inke worohainja herenikjanena.

⁷ Egi waisgab hinawohi rokarni hambraherena, eja Pasxara d’ehirekjanena.

⁸ Egi Jesus Peter egi Johnga rewagigina, wawagena: Rawire, egi Pasxa (worujra) hingi‐korohowire, hiwaruijhawina.

⁹ Egi wagairena, hajinja hirushja hakjanihawishe?

¹⁰ Egi wawagena: Horuxujwira, jaja jhinagra horakawawigi, eja wangisha harakishjakjanihawina, rexorowasge soroj‐isha ni hoshu ruanjekjanena, hironagwiaje jhi hajinja hoikewegi.

¹¹ Egi waragekjawina jhi harnijega: Hirukanara warnigena, hajinja jhi worujra hereshe, eja Pasxara haijanihawishe wironagra wakarakishu?

¹² Egi jhi‐wang xeteisha himanigiraikjanihawina hirushjaxji‐angikjanena eja hirushjahiwiaje.

¹³ Egi harairena, egi hierena jagu wawigera shesge, egi Pasxara hirushjahirena.

¹⁴ Egi jaja howagixra heregi, minagshana Apostel nuphashanara wakarakishu.

¹⁵ Egi wawagena: Pasxa de‐e hakishu waruj roniguxjiwina, kheni hawani.

¹⁶ Esge warnigawina, inke hinupahara hajnikjanena jaja Maura hungma harnira heregishana epa.

¹⁷ Egi ni‐wirajgara rus‐shana egi wainabshana, egi wena: De‐e ruswire egi hikiweniwire.

¹⁸ Hinigawina inke habsinshnagra watajganikjanena, jaja Maura hungma harnira jigishana epa.

¹⁹ Egi waisgabra rus‐shana egi wainabshana, egi rujhena egi wawogarna, wena: De‐e ro harnira herena, E wornigigairawina, de‐e sh’uwingi hiwewiwianje.

²⁰ Egi shige shesge hina ni‐wirajgara russana hoxjarna waruj rushjangi wena: Ni‐wirajga de‐e Testament‐jegra herena wa‐i harninegi, E xunigigirawina.

²¹ Egi horuxujwire hisha himainaikjanera nab harnira waruj hihagregi harni hakishu haunankshana.

²² Egi jasgegi Wankshig‐hinigra kerekjanena, shegu hirege, eshi hawekjanena hisha wimanakjega.

²³ Egi hikiwax hajiarairena peshe washa de‐e waunkjanegi.

²⁴ Egi exjinena hajanga e hiraijera xetekjanihawigi.

²⁵ Egi wawagena: Hung hirarujheregi herera wawirukanajena, egi jarnaga wawirukanananka washa wagijirega higarnankshana.

²⁶ Eshi inke shenisgarnikjanihawina. Egi horogregi hisha hiraijeranankhi, xunuxjinig hikisgekjanena. Egi hisha hungnankhi, wawagire hikisgekjanena.

²⁷ Hajanga e xete harnakshe, hisha warujeja minaganagka, nigeshge wawagirajega? Inke e hereninashe hisha warujejananka? Egi horograwiregi hauanjena wawagire hikisge.

²⁸ Neninewina, washinohire howe hoishib hinakishu sh’uwira.

²⁹ Egi hungmara hornik’uwina, Jajiga hunkura hikisge.

³⁰ Waraijawige egi sharajgankjawige waruj harnieja hungma harnieja, egi hung‐waminageja minag, woehiwagiu wankshig howajehi nuphashana Israelra.

³¹ Egi Hirukanara wena: Simon, Simon, horuxujre, Satanra nirus roguxji hajena, nigituixjawige waisgab nisge.

³² Eshi gikarajnigigina, harnaxgu hashinira inke shejanikjege, egi jaja shawakshangi, warakhinubra himashjahirekjanena.

³³ Egi Peter wagena: Hirukanara, hiakorohornakshana harnikishu tekjanena, jhi‐hornassairera egi d’ehirera.

³⁴ Egi wena: Hornigitagshana Peter, bagawaxgewangra hamb de‐e inke xagnikjanena, jorni daniha khibainakhinkjanena hinaperesnunige.

³⁵ Egi wawagena: Jaja shuroshu rokarni reningigiwira, egi pa, egi waguje rokarni, jaguisha hininujiswishe? Egi wairena: inke washanisha hinujiswinina.

³⁶ Egi wawagena: Egi shegunegi hisha shuroshu hashiniwingi kurusre, egi shige panra, egi hisha wigijgux jushgunigi wonashina wikuruwinge egi hisha ruwine.

³⁷ Wanigawina, shige washa de‐e wagaxangre newaigairera jasgegi herekjanena: Wigishana horog gikarab hirena. Egi jagu wagaxhirera newaigairera hoshejana herekjanena.

³⁸ Egi wairena: Hirukanara, horuxujre wigijguxra eegi nupiwi hahankshana, egi wawagena: Phinkjanena shenagawigi.

³⁹ Egi hihinabshana, egi Oliw‐xeja hikeshununa eowarena, egi hironag warnira hironaghirena.

⁴⁰ Egi jaja hijahigi, wawagena: Maura gikarajwire inke washoshishig uwahieja horawarai‐sharanikjawina.

⁴¹ Egi ejaxji ini hounehishaxji howarena, egi huporominaganaga egi (Maura) gikarajshana.

⁴² Wena: Jaji raipingishi ni‐wirajga de‐e hinxakjena, eshi inke woshga harnira herenigaja, eshi hashinira heregaja.

⁴³ Egi waxopiniwarajireisha jantigikhina wangregi howaji himashjahire.

⁴⁴ Egi hawera rokanaxjingi hiraijera hasohixji gikarajshana, egi hotakakajra wa‐ira rokanaxji mainja x’e hikisgena.

⁴⁵ Egi jaja kikawa‐angi gikarajra egi wironag warnira wirakirina, nanank’u wiena najgerategnanke.

⁴⁶ Egi wawagena: Jagu‐u ranawishe? Kikawa‐awige gikarajwire, washoshishig‐ueja horawaraisharawiege.

⁴⁷ Egi higu hit’at’ajau, horuxujre worohaxji jina, egi Judas higairera nuphashanara eisha herera jowehireja uankshana. Egi Jesus hirajiarnaga iokiwankshana.

⁴⁸ Egi Jesus wagena: Judas, Wankshig‐hinigra himasharagre iokiwank hish’ushe?

⁴⁹ Egi wakishu‐unjega hajairegi jasge hirekjanera, wagairena: Hirukanara, jasge wigijgux hiunkjanihawishe?

⁵⁰ Egi hisha nabhoruxaj hirukana hungra ware harnira hojinena egi najawa sanig hoishorora gixguirena.

⁵¹ Egi Jesus horniharna egi wena: Hinpewiginine, egi najawara higikiorna egi rushjahina.

⁵² Egi Jesus nabhoruxaj hirukana hungnanka wawagena egi manape hungnanka wohokhu‐hojhixeteja herera egi xetera: Hirajirega wankshigd’ehi hirajinisge rawi, wigijgux egi wiwapox harni.

⁵³ Hambokahi wohokhu‐hojhixeteja harnikishu hauwina, inkaga hisha hinakisharawini nab renawinishunura, eshi howagix de‐e niashiniwina, egi hokawasra homashja harnira.

⁵⁴ Egi harukos‐hirena, egi harniankarairena egi nabhoruxaj hirukana hung hojhieja harniangirena. Egi Peter harixji hironagshana.

⁵⁵ Egi jaja jhiakohi jangeja hokissageja pej hot’uinegi egi eja harnaj minaghirena, Peter hishge horogeja minagshana.

⁵⁶ Egi hinugisha hajarna pej hijejeja minaganankhi egi wogisogji horuxujshana egi wena: Wang de‐e hishge hakishu‐una,

⁵⁷ Egi khibakhina, wena: Hinugra inke hiakiperesnina.

⁵⁸ Egi hagregi xapgenig hijane hajairena egi wena: Hishge hishaerena. Egi Peter wena: Wangra inke neisha winenina.

⁵⁹ Egi ejaxji hagregi howagix hishanguni hijaneisha hiperesjinge wena: Wogisogjina de‐e hishge hakishu‐una, Galilea wankshigisha herenakshana.

⁶⁰ Egi Peter wena: Wangra inke hiaperesnina jagu hishegi. Egi higuana, higu hit’at’arnak’u bagawaxgewangra xagshana.

⁶¹ Egi Hirukanara hijopahinashina egi Peter horuxujshana. Egi Peter wewina Hirukanara hoit’e arnihera jagu higera. Kheni bagawaxge‐wangra xagni, daniha khibainakinkjanena.

⁶² Egi Peter hihinabshana egi xagra rokanaxjiwena.

⁶³ Egi wang Jesus harukosnankhi igixjairena egi hojinena.

⁶⁴ Egi jaja hishjara hagirukainegi, hishjaija hojinena, egi higiwaxhirena, wairena: Prophethire peshe hornijingi?

⁶⁵ Egi washinjahira roha raxjashguni hirakirairena.

⁶⁶ Egi hamb hakirigi wankshignaka xetera egi nabhoruxaj hirukana hungra egi wowagax hiperesra stoirena, egi woehi harnieja harniahirena, wairena:

⁶⁷ Kristus nenineshe? Hungiragwire. Egi wawagena: hornigitagwishge inke harnanaxguni‐kjanihawigaja,

⁶⁸ Egi nishge winigipaxwishge, inke hinagi‐xapwininana, egi inke kere‐nagigiwininana.

⁶⁹ Epa Wankshig‐hinigra Maura homashja harnira hoishoro hieja minaikjanena.

⁷⁰ Egi harnaj wairena: Maura Hinigra nenineshguni? Egi wawagena: Shesge hishawige, egi newineajena.

⁷¹ Egi wairena: Inke hiraijera wihohi hiunikjanihawina, nexji hinaxguwingaja E iarnieja.