Lukga 21 - Winnebego Bible Portions 1907

¹ Egi woruxujshana egi wang hitajera wajarna shurahoshueja shura hoshunankshana wawogairege.

² Egi hikanagit’e wanajojaisgeisha shige hajarna Lepra nupiwi hijoshurna (shurashuj kerepananup sajahashana wagiuna).

³ Egi Jesus wena: Hisgexjina hinigawina, hikanagit’e wanajojaisgejane eshana hiraijera hijoshurna.

⁴ Hijanenanka harnaj juxji waunankshana hijoshuirega Maura hokuinega, eshi hinugjane warugesjena jarnaga harnira harnaj wogarna.

⁵ Egi hota wohokhu‐hojhixetera haehirena hophiura ini phi jexi egi wogaire hiuinegi, Jesus wena:

⁶ Washa washjarajane, hambra jigi, e inke inira hisha hirajakikanag harnagnikjanena inke nige hot’une phininagre.

⁷ Egi higiwaxhirena, wairena: Wawagaxhajawagigira, jajanegi washa de‐e herekjaneshe? Egi washa woijanti jaguisha heregi, egi washa de‐e herekjaneshe?

⁸ Egi wena: Hirakara‐uwianje inke nigishjanke hiranikjawina. Rohaxji rash harnira hiuanjirekjanena, wairekjanena, Kristus newinena. Egi hiwusunsh hotagi waunkjanena, esge inke wironagwinianje.

⁹ Egi jaja kissaire warnanaxguwingi egi wopunusesgegi, inke naxirawinianje, washa de‐e jorni herekjanena, inke higuana hoshejara herenikjanena.

¹⁰ Egi wawagena: Jhinag hokirajra kikisairekjanena, egi hungmara kikisairekjanena.

¹¹ Egi mara hixgara rokanakjanena nigeshana, egi dokewehira egi Pestra herekjanena, egi horuxujra nakewesgekjanena, egi woijanti rokana wangregi howajikjanena.

¹² Eshi kheni de‐e hereni, harninukos‐hirekjanihawina, egi hinigishanainekjanihawina, wohokhu‐hojhieja harnini‐hahirekjanihawina egi jhiwornasse hojhieja, egi hung jowehireja egi washa hirukanaija harnini‐hahirekjanihawina, rash harnira hawau.

¹³ Egi e wihohira hinigirerekjanihawina.

¹⁴ Najge washiniwieja nihe‐wahiwiaje inke wewiwinianje jagu hishekjanihawigi.

¹⁵ I‐junikjanihawina egi wanaiksab‐ninkjanihawina, harnikira nangwigi inke khibanigigi ruxurug hiranikjanihawina inke shige niwajis ruxurug hiranikjanihawina.

¹⁶ Egi himaninag hirekjanihawina sh’agwarawiga egi warakhinubwira, egi washawarawiga egi hijakorowarawiga, egi hota d’ehira ninekjanihawina.

¹⁷ Egi wankshigra harnaj hornish’ighirekjanihawina rash harnira hawau.

¹⁸ Eshi inke naju washiniwina hisha d’arnikjanena.

¹⁹ Warnaiserej hish’uwingi naxirag washiniwira warakarashinikjanihawina.

²⁰ Egi jaja Jerusalemra manapera haikshaine washjawigi, hiraperes‐kjanihawina maisinshjanera hiwusunsh hotara.

²¹ Egi Judea eja herera xeja hogias hirekjanena, egi jarnaga rogejanankhi hihinab‐hirekjanena, egi jarnaga hirarujeja unankhi inke hoikawairanikjena.

²² Egi hambnagre wakarakje haimbkjanena, egi jarnaga washara wagaxangre harnaj exji herekjanena.

²³ Egi wojexi harus‐hirekjanena jarnaga waujganagankhi, egi jarnaga ninkjang was‐hokuankhi hambnanka eja, manaka washoshishigji howekjanege esge, egi wankshignagre hawairekjanena.

²⁴ Wigijgux hopahieja hakinib‐hirekjanena, egi warukos‐hiranaga jhinag hokirajeja warniagirekjanena, egi Jerusalemra naxirixiri‐hirekjanena hirarujheregi herera wauinekjanena, jaja hirarujheregi herera higireregi herekjanena epa.

²⁵ Egi Hambwira wijantikjanena egi hahewira, egi wiragoshgera, egi ma‐ihagregi wankshig hokirajnagre hawexji hirekjanena wowewi harej hirekjanena, tejara egi jashjara woxejiregi.

²⁶ Egi wankshigra d’airekjanena naxirairegi egi maihagregi washa jikjanega karakjamb‐hirege wauinekjanena egi hishge wangregi homashjara hixgainekjanena.

²⁷ Egi hajairekjanena Wankshig‐hinigra maxiwieja huhegi, homashjara egi gloria rokana.

²⁸ Egi jaja washa de‐e heregi, rojankirijewiaje egi gisijwiaje, wankshighoi hashiniwira hiwusunsh jige esge.

²⁹ Egi washinsgera wawigena: Fig‐nara egi nara harnaj woruxujwire,

³⁰ Jaja abra jinaghiregi hashjawigi egi ne hiraperes‐kjanihawina dogra hiwusunsh harege waunkjanera.

³¹ Nishge she‐nisgekjanihawina jaja washa de‐e here hashjawigi, hipereswiaje Maura hungma harnira hiwusunsh harera.

³² Hisgexjina hinigawina wankshighoi de‐e inke shejanikjanena, jaja hahi harnaj heregi epa.

³³ Wangregi herera egi mara shejankjanena, eshi hoit’e harnira inke shejanikjanena.

³⁴ Egi hirakikarawiaje, nigete najge washiniwira hawuhinshwarawiege warujxete‐u egi warajga, egi wankshighoi egi washa nagre shesge hirawuhinsh warawiege, shesgerawigi hambeja hawushiri‐ninkjanihawina.

³⁵ Mas‐haraxjag higiunisge wagigirekjanena jarnaga ma‐ihagregi uankhi.

³⁶ Esge hirakara uwianje egi hoishib gikarajwiaje, e washinkisge ningikarab‐hirekjanihawina, hokishib washa de‐e herekjanega eja, egi washinkisge Wankshig‐hinigra jowehieja nanashikjanihawina.

³⁷ Egi hambregi wohokhu‐hojhixeteja washa wagigusjena, egi hahega hihinabjena, egi xe‐isha Oliw‐xera higairera eja hiwushajena.

³⁸ Egi wankshigra harnaj hainixji hirajiranaga wohokhu‐hojhixeteja harnaxgu hajinankshana.