Lukga 20 - Winnebego Bible Portions 1907

¹ Egi herena, wankshigra wohokhu‐hojhixeteja washa wagigusjega, egi worag phira wihokhunjera, hambnaka hisha eja nabhoruxaj hirukana hungra egi wowagax hiperesra hirahirena xetera wakishu.

² Egi hokit’airena, wairena: Hungiragwire, homashja jaguisha waragishu rajeshe washa sh’urajane? Egi peshe homashja de‐e hornik’ushe?

³ Egi horniharna egi wawagena: Hishge washaisha hinigipaix‐janihawina, egi hungiragwire.

⁴ Johnga ni‐wawaxu harnira, wangregi howajishe, nigeshge wankshigregi howajishe?

⁵ Egi kikewewi hajiarairena, wairena: Wangregi howajina hiawigi, wekjanegaja, jagu‐u inke harnanaxguwinishe?

⁶ Egi wankshigregi howajina hiawigi, wankshignagre harnaj ini wangirojinekjanihawigaja, Johnga prophet hisha herera hirananke esge.

⁷ Egi hornihairena, hajinja howajigi inke hiapereswinina.

⁸ Egi Jesus wawagena: Nishge inke hornigitagwinina, homashja jaguisha hiauanjera washa de‐e hauanjane.

⁹ Egi wankshigra washinsgera de‐e wirokit’ajirena: Wangisha habsinsh max‐isha una, egi hirakara wagigina, egi ma hari howarena s’ixji.

¹⁰ Egi hijarnajexjinegi wareisha max hirakarananka eja howaregigina, habsinsh maxananka eja hisge hokuinekjege, eshi max hirakarajega hojina egi rokarni keregigirena.

¹¹ Egi shige ware hijanesha regigina, egi hishge hojinena, egi washangishga‐shgainena, egi rokarni keregigirena.

¹² Egi shige hidanina regigina, egi hishge gikunukunughirena egi jangra hot’unairena.

¹³ Egi habsinsh max hirukanara wena: Jasge hakjaneshe? Hinighara wakaragixetera reagigikje. E nigete gishaghirege hajairegi.

¹⁴ Eshi habsinsh max hirakarara jaja hajairegi, hokikit’airena, wairena: Washa hoishjanairera haniga deerena, huwire, d’ehikjawina, washa hoishjanairera harnikjawina.

¹⁵ Egi habsinsh max jangeja hot’unairena, egi d’ehirena. Egi jagu habsinsh max hirukanara wagiunkjaneshe?

¹⁶ E jiarnaga max hirakaranagre maisinsh‐wahikjanena, egi habsinsh maxra hijahieja wawogakjanena. Egi jaja naxguinegi wairena: Inke shesgarnikjanena.

¹⁷ Egi waworuxujshana, egi wena: Jasge wagaireshe wagaxangre: Inisha jhiura nigeot’unairera e hahi ini haminag hopassera herenana?

¹⁸ Higu peshe ini de‐e eja hashibregi, gishishishjanena, eshi ininaka peshe hashibregi rujoibjanena.

¹⁹ Egi nabhoruxaj hirukana hungra egi wowagax hiperesra howagix eja harukos‐nainena, egi wankshigra warnakawairena, hiperes‐hirena washinsgera de‐e wawirokit’are ewawagewege esge:

²⁰ Egi hirakarairena, egi wawesiwira rewagigirena wanaiksab hiranakik’ina, hoit’e hirokit’une hirekjege, de‐shegu hiregi egi waehieja harniahirekjanena egi shige hung homashja warninera jowehireja.

²¹ Egi higiwaxhirena, wairena: Wawagaxhajawagigira, hinipereswina washa wogisog hisharajera egi wogisog waragigus‐rajera egi inke hisha hiranigijerani, eshi Maura woshga harnira wogisogji waragigus rajegaja.

²² Jasgeshe phi‐wagiuwinasha Kaiser hirowe‐agigiwigi nigeshge inke phinishe?

²³ Egi washokit’une wahinaira wawigiperes‐shana, egi wawagena: Jagu‐u hish’ushjawishe?

²⁴ Shura woirowera hingiwahare, hokiwagax peshe hijarnakshe egi wowagax peshe harnigi hijakshe? Hornihairena, wairena: Kaiser harnira.

²⁵ Egi wawagena: Kaiser hokaraikuwine Kaiser washa warnira, egi Maura hokaraikuwine, Maura washa warnira.

²⁶ Egi inke hoit’era hirarukos ruxurug hiranina wankshignaka jowehireja, egi khorairena wornigihagi, egi inke xab‐hiranina.

²⁷ Egi Sadusera hota hirajirena, e hakiha wankshigina khibahirena, egi higiwaxhirena,

²⁸ Wagairena: Wawagaxhajawagigira, Mosesga hingiwagaxwina, wang khinubhirera d’egi hijawi wahijungi egi ninkjang jushgunijau d’egi, egi khinubra hijawira gikanagnana egi khinubra ninkjang hagarninana.

²⁹ Egi kikhinubra shagowingi, egi jowejajega hinugkanakhi egi ninkjang jushgunijau d’egi.

³⁰ Egi hinubejajega kanagnana egi hishge ninkjang jushgunijau d’egi.

³¹ Egi hidanina kanagshana egi harnaj shesge hirena shagowihajega, egi inke ninkjang juiranina, egi d’airena.

³² Hahi hirowagni hinugjega hishge d’ena.

³³ Egi hakiha wankshig‐inegi hajanga e kanaikjanihawishe, hishagowinke kanaghirege?

³⁴ Egi Jesus wornigiharna, wawagena: Ninkjang maegi herera kikanagnakshana, egi kikanag wagiginakshana.

³⁵ Eshi jarnaga washinkisgairera ma‐she‐e ruxurughirena egi hakiha wankshig‐inekjanena, inke kikanag‐hiranikjanena egi shige inke kikanag wagigiranikjanena.

³⁶ Egi shige inke d’airanikjanena, waxopiniwarajirera wikisgairekjanena, egi Maura ninkjang warnikjanena, ninkjang hakiha wankshig ira hererekjanena.

³⁷ Egi d’arnagra kikawa‐ainena Mosesga xatabisha eja waharna, jaja Hirukanara higegi Abraham Mau harnira, egi Isaak Mau harnira egi Jakob Mau harnira.

³⁸ Inke Mau d’esha herenina, eshi niambanakshana, harnaj ningiambnankshana.

³⁹ Egi wowagax hiperesra hota hornihairena, wairena: Wawagaxhajawagigira phi wa’shena.

⁴⁰ Egi hageja inke wigiwax ruxurug‐hiranina.

⁴¹ Egi wawagena: Jasgegaja warnankshe Kristus Dawid hinigra heregaja?

⁴² Egi Dawid wena, Psalm wawagaxeja: Hirukanara wena: Hirukana harnira wagena, hoishoro haregi minagre.

⁴³ Jaja hornish’ighirera wanashiningigigi.

⁴⁴ Dawidga Hirukanara higena, jasgegaja hinigra herenaguni?

⁴⁵ Egi hironaghirera wawagena wankshignanka jowehireja naxguinekjege:

⁴⁶ Wowagax hiperesnagre eja hirakikarawiaje, e wonashi serej hornashi mani rogunagre, egi woruwieja hikaraghirera giphinankshana, egi waminag hankshi haminagnankshana, wohokhu‐hojhieja egi worujeja.

⁴⁷ Egi e hikanagit’e jhi‐warninera jeb‐wahinankshana egi Mau gikaraj serej unankshana wajairekjege, e washoshishig howera hijairairekjanena.