Lukga 18 - Winnebego Bible Portions 1907

¹ Egi washa hisgeraisha wirogiragshana e wagigusjege, wankshignagre hoishib gikaraj‐hirekjege egi inke rushjairanikjege.

² Wena: Jhinagisha ejanakhi eja waehisha nankshana, e inke Maura nakawarnina egi inke wankshigra hisha washinana‐inina.

³ Egi hinug hikanagit’eisha jhinageja nakshana, egi hinugjega hijajina, wena: Hinagijisheregi hinakarashikhi.

⁴ Egi s’i inke giunina, egi hageregi wakigena: Inke Maurashge nakawarninakaja, egi inke wankshigra washa wirana‐ininakaja.

⁵ Eshi hinugjane hawe‐winjegaja esge hagijitekje, e inke hoishib hiraijijanikje, unja‐u hahi hinjge‐winkjane.

⁶ Egi Hirukanara wena: Harnaxguwine waehi wowongnagre jagu era.

⁷ Egi jasgeshe Maura inke hiraijeraxji wagijiraninashe e waijanaga warnira, e hambga egi hahega giwarnagre, egi s’i wawigirus sirij‐janeshe?

⁸ Hornigitagwina, wagijirekjanena higuana xapge‐higikjanena. Egi jasge jaja Wankshig‐hinigra jigi ma‐egi harnaxgunank wiekjaneshe?

⁹ Egi washa hisgera de‐e ena, hota phi hiranakik’inankhi, egi hijanera wosh’ignankhi, wawagena:

¹⁰ Wankshigra nupiwi wohokhu‐hojhixetera howarairena, Maura gikaraj. Hisha Phariseisha herena egi hijanejega Publikan hisha herena.

¹¹ Pharisera nashina egi gikarajshana inekhi wakigena: Maura wainiginabshana inke wankshig hijanenagra hiaki‐garnira wankshigt’ehikera, wowongra, hinug‐hikshakshakera, egi Publikan de‐e hiakisgarnira.

¹² Haramihehamb‐hishanga nupaha hantaginaj‐shununa, washa warnira harnaj hikerepanaishara wagarna.

¹³ Egi Publikanra hirohari nashina, inke wangregi horuxuj rareshge unina, eshi mangra hokarajina, wena: Maura najungijane washa woishana u harnina.

¹⁴ Hornigitagwina wang de‐e hojhieja howakerena phiuinena, hijanejega inke shesgegigiranina. Jarnaga rokana hiranakik’ingi she‐e xununig‐hirekjanena, egi hisha xununig hakikaranigi e rokanakjanena.

¹⁵ Egi ninkjang xununigra hishge wagarni‐hajirena, wawikiokjege. Egi jaja hironaghirera wajairegi, najwisgirena.

¹⁶ Eshi Jesus wagigorna egi wena: Ninkjang xununigra hu‐wagigiwire hiraijirekjena, egi inke warogixiwinine, shesgera Maura hungma harnira harninena.

¹⁷ Hisgexjina hinigawina, higu peshe inke ninkjang xununig hikisgarnianaga, Maura hungma harnira rusnigi, inke hijokawarnikjanena.

¹⁸ Egi washirukanaisha wigiwaxshana wena: Hirukana phira, jasge hagi wankshighoi‐hisgejara duxuruigkjaneshe?

¹⁹ Egi Jesus wagena: Jagu‐u phi hinageshe? Inke hisha phiniankaja, Maurashana phina.

²⁰ Hiraperesrajegaja Maura woehi harnira: Inke hinughikshakshanine, inke wankshig d’ehinine, inke wamanunine, inke washa retunkwigarnine, hianjraga karaishagre egi hiuninaga.

²¹ Egi wena: Washa de‐e harnaj phiharna hixununigreja hipa.

²² Egi jaja Jesus washa de‐e naxgungi, wagena: Washaisha higu hinirujis‐rajena, washara jarnaga hashinigi wawikuruwine, egi wanajojaisgeja wawigiwenine, egi washa phira wangregi warakshu wash’unkjanena, egi hu‐arnaga hiroinagre.

²³ Egi jaja de‐e naxgungi, mashja najgerategshana, mashja hitajejege esge.

²⁴ Egi jaja Jesus hajagi mashja najgeratekhi, wena: Hitajenagre Maura hungma harnieja hokewera mashja gijexinankshana.

²⁵ Wanoijge huxashogra wiruxug hopoxeja hokewera e wogiwategnana egi wang hitajera Maura hungma harnieja hokewera e hiraijera gijexinankshana.

²⁶ Egi jarnaga naxgungi wairena: Peshe wankshighoi hisgejera harnikjeshe?

²⁷ Egi (Jesus) wena: Wankshignagre washara jarnaga inke ruxurug‐ninankhi, Maura ruxurugnakshana.

²⁸ Egi Peter wena: Horuxujre, harnaj washara wat’untawina, egi hironinagwina.

²⁹ Egi wawagena: Hisgexjina hinigawina, higu peshe jhira karat’unegi, shagwahira, wakhinubra, hijawira egi ninkjangnigra Maura hungma harnira hawau waungi,

³⁰ Ma‐egi roha wawirogi‐shuirekjanena egi ma‐joweregi wankshighoi hisgejara.

³¹ Egi nuphashanara wakaragigorna egi wawagena: Horuxujwire, Jerusalemra howainekjawina, egi washara harnaj prophetra wagaxhirena Wankshig‐hinigra wagairera, herekjanena.

³² Hirarujeja rushjane‐hirekjanena, egi igixjairekjanena, egi washingagairekjanena, egi hashoirekjanena.

³³ Egi washa pahi higipsinsh‐hirekjanena, egi d’ehirekjanena, egi hamb hitanihainja shige kikawa‐ankjanena.

³⁴ Egi washa de‐e inke hisha naxguinarnina, egi washa de‐e are nuxawa‐wagit’umbshana, egi jaguisha wagarnaki inke hiperes‐hiranina.

³⁵ Egi herena, Jerixo hiwusunsh jina, wang hishjarningisha eja minaganakshana naguijejeja, jhiokininakshana.

³⁶ Egi naxguna worohaxji eja howakhi, hiwaxshana jagu‐u waunankhi.

³⁷ Egi hogiraghirena, Jesus Nasaretheja herera eegi howakshana.

³⁸ Egi uwana, wena: Jesus Dawid Hinigra najungijane.

³⁹ Egi jarnaga joweja unankhi najisgirena, xapguni minaikjege. Egi e shige hiraijera mashja uwana, Dawid Hinigra neninegaja najungijane.

⁴⁰ Egi Jesus nashina, egi harnihuwire ena, egi jaja hiwusunsh higi higiwaxshana, wena:

⁴¹ Jaguisha ningiunkjaneshe? Egi wena: Hirukanara, wajhakjena.

⁴² Egi Jesus wagena: Wajare, harnaxgu hashinira nigijirena.

⁴³ Egi higuana wajarna egi hironagshana, Maura rajanggankshana egi wankshigra harnaj jaja hajairegi Maura rajanghirena.