Lukga 13 - Winnebego Bible Portions 1907

¹ Egi eja hisge unankshana hogiraghirena Galile wankshig wagairena e Pilatus (d’ewahina) nabhoruxaj harninera wa‐i kirupana wagigina.

² Egi Jesus horniharna, wawagena: Galile wankshig de‐e washa woishana ura eshana hiraijera hireguni Galile wankshig hijanenanka hirarawishe, washa hawera shesgairegi esge?

³ Inka‐a hornigitagwina, eshi inke najgera rakarategwinigi, hishge harnaj shesge shjekjanihawina.

⁴ Egi haruangashana de‐e jhi‐hankshi hissawara Siloameja hashibrairena egi d’ewahina, she‐e jarnaga Jerusalem‐eja jhiakhi eshana washa woishana ura hiraijeraireguni hirarawishe?

⁵ Inka‐a hornigitagwina, eshi inke najgera rakarategwinigi, hishge harnaj shesge shjekjanihawina.

⁶ Egi hisgera de‐e ena: Hisha Fig‐naisha habsinsh maxeja hoshuna, egi hija hianaga egi has hornina, egi inke washi‐enina.

⁷ Egi habsinsh max hirakarara wagena: Horuxujre, ma daniha has warnianjira Fig‐na de‐e, egi inke washa hiaenina. Giwangre, jagu‐u waunjeguni manra hokirashirihijena?

⁸ Egi horniharna egi wena: Hirukanara ma de‐e shegu jekjena, hogigix papurukjena egi wakere washukjena.

⁹ Egi has haminagkhi phinkjanena, egi inke shesgarnigi, hagenigi raiwainkjena.

¹⁰ Egi Sabath hambregi wohokhu‐hojhieja washa wagigusjena.

¹¹ Egi horuxujre, hinugisha eja jena naxirag shishig harninena hixgana rushag, ma kerepanaishanaga‐haruangashana, egi wakhu hogosh‐shana, egi inke roja khiruxurugnina.

¹² Egi jaja Jesus hinugjega hajagi, hinugjega gigorna, egi wagena: Hinugra hixga rushag hashinira nishgarekjena.

¹³ Egi Jesus nab harnira hinugjega hihageja hat’umbshana, egi higuana roja hina, egi Maura rajankjirena.

¹⁴ Egi wohokhu‐hojhi hirukanara wogiteg horniharna, Jesus Sabath hambregi hisha rushja hige esge, egi wankshigra wawagena: Hambra akeweha hajena, wankshigra hambeja warairekjege, esge hambeja hajiranaga egi rushjakhiwine egi inke Sabath hambeja.

¹⁵ Hirukanara hornigiharna, egi wagena: Hipokritra ranina, jasge inke jarnaga raniwina Sabath hambregi jhe warninera shige shungxetenajawaxete warninera wanoijge hornashieja wagirushgarninankshe, egi warutirarnaga ni wogarninankshe?

¹⁶ Egi hinug de‐e Abraham hinugra esherena, e Satan rusgij‐hirena, hajare ma kerepanaishanaga‐haruangashanaka, jasge inke Sabath hambregi wirusgij de‐e rushge phinishe?

¹⁷ Egi jaja washa de‐e e‐gi, hakiranankhi harnaj hiroshighirena, egi wankshigra harnaj wogishawairena, washa xete phira harnaj wagiunge esge.

¹⁸ Egi wena: Jaguisha Maura hungma harnira hikisgeshe? Egi jaguisha hikisgehashe hihajeshe?

¹⁹ Mustard sura hishankira hikisgena, wankshigisha russana, egi max earnieja hoshuna, egi axebshana, egi hahi na xetexjina, egi ahuirassa wangregi herera najega akarajgera hojhirena.

²⁰ Egi shige wena: Jaguisha Maura hungma harnira hikisgehashe hihajeshe?

²¹ Winawohi hikisgena, e hinugisha rusanaga egi wigus dani waisgabra hirokishurna hahi harnaj nawonakshana.

²² Egi jhinagra egi jhinag xununigra wowarena washa wagigus egi hikiware Jerusalem sanig‐eapahirena.

²³ Egi hisha wagena: Hirukanara jarnagkira wankshiginkjaneshe? Egi wawagena:

²⁴ Hiunjaxjine jhirob hokirashirira hokewena‐ianje. Hinigawina roha hokewena‐inkjanena, egi inke ruxurughiranikjanena.

²⁵ Jaja jhi hirukanara nashingi, egi jhirobra hornassegi, egi jangeja nanashi harajekjanena, egi jhirobra raikoikjanihawina, wa’shekjanihawina: Hirukanara, hirukanara higiruhaswire, egi hornihakjanena egi warnigekjanihawina: Inke hinipereswinina hajinja horawarajiwigi.

²⁶ Egi wa’sharaji‐sherekjanihawina: Waruj egi rajga joweraregi harnikishu hauwina, egi nagu warniwieja hoirakhuwina.

²⁷ Eshi wekjanena: Hornigitagwina, inke hinipereswinina hajinja horawarajiwigi, nigiowakarawire harnaj, wore wowonk u‐anajane.

²⁸ Eja hoxagra‐herekjanena egi hirusgesgexji, jaja Abraham hashjawigi egi Isaak egi Jakob egi prophetra harnaj, Maura hungma harnieja, egi nexji jangronit’urainekjanihawina.

²⁹ Egi wiaxebhuregi egi wioireregi, egi wioweshguniregi, egi wiorojonjeregi howajirekjanena egi Maura hungma harnieja minaghirekjanena.

³⁰ Egi horuxujwire, hirowagninanka e hahi jornira hererekjanena, egi jorninanka e hahi hirowagni hirekjanena.

³¹ Hambeja Pharisera eja hisge hajirena, wagairena: Hihinabre, egi nigiowakarare, Herodesga d’enikjanege esge.

³² Egi wawagena: Karawire, egi washerekesi she‐e hogiragwiaje, horuxujre, waxopinishishig jangra wat’untena, egi rushjawahakjanena hamb de‐e egi hainigi egi hamb hidanihangi waishibjanena.

³³ Jasgegi hamb de‐e egi hainigi egi eja hainigi hiakiparekjanena, inke prophetra hisha Jerusalem jangeja d’ehi ruxurug hiraninara esge.

³⁴ Jerusalem, Jerusalem e prophetra d’ewahina egi ini wiraisagshana eja howarewagigirera, hoja jarnaha ninkjang washinira stowaharnaiguni, bagawaxge hinugra ning‐warninera ahu khuhainja sto‐wakshuireshunura shesge, egi inke sh’uwinina.

³⁵ Horuxujwire, jhi hashiniwina maisinsh‐nigigirawina, egi hisgexjina hinigawina, inke hinshjarnikjanihawina hahi heregi wa’shekjanihawina: Rajangwire Hirukanara rash harnira e hiunjina.