Johnga 8 - Winnebego Bible Portions 1907

¹ Jesus Oliw‐xe eja hina.

² Egi hainixjinig shige kirina wohokhu‐hojhixeteja egi wankshigra harnaj hirahirena egi minaganaga egi washa wagigussana.

³ Egi wowagax hiperesra egi Pharisera hinugisha hagarni hahirena, hinugjega washa wowonk‐uanku harukos‐hirege, egi jaja hokissageja kereregi,

⁴ Wagairena: Hirukanara, hinug de‐e hojishana washa wowonk‐unaku hawajairena harukos‐hirena.

⁵ Egi Mosesga woehira uishiwina deshesgera ini wigissaghirekje ena: Egi jagu hisheshe?

⁶ De‐e wairena hokit’une nangi‐ine, E washa hiraraj hirekjege. Egi Jesus wakhuna egi nabra hik’uanaga mainja wagaxshana inke warnaxgu kik’uni.

⁷ Egi higiwaxra inke rashjainanigi E minag‐kirinakshana egi wawagena: Hisha inke washa woishana sh’uni harajegi e inira jorni hinugjane hirojiwine.

⁸ Egi shige wakhuna, egi mainja wagaxshana.

⁹ Egi jarnaga naxgungi, hikiperes hiena wewinegi washa woishana unagra, hinikehi hihinabhirena, xetera jorni egi unank’u harnaj hihinabhirena. Egi Jesus inekhi d’unairena egi hinugjega hokissageja nashinjena.

¹⁰ Egi Jesus minag‐kirinakshana, egi inke hisha hajarni, hinugrashana hijajena, E hinugjega wagena: Hinugra, hajinjanankshe hiraninaj‐nagra? Inke hisha washinohire heweninikjaneshe?

¹¹ Hinugjega wena: Inke hisha, Hirukanara. Egi Jesus hinugjega wagena: Nishge inke washinohire ningiunikjanena. Karare egi inke hinupahana washa woishana unianje.

¹² Egi Jesus shige hit’et’era wawagena: Manegirera hohambra Newinena. Hisha hiroinakhi inke hokawaseja maninikjanena, eshi homamb wankshighi‐ihakjanena.

¹³ Pharisera esge wagairena: Nexji horakikarag rajegaja, horakikaragra inke wogisognina.

¹⁴ Jesus horniharna egi wawagena: Ne wakikarag hajanunige, wotaghajane hisgexjina. Hajinja wawajira hiaperes‐hajege esge, egi shige hajinja wawatera. Eshi inke horag‐shuruxurugwinina hajinja wawajira, egi hajinja wawatera.

¹⁵ Woehi‐sh’uharajawina roregi, inke woehi hisha hagiuniajena.

¹⁶ Woehi‐hauhajegi woehi harnira wogisognana, inke inekhi harninina, eshi Newineanaga egi Hianjihiwira E huigigina.

¹⁷ Hishge woehi hashiniwira wagaxankshana wankshigra nup worag harnira wogisogshana.

¹⁸ Ne‐shawinena wakikarag hajane, egi Hianjihiwira E huingigira hunakshana.

¹⁹ Egi wagairena: Hianjraga hajinja‐nakshe? Jesus horniharna: Inke hinaperes‐winigaja, hishge Jajiga inke hiraperes‐winigaja. Hinaperes‐wigishi, Jajiga hishge hiraperes‐wishgunina.

²⁰ Hoit’e de‐e Jesus jhiakohi shuroshueja wena, wohokhu‐hojhixeteja washa wagigusjane. Egi inke hisha nabrehinina, howagix earnira kheni jinige esge.

²¹ Egi Jesus shige wawagena: Nagu harnira wawakerekjanena, egi hunanikjanihawina, egi washoirohirera wakarani‐shjekjanihawina. Hajinja wawategi inke hija hi‐shuruxurug‐nikjanihawina.

²² Esge Judra wairena: D’e‐khinkjaneshe? Hajinja wawategi inke hishuruxurug‐nikjanihawina are esge?

²³ Egi wawagena: Khuhanegi horawarajiwina, wangregi wawajina. Ma‐degi ninewina, inke ma‐degi winenina.

²⁴ Esge wanigawina, washoirohirera wakarani‐shjekjanihawina. Inke harnainaxguwinigi she‐e Newinera, esge washoirohirera wakarani‐shjekjanihawina.

²⁵ Egi wagairena: Peshe nineshe? Egi Jesus wawagena: Jornineja jagu hornigitagwira.

²⁶ Washara roha hinigekjanihawina, egi washara roha woehi‐nigiunkjanihawina. Egi hisha huingigira wogisogshana, egi jagu E naxgura, she‐e managre hirowakit’e hajena.

²⁷ Inke naxguinanina Hianjihiwira E wirowakit’ajera.

²⁸ Esge Jesus wawagena: Jaja Wankshig‐hinigra shuruawigi, eegi hiraperes‐janihawina Newinera, egi inke washanisha Newaunina, eshi jasge Jajiga washingigusra shesge hihajena.

²⁹ Egi E huingigira hakishu ha‐uanjena, Hianjihiwira inke inekhi hit’unanijena, jasge giphira hoishib ha‐uanjena esge.

³⁰ Hoit’era deshesge e‐gi, roha harnaxguna.

³¹ Egi Jesus Judranaka harnaxgunega wawagena: Hoit’e harninegi sh’uanajegi, hisgexji Ne wironag harninikjanihawina.

³² Wogisogra hiraperes‐hikjanihawina, egi wogisogra hikikurukana nigiunkjanihawina.

³³ Hornigihairena: Abraham su warnira newinewina, egi inkaga hisha warnihi hiuinawinina, jasgegaja wa’sheshe hiakikurukana‐kjanihawishe?

³⁴ Jesus wornigiharna: Hisgexjina, hisgexjina hinigawina, higu peshe washa woishana ungi, washa woishana warnihi waunjanana.

³⁵ Egi warnihira inke manegus jhieja unanikjanena, eshi Hinigra manegus hijaunkjanena.

³⁶ Esge Hinigra hikikurukana nigiunkjanihawina, hisgexji hirakikurukanakjanihawina.

³⁷ Hiapereshajena Abraham su warnira neninewira, eshi d’eina‐nanash’iwina, hoit’e harnira inke harnainagixguwinige esge.

³⁸ She‐e wagajena jagu Jajiga eja hajhara, egi shesge rarajawina jagu hianjwarawiga eja hashjawigi.

³⁹ Hornigihairena egi wagairena: Abraham hianj‐hawira herena. Jesus wawagena: Abraham e ninkjang harniniwingi, Abraham wore harnira sh’u‐harajawinana.

⁴⁰ Eshi shegunegi d’eina‐nanash’iharajena wankshig hisha wogisogra hornigiragwira, e Maura eja naxguna, Abraham inke shesge hinina.

⁴¹ Hianjrawiga wore harnira sh’u‐harajena. Egi wagairena: Inke wakeg hojaina wankshig‐ha’iwinina. Hishankira hianj‐hawina Maura.

⁴² Jesus wawagena: Maura ne‐hianjrawigi woiragixetewinana. Maura eja hiahinab huna egi eja wawajina, inke nexji kik’u‐hunina, eshi E huigigina.

⁴³ Jagu‐u inke hiat’at’ajane nainaxguwinishe? Inke hoit’e harnira naxgu shuruxurug‐winige esge.

⁴⁴ Hianjwarawiga waxopinishishig hirena, hianjwarawiga jagu roguinera, sh’u‐harajawina. E jeghojikere‐hieja wankshigd’ehina, egi inke wogisogra eja unijena, inke nige wogisogni jege esge. Jaja hit’et’ega ret’unk, e hit’et’era hik’unjena. Ret’unkeisherena, egi ret’unkera hianjhirena.

⁴⁵ Egi wogisogra hornigitag hajege esge inke harnainaxguwinina.

⁴⁶ Egi hajanga hunagisharaikjanihawishe washa woishanara hisha ha‐uanjegi? Egi wogisogra hihajegi, jagu‐u inke harnainaxguwinishe?

⁴⁷ Hisha Maura earnigi, Mau hoit’era naxgunana, esge inke nanaxguwinina inke Maura earniniwinige esge.

⁴⁸ Egi Judra hornihairena egi wagairena: Inke phiwahawininashe Samarit‐wankshig‐ranina, egi waxopinishishig hisha hashinina?

⁴⁹ Jesus horniharna: Inke waxopinishishig hisha harninihajena, eshi Jajiga hakaraish’ag hajena, egi inkinaish’agwinina.

⁵⁰ Egi inke Ne gloria wakinini hajena, hisha hornijena egi woehi‐unjena.

⁵¹ Hisgexjina, hisgexjina hinigawina, hisha hoit’e hihare hingiungi inke hot’e hajarnikjanena manegus.

⁵² Egi Judra wagairena: Shegunegi hiaperes‐wigaja waxopinishishig hisha hashinirajera. Abraham d’egaja, egi prophetra, egi hishena: Hisha hoit’e harnira hingiungi inke hot’e harajabenikjanena manegus.

⁵³ Ne hiranijerashe hianj‐hawira Abraham, e d’ena, egi prophetra d’airera, peshe hererakhi wa’sheshe?

⁵⁴ Jesus horniharna: Ne hakish’akhi, gish’ag harnira inke washinkisgarninana. Jajiga hingish’agshana, E Mau hashiniwishe hi’shawira.

⁵⁵ Egi inke hirapereswinina, de‐eshi hiaperessana, egi inke hiaperesnina hihegi, reat’unkshgunina hinikisgawishgunina, de‐eshi hiaperessana egi hoit’e earnira hagiuanjena.

⁵⁶ Hianjrawiga Abraham wogishawana hamb harnira hajara, egi hajarna egi wogishawana.

⁵⁷ Esge Judra wagairena: Kheni ma kerepana‐saja raninigaja, egi Abraham hashjashe?

⁵⁸ Jesus wawagena: Hisgexjina, hisgexjina hinigawina, kheni Abraham hereni, winena.

⁵⁹ Egi ini rus‐hiranaga hirojinainena, eshi Jesus nuxawana egi wohokhu‐hojhixeteja hihinabshana, horogra howakerena egi deshesge hiwaixarna.