Johnga 6 - Winnebego Bible Portions 1907

¹ De‐e hagregi Jesus nigiowarena Galilea tera harujena Tiberias tera higairena.

² Egi worohaxji Jesus hironaghirena, wowakanjangra hagijairege, howashairegi eja waunge esge.

³ Egi Jesus xe‐higageja howarena egi eja minagshana hironaghirera wakarakishu.

⁴ Egi Pasxa‐woruj Judra harninera herehikorohorna.

⁵ Egi Jesus jambshana, egi wajarna worohaxji eja hahuhairegi, Philipga wagena: Hajinja waisgabduj hinuwinkjanihawishe, de‐e waruj‐hiranana?

⁶ Egi de‐e hiunjage wena. Exji jagu unkjanera hiperesjena.

⁷ Philipga hornigiharna, Denaria hogihinup hikisge waisgabdujragi inke hina hiraninana harnaj xunuhinigshana rus‐hireshgunina.

⁸ Hironagananka hisha wena, Andreas Simon Peter khinubra:

⁹ Hojinjinig hisha egi unjera, waisgab‐sinshserej horok’ira saja harnijena, egi ho xununigra nup harnijena. Sheeshi washashe worohaxji‐gaja.

¹⁰ Egi Jesus wena: Wankshigra minag wagigiwire, xawijora eja ju‐ankshana. Egi wangra minaghirena, ejaxji hogihixete sajanguni.

¹¹ Egi Jesus waisgabdujra warussana, egi wainabrashjangi, hironagananka wawigiwenina egi hironagananka minagwagigirega wawigiweninena egi ho‐xununigra shige hiwenirena jarnaga giphinegi.

¹² Jaja wainaj‐hiregi, Jesus hironagananka wawagena: Sto‐wahiwire hoxjugra hotagi, inke washa xawaninikjena.

¹³ Esge sto‐wahirena egi napanra kerepanaishanaganuphashana hoixjina, waisgab‐sinshserej horok’ina sajanka eja hoxjugra howaji, waruj rushjainegi shenaga rushaghirena.

¹⁴ Egi wankshigananka hajairegishi wowakanjangra Jesus ungi, wairena: De‐e wogisogji prophet e heregaja, jasgegi manegi jikjane airera.

¹⁵ Egi Jesus wajarna, hajiranaga egi hinirus‐hiranaga, hung uinekjanege, shige xe‐hihageja inekhi howarena.

¹⁶ Egi jaja hoxjarnagi hironagananka harukanag‐hiranaga tera howarairena.

¹⁷ Egi waj‐isha eja hominaghirena egi te‐agra Kapernaum sanig eowarairena. Egi shegunegi hokawassana, egi Jesus inke wirahiniankshana.

¹⁸ Egi tera hixgana maintajehira rokana hakirige esge.

¹⁹ Egi niwa hahirena ejaxji kerepananup‐anaga‐sajahashana, nigeshge kerepanadani Stadia (wigus dani jop) hahiregaja, hajairena Jesus teja maniankshana, egi wajra haruxa hiwusunsh howarena, egi naxirairena.

²⁰ Egi wawagena: Newinena, inke naxirawinine.

²¹ Egi wajeja hominag nangi‐inena, egi higuana wajra moroija haunina hajinja howarairegi eja.

²² Haininegi wankshig te‐ageja unangra hajairena, inke eja waj hijahina hishangenira, eshana herena Jesus hironaghirera waj hominaghirera, egi Jesus inke hironaghirera wakishu hominagnira waj‐eja, hironaghirera inekhi nige‐howarairena.

²³ Nunige waj hijahi hajirena Tiberias eja howajirena, hajinja waisgab horuj‐hirera hiwusunsh eja, hageja Hirukanara wainabra.

²⁴ Jaja wankshigra wajairegi Jesus inke hija unijegi eja, egi shige hironaghirera inke hija uninankhi, hishge waj‐eja hominaghirena egi Kapernaum eja hahirena, Jesus horni.

²⁵ Egi jaja hieregi te‐ageja, wagairena: Rabbi jajanane rajishe?

²⁶ Jesus wornigiharna egi wena: Hisgexjina, hisgexjina hinigawina, hunaniharajane inke wowakanjang haura hashjawira esge wash’uwini, eshi waisgab horok’in rajwira egi wa’ininajwira esge wash’urajiwina.

²⁷ Inke waruj d’arnankhi ruxurugnaiwinine, waruj hisha she‐e inke shena phiniagra ruxurug‐naiwine wankshighoi hisgejagra she‐e Wankshig‐hinigra hornik’unkjanihawina, Maura Hianjihiwira E wijanti‐una.

²⁸ Esge wagairena: Jagu hauwingi, Mau worera hauwinagi?

²⁹ Jesus horniharna egi wawagena: De‐e Mau worera herena hisha jigigira E harnanaxguwingi.

³⁰ Egi esge wagairena: Woijanti jaguisha sh’unkjaneshe, harnijawigishi egi harnanixguwinana, woshga jagu sh’unajeshe?

³¹ Hianjwahawira mojainainja Manna ruj‐hirena, shesge wagax‐hirena: E ruj‐hirekjege waisgab wangregi howaji wogarna.

³² Egi Jesus wawagena: Hisgexjina, hisgexjina hinigawina, Mosesga inke waisgab she‐e wangeja howaji hornik’uwinina, eshi Jajiga waisgab wogisog hornik’uwina wangregi howaji.

³³ Eshi Maura waisgab harnira erena E wangregi howajina, egi maneginagre wankshighoi wogarna.

³⁴ Egi wagairena: Hirukanara hoishib waisgab de‐e hunk’uwianje.

³⁵ Egi Jesus wawagena: Newinena waisgab niambra, hisha hiraijigi inkaga dokewe‐hinikjanena, egi hisha harnaixgungi inkaga iwus‐inikjanena.

³⁶ Egi hinigawishare, egi hinshjara‐jawinunige egi inke harnainaxguwinina.

³⁷ Jarnaga Hianjihiwira hunk’ura hiraijirekjanena egi she‐e hiraijiregi inke jangra wat’untanikjanena.

³⁸ Eshi manegi hajina, wangregi wawajina, inke woshganira hauanjinina, eshi hisha huingigira woshganira wagiuhajina.

³⁹ Egi de‐e Hianjihiwira woshganira herena E huingigina, jarnaga hunk’ungi inke hisha xawarni‐harnikjanena eshi phihi shige wankshig‐inekjanena hamb hirowageja.

⁴⁰ Egi woshgara de‐e herena hisha huingigira, jarnaga Hinigra hajagi egi harnaxgungi, wankshighoi hisgeja unana, egi phihi wankshig‐ihakjanena hamb hirowageja.

⁴¹ Judra shejananegi haehirena, waisgabra Newinena wangregi wawajina hikigege esge.

⁴² Egi wairena: Inke Jesus de‐e Josephga hinigra herenisha, hianjra egi hiunira hiwiperes‐wigaja, jasgegaja weguni wangregi wawajina are?

⁴³ Esge Jesus horniharna egi wawagena: Inke haewiwinine.

⁴⁴ Inkisha hiraijininana Hianjihiwira E huingigira inke rutinigi, egi phihi wankshig‐ihakjanena hamb hirowageja.

⁴⁵ Prophetra wagax‐hirena: “Egi harnaj Maura wagigusjanena, esge wankshigra jarnaga Hianjihiwira naxguinera egi hiperes‐hirera e hiraijirena.”

⁴⁶ Inkisha Hianjihiwira hajarnina, eshana Maura eja howajira, E Hianjihiwira hajarna.

⁴⁷ Hisgexjina, hisgexjina hinigawina, hisha harnaixgungi wankshighoi hisgeja unana.

⁴⁸ Waisgab she‐e niambra Newinena.

⁴⁹ Hianjwarawiga mojainainja Manna ruj‐hirera egi she‐eshge d’airegaja.

⁵⁰ Waisgab de‐e E wangregi howajina, hisha she‐e rujgi inke d’arninana.

⁵¹ Waisgab niambra Newinena, E wangregi howajina, hisha waisgab de‐e rujgi manegus niaimbjanena, egi waisgab hornik’unk‐jarnihawire ro harnira herena, E wagakjanena maneginagre wankshighi‐inekjanena.

⁵² Judra esge kikitakhirena wairena: Jasge hiarnaga wang de‐e rora wangok’uwianaga hinuj‐janihawishe?

⁵³ Egi Jesus wawagena: Hisgexjina, hisgexjina hinigawina, inke Wankshig‐hinigra rora rajwinigi egi wa‐ira sharajgawinigi, inke wankshig‐shiwininana.

⁵⁴ Higuisha ro harnira rujgi egi wa‐i harnira rajgangi, wankshighoi hisgeja unana, egi phihi wankshig‐ihakjanena hamb hirowageja.

⁵⁵ Ro harnira hisgexji waruj hisha herena egi wa‐i harnira hisgexji rajga phina.

⁵⁶ Hisha ro harnira rujgi egi wa‐i harnira rajgangi hunjhikjanena egi wajhikjanena.

⁵⁷ Hianjihiwira niambanagra shesge hikisge huingigina egi Hianjihiwira wankshighia‐ina, nishge shesgarnana hisha hirujgishi e wankshighi‐inkjanena.

⁵⁸ De‐e waisgabra herena, E wangregi howajina, inke hianjwarawiga Manna ruj‐hirera hikisgarnina egi sheeshge d’airegaja. Hisha waisgab de‐e rujgi manegus wankshig‐inkjanena.

⁵⁹ Washa de‐e are wohokhu‐hojhieja wena, Kapernaum‐eja washa wagigus wena.

⁶⁰ Esge hironaghirera roha jaja de‐e naxguinegi wairena: De‐e rokana wegaja, peshe naxgu ruxuruigjeshe?

⁶¹ Egi Jesus hikiperes‐shana hironaghirera haegiginankhi, wawagena: De‐e wogitegniwishe?

⁶² Jasgarnashe, Wankshig‐hinigra wangrowakere hashjawigi, hajinja jorni hounjera eja?

⁶³ Naxiragra wauna wankshig‐iwahijera, ronagre inke washophi ruxurug hiranikjanena. Hoit’e hinigajane naxirag wagajena egi wankshighoi wagajena.

⁶⁴ Eshi hota inke harnanaxguwinina, Jesus hiperesjena jeg‐hojikerejareja peshe inke harnaxgunikjanera egi peshe himanaikjanera.

⁶⁵ Egi wena: Esge wanigawina inkisha hiraiji ruxurugnina, inke Jajiga wogarnigishi.

⁶⁶ Epa hironaghirera roha hakja kerena, egi inke hinupahana hakishu maninanina.

⁶⁷ Egi Jesus nup‐hashananka wawagena: Nishge nige horawara‐kerekjanihawishe?

⁶⁸ Egi Simon Peter horniharna wagena: Hirukanara, peshe eja wawatekjanihawishe? Manegus wankshighoi hoit’era hashinirajegaja.

⁶⁹ Egi harnanixguwina egi wogisog hiaperes‐hajena, Ne Kristus Mau niambra Hinigra Neninera.

⁷⁰ Jesus wornigiharna: Inke nup‐hashanara nijawinishe, egi hisha waxopinishishig raniwina?

⁷¹ Judas Iskariot, Simon hinigra ewagena, erena himanaikjanera, nup‐hashanara esherena.