Johnga 5 - Winnebego Bible Portions 1907

¹ Hagregi de‐e Judra worujxete uinena, egi Jesus Jerusalemra howarena.

² Egi Jerusalem‐eja jhasga jhirobeja tenigisha nankshana, Hebrai hit’era Bethesda higairena, eja jhiakohi serejra saja hahankshana.

³ Jhi degi wankshig howashara mashja roha hoshuirena, hishjaningra, manirush’agra, takasserera, nira hixgankjanegi hapenankshana.

⁴ Hagaira waxopiniwarajire hajiranaga tenigananka eja nira hixga hireshunuge esge waunankshana. Nira hixganga hageja peshe jorni nieja nashinga rushjashununa, howasha jagu unisherega.

⁵ Egi wangisha hijagshana, ma kerepanadani‐hanagaharuwang‐ashana howasharna.

⁶ Jesus hajarna mingankhi, hiperes‐shana sirejaxji shesgagra, wagena: Ninushja roragushawankshe?

⁷ Wang howashaka horniharna: Hirukanara, inke wankshig hijunina, jaja nira hixganga tenigeja hunt’umbhirekjera, egi tahau hijanera e jorni nieja nashineshununa.

⁸ Jesus wagena: Kikawa‐ane, homigra kurusanaga egi manine.

⁹ Egi higuana wangra rushjahina egi homigra kurusanaga egi manina, egi hambeja Sabath‐jena.

¹⁰ Judra esge wagairena rushjangishi: Sabath hambjena, woehieja ronigixirena homigra rakuruashawank.

¹¹ Wawornigiharna: Hisha rushjawina, e waigena, homig hashinira kurusanaga egi manine.

¹² Egi higiwaxhirena: Wankshig jaguisha weshe, homig hashinira kurusanaga egi manine hinigegi.

¹³ Egi wangrushjahirega peshe waungi inke hiperesnina, Jesus nige‐howarena, eja wankshigra rokanaxjinge esge.

¹⁴ Hagregi Jesus hiena, wohokhu‐hojhixeteja egi wagena: Horuxujre ninushjana, inkinupahana washa woishana unianje, nigete washa shishig hiraijera horawege.

¹⁵ Wangjega nige‐howakerena egi Judra wogiragshana, Jesus waura rushjahirega.

¹⁶ Egi esge Judra Jesus washa gishganainena egi d’ehinainena, de’e Sabath hambregi waunge esge.

¹⁷ Egi Jesus wornigiharna: Jajiga jajanaga waranakshana, egi nishge watajena.

¹⁸ Esge Judra hiraijera d’ehinainena, inke eshana Sabathra higishananinge egi shige Maura hianj hishe era, Maura hikisge khina.

¹⁹ Jesus horniharna egi wawagena: Hisgexjina, hisgexjina hinigawina, Hinigra exji inke washa u‐nuxurugnina, Hianjra jagu u‐anjaga washanisha unga, de‐e hishge Hinigra unjena.

²⁰ Hianjihiwira wogixetejena Hinigra, egi giwahajena washanisha unga harnaj, egi giwahakjanena worera hiraijeraxji de‐e nikhorekjanihawina.

²¹ Egi Hianjihiwira d’era kikawa‐awahigi egi niambwahigi, hishge Hinigra peshe giphingi niamb‐hikjegi unana.

²² Hianjihiwira inke hisha woehi‐higiunijena eshi woehira harnaj Hinigra harnigigina.

²³ Wankshigra harnaj Hinigra gish’aghirekjanena, Hianjihiwira hoish’agra hikisgekjanena. Hisha Hinigra inke gish’agenigi, Hianjihiwira inke gish’aginikjanena, E hugigina.

²⁴ Hisgexjina, hisgexjina hinigawina, hisha hoit’e harnira naxgungi, egi hisha huingigira E harnaxgungi wankshighoi hisgeja unkjanena, egi inke washinohire howe hireja hinikjanena, eshi hot’era haixarnaga egi wankshighoi hisgeja unkjanena.

²⁵ Hisgexjina, hisgexjina hinigawina, howagixra jikjanena, egi shegunegi herena, jaja d’era Maura Hinigra hora naxguinegi, egi she‐e naxguinegi niamb‐hirekjanena.

²⁶ Hianjihiwira hikisge wankshighoira exji harninagra herenakshana, shesge Hinigra hokarak’una wankshighoira exji harnijena.

²⁷ Egi homashjara hokarak’una woehi una Wankshighinigra erege esge.

²⁸ Inke khoranine de‐e, howagixra jikjanena eja wanaxiomigeja nankhi harnaj Maura Hinigra hora naxguinekjanena.

²⁹ Egi khikawa‐a‐hirekjanena, jarnaga she‐e phihigi manegus wankshig‐inekjanena, egi jarnaga she‐e inkephihiranigi manegus hawe wankshig‐inkjanena.

³⁰ Inke nexji washara hisha u‐duxurugnina. Jasge naxguna haeha‐hajena egi woehi harnira phixjisha herena. Inke woshga harnira warninihajege esge, eshi Hianjihiwira woshga harnira warnihajena E huingigige.

³¹ Ne wakikarag hajegi, worag harnira inke wogisogninana.

³² Hijaneshe E hunakshana egi hiaperessana she‐e woragra E hunagra wogisogshana.

³³ Johnga eja hi‐waragigiwira, egi e wogisogra hornigiragwina.

³⁴ Inke wankshigra hunaghirekje roagunihajena, eshi washa de‐e hihena phi‐wankshig‐shinkjanihawina.

³⁵ Johnga hatasha tae rukanakanab hisha herejena, jowexjinig hohamb harnieja wornigishawa nanash’iwina.

³⁶ Ne hiraijera horaghire harnianjena Johnga hunagra worujis‐shana, wore Hianjihiwira E hunk’ura haunkjege, wore de‐e hauanjane hunaganankshana, Hianjihiwira huingigira.

³⁷ Egi Hianjihiwira E huingigina, exji hunakshana. Inkaga hora nanaxguwinina egi inkaga jasgarnakhi hashjawinina.

³⁸ Egi hoit’e harnira inke eja hiniwushani‐hajena, hisha hugigira inke harnanaxguni harajege esge.

³⁹ Wowagaxra wessiwianje, eja wankshighoi hisgeja hashiniwiguni hirarawigi, egi she‐e hunagankshana.

⁴⁰ Egi inke hirairaji nanash’iniharajena, ne wankshighoi hisgeja sh’uwinana.

⁴¹ Inke gish’aghire dusnianjena wankshigeja,

⁴² Egi hiniperes‐hajena Maura wogixetera inke horniunianjena.

⁴³ Ne hajina Jajiga rash harnira harni, egi inke hishuruswinina, hijanera hisha jigi rash earnira hakaranijigi e shurus‐wishgunina.

⁴⁴ Jasgerawianaga harnanaxguwinaguni, hijanehihi rakhish’ag shurus‐harajena, egi hoish’ag Maura eja howajirashana inke horaniniharajena?

⁴⁵ Inke hiranitaijanihawi hirawinine Hianjihiwira eja, eja hisha hiraninaijanihawina Mosesga, hinanashiwira.

⁴⁶ Mosesga harnanaxguwigi, hishge harnainaxguwinana, e haewi wagaxshana.

⁴⁷ Egi inke wowagax earnira harnanagixguwinigi, jasgerawianaga hoit’e harnira harnanaxgunkjawi?