Johnga 19 - Winnebego Bible Portions 1907

¹ Gajanga Pilatus Jesus russana egi wigipsinsh washa pahi hiroishgesha higipsinsh‐shana.

² Egi manapera napahi hirakhiweja hung wokanag hisha uinena, egi nassu hihageja hagikanag‐hirena, egi wonashi shuj hisha hogiwaxug‐hirena.

³ Egi wairena: Wogishawa hinikaragiwina Judra hung harninera, egi hojinena nabra wik‐uinanaga.

⁴ Pilatus shige hihinabshana egi wawagena: Horuxujwire harni hinigi‐hinabwina, hiraperesjawige, inke washinohirera hisha hiagienira.

⁵ Egi Jesus hihinabshana, hung‐wokanag‐waxagara hokanaganaga egi wonashi shuj hornashi. Egi Pilatus wawagena: Horuxujwire wankshigjane.

⁶ Jaja nabhoruxaj hirukana hungra egi ware warninera hajairegi mashjint’at’airena wairena: Naramiheja haisarajre, naramiheja haisarajre. Pilatus wawagena: Ruswire egi naramiheja haisarajwire, inke washinohirera hisha hiagieninunige.

⁷ Judra hornigihairena: Woehisha harniwira egi woehi harniwira eja hot’e kikuruxurugshana, Maura Hinigra e‐here kik’unjege esge.

⁸ Jaja Pilatus shesge aire naxgungi, hiraijera nakewena.

⁹ Egi shige woehi hojhi hoxorojikeja hoikewena, egi Jesus wagena: Hajinja horawarajishe? Egi Jesus inke hornigiharnina.

¹⁰ Esge Pilatus wagena: Hanke hunakit’arnikjaneshe? Jasge inke hinaperesnishe, homashja harnira naramiheja harnisarajnana, egi homashja harnira ningitushjareharnana?

¹¹ Jesus horniharna: Inke homashja washa hashininina hakirai‐shuruxurugnina, inke wangregi howaji hornik’uinanigi. Esge e hinushjahuhirena e washa woishanara hiraijera harninankshana.

¹² Egi shejaixji hipa Pilatus girushjarehina‐ina, nunige Judra uwainena egi wairena: Wang de‐e kereragigigi inke Kaiser hijakoro ranikjanena. Peshe hung kikungi Kaiser hakirawarnana.

¹³ Jaja Pilatus shesge aire naxgungi, Jesus harnihinabshana, egi haewahi waminageja minagshana, inihomishra higairena hounjega. Hebraia hit’era Gabbatha higairena.

¹⁴ Egi Pasxa worujra hikorohornankshana, egi ejaxji howagix akewehanguni. Egi Judra wawagena: Horuxujwire hung hashiniwira.

¹⁵ Egi uwainena: Nigehot’unare, nigehot’unare! Naramiheja haisarajre. Pilatus wawagena: Naramiheja haisaraijeshe hung hashiniwira? Nabhoruxaj hirukana hungra hornihairena: Inke hung hinjuwinina Kaisergashana herena.

¹⁶ Esge wagirushjanehina naramiheja haisaraj‐hirekjege. Egi Jesus rus‐hirena, egi nigeowe‐rutiharairena.

¹⁷ Egi naramihera hakawa‐a, egi wankshig‐nassuhushereg‐hominagra higairegi eowarena, Hebraia hit’era Golgotha higairena.

¹⁸ Eja naramiheja haisaraj‐hirena, egi hijanera nupiwi hakishu, a‐akhi minaghirena egi Jesus hokissagejanak.

¹⁹ Egi Pilatus horagra wagaxshana, naramihe hihageja t’umpshana, egi wagaxra de‐erena: Jesus Nasaretheja herera, Judra hung harninera.

²⁰ Egi horag de‐e Judra roha ena: Jesus naramiheja haisaraj hirega jhinak hiwusunsh herege esge. Egi Hebrai egi Hellenos egi Romanra hit’e wowagax wagiuna.

²¹ Egi Judra nabhoruxaj hirukana hung warninera Pilatus wagairena: Judra hung harninera inke e wagaxnine, eshi e‐wegaja Judra hung harninera newinena.

²² Pilatus horniharna: Jagu pagaxre, pagaxshana.

²³ Jaja Jesus naramiheja haisaraj‐hiregi, manapenaka wauinena wainira wagirus‐hirena egi jopihi hirena, manapenanka nigeshana harninena. Egi shige wonashixete earnira. Wonashixetenaka horujagra jushgunina, harnaj gisunsh‐shana.

²⁴ Esge wakigairena: De‐e inke hinugas‐nikjawina, eshi hushereg gishox hiunkjawina hajangaixjingi harnikjawigi. Wowagaxra exji heregaja, e wena: Waini warnira khiruje wakhinena, egi wonashixete harnira hushereg gishox u‐rehirena. Washa de‐e manapenanka shesge hirena.

²⁵ Egi ejanashinakshana Jesus naramihejanaka, hiunira egi hiunira hijangra, egi Maria Kleopha hijawina, egi Maria Magdalena.

²⁶ Egi Jesus hiunira hajarna egi wironagisha eja nashinjegi e wogixetena, hiunira wagena: Hinugra horuxujre hinigraga.

²⁷ Egi wironagjega wagena: Horuxujre hiuninaga. Egi howagixeja wironagjega hinugjega rusanaga eojhieja harnigina.

²⁸ Hageja de‐e Jesus hiperessana washaraharnaj shegunegi hoishibra, wowagaxra exji herekjege, esge wena: Iwussana e‐ga.

²⁹ Egi eja rex‐isha jena ninashra hoixji. Egi Sponshhisha ninashra hoixji hoshuiranaga egi Hissop hihageja hakanaghiranaga egi i‐eja hagarninena.

³⁰ Jaja Jesus ninashra rajgangi, ena: (Harnaj) haunjebarna. Egi nassura howarojinakshana egi naxiragra nigeowarena.

³¹ Egi rora inke naramiheja nagnikjege Sabath‐haimbjanege, hambeja hikorohornanke, esge Sabath hamb she‐e hamb xetesherena, esge Judra Pilatus raxurugnainena hura waishish‐hirekjege egi warushib‐hirekjege.

³² Egi manapera hajirena, egi hura gishish‐hirena jowejanaka, egi hijanenaka e hakishu naramiheja haisarajhirera.

³³ Egi Jesus hirahirena egi hajairena d’aginira inke hura gishish‐hiranina.

³⁴ Egi manapenanka hisha woshaisha hiunaga ruhieja wapoxshana egi higuana eja wai egi ni xuna.

³⁵ Egi e hajajega horagshana, egi horagra wogisogshana. Egi e hiperessana e hisgewena, harnanaxgunkjawige esge.

³⁶ Washa de‐e uinena, wowagaxra exji herena, inke husheregra gishish‐hiranina.

³⁷ Egi shige wowagax hijaneja ena: Hajairekjanena hisha wapoxhirera.

³⁸ Hagregi Joseph Arimathaieja herena, e hisha Jesus hironagra, eshi nuxawajena Judra wanakewege esge, e Pilatus raxurugnainena Jesus rora rushibjege, egi Pilatus ushina, esge hijajianaga Jesus rora russana.

³⁹ Egi hishge Nikodemus jina, e jorni haheregi Jesus hirahinihera egi harnijina Mirrha egi Aloe wirokishu, ejaxji hikirua hogihisha.

⁴⁰ Egi Jesus rora rus‐hirena, egi linen waipere hirowejainena makha pana‐phi hirassa, Judra khixera houna shegu hirege.

⁴¹ Egi naramiheja haisaraj‐hirega houinega eja ashgenig max hishanakshana, egi max‐naka eja wanaxi‐hoshu jegisha nakshana, eja inkaga hisha t’umb‐hiranina.

⁴² Jesus eja t’umb‐hirena Judra hamb hoikorohora higirerege, wanaxi‐hoshunanka ashgenike esge.