Johnga 18 - Winnebego Bible Portions 1907

¹ Jaja Jesus hoit’e de‐e erashjangi, hironaghirera wakarakishu nishanag Kidron ageja howarairena, max hisha ejanankhi, eja hokewena egi hironag warnira.

² Egi Judas himanaikjanera mara hishge hiperesjena, Jesus dejanki eja hishununa hironaghirera wakarakishu.

³ Egi Judas manape hornihesha rus‐arnaga egi nabhoruxaj hirukana hungra egi Pharisera ware warninera hajirena hiratashakerehi‐rua egi hatasha harni egi wapahi harni.

⁴ Egi Jesus washara harnaj hiperesjena jasge gigirekjanegi, hikipa‐ranaga egi wawagena: Peshe horani harajeshe?

⁵ Hornigihairena: Jesus Nasareth‐eja herera. Jesus wawagena: Newinena. Egi Judas himanaikjanera hishge wakishu nashinjena.

⁶ Higu shesge wawigegi, Newinena e‐gi, hakja hakarairena egi mainja hokanairena.

⁷ Egi shige wawigiwaxshana: Peshe horani harajeshe? Egi wairena: Jesus Nasareth‐eja herera.

⁸ Jesus horniharna: Hornigitagwishare Newinera. Hunaniharajegi, de‐e kere‐wagigiwire.

⁹ Hoit’e arnihera exji heregaja: Inkisha xawarniharnina, jarnaga hunak’una.

¹⁰ Egi Simon Peter wigijgux hisha harnijegi, kurushoroj‐anaga egi nabhoruxaj hirukana hungra ware harnira hojina, egi najawa sanig hoishorora gixguna. Warajega rashra Malxus higairena.

¹¹ Egi Jesus Peter wagena: Wigijgux hashinira wigijgux‐hotumbeja hotumbre. Niwirajga Jajiga hunk’ura jasge inke dajganikjeshe?

¹² Egi manape horniheaka egi manape‐hungra egi warera Judra warninera Jesus rus‐hirena egi rusgij‐hirena.

¹³ Egi jorni Annas eja harni hahirena, Kaiaphas e hijoke wahina, Kaiaphas e nabhoruxaj‐hirukana hungra herenakshana ma‐egi.

¹⁴ Egi Kaiaphas erenakshana Judnaka e jagu uinekjega wigarnakshana, hophi howekjanihawina wankshigra hishankira wankshignagre wagit’egi.

¹⁵ Egi Simon Peter Jesus hironagshana, egi hishge wironag hijanesha hironagshana, wironag she‐e nabhoruxaj hirukana hungra wawikiperessana, egi Jesus hakishu jhixete nabhoruxaj hirukana hung hojhieja hokawairena.

¹⁶ Nunige Peter jhirob jangeja nashinjena, esge wironag hijanejega hihinabshana, e nabhoruxaj hirukana hungra wawikiperessana, egi hinug jhirob hirakarajega hokit’ena egi Peter hokewegigina.

¹⁷ Egi hinug jhirob hirakarajega Peter wagena: Jasge wankshig de‐e wironag warnira nishge hisha nineshe? Peter wena: Inke ne‐hisha winenina.

¹⁸ Warnihira egi warera eja nashinankshana, uxini taxini hot’uinarnaga, sinihijege esge, egi ta‐shjuj‐khinankshana. Egi Peter wakishu nashianaga ta‐shjujkhinjena.

¹⁹ Egi nabhoruxaj hirukana hungra Jesus higiwaxhirena wironag warnira, egi wogus harnira.

²⁰ Jesus horniharna: Harusharani manegirera wakit’ena, hoishib wohokhu‐hojhieja egi shige wohokhu‐hojhixeteja washa ningiguswina, eja Judra hoishib hahirena, egi inke washarisha nuxawa hiharnina.

²¹ Jagu‐u hinagishawaxshe? Wawigiwaxre naixguinera, jagu wa‐iagera, horuxujre hiperesnankshana jagu hihera.

²² Egi she‐shesge e‐gaja warananka hisha hija nashinjegi Jesus (hishja‐eja) nabruparas hirojina wena: Nabhoruxaj hirukana hungra worniragihagi de‐shesge wirageshe?

²³ Jesus horniharna: Washa wowonk hihajegi washa wowongra hungiragre, washa phi hihajegi, jagu‐u hunajishe?

²⁴ Egi Annas rusgij nigeowarehina Kaiaphas nabhoruxaj hirukana hungeja.

²⁵ Egi Simon Peter eja nashianaga ta‐shjuj‐khinjena. Esge wagairena: Jasge nishge wironag warnira ne‐shanineshe? Khibakhina, egi wena: Inke ne‐hisha winenina.

²⁶ Nabhoruxaj hirukana hungra ware warnira hisha, Peter hisha najawara gixgura e washahina, wena: Jasge inke harnijharnishe max‐eja hakishu?

²⁷ Peter shige khibakhina, egi higuana bagawaxgewangra xagshana.

²⁸ Egi Jesus harni harairena Kaiaphas eja howahi woehi hojhieja harniahirena, hainixjinig herena. Egi exji inke woehi hojhieja hokawairanina, inke shishig‐khinanikjege, eshi e Pasxa worujra ruj‐hirekjege esge.

²⁹ Pilatus egi hihinabanaga wirahina, egi wena: Jaguisha hirasharajwigaja wankshig de‐e hashinira jiwishe?

³⁰ Hornihairena egi wagairena: Inke wigishanaisha herenigi, inke ningitushjareha hajiwininana.

³¹ Egi Pilatus wawagena: Ruswire egi haehiwire, woehi hashiniwira jagu akhi hiuwige. Judra esge wagairena: Roigixirawina inke hisha d’ehawininana.

³² Jesus hoit’e arnihera exji herena, jagu era, hot’e jagu hit’ekjanegi wijanti hokaragra.

³³ Egi Pilatus shige woehi hojhieja hokewena, egi Jesus gigorna, egi wagena: Judra hung harninera nenineshe?

³⁴ Jesus horniharna: Nexji washa de‐e wa’sheshe, nigeshge hijane hunagireshe?

³⁵ Pilatus horniharna: Jud‐hisha wineshe? Wankshig washinira egi nabhoruxaj hirukana hungra ninushja huhirena, jagu sh’ushe?

³⁶ Jesus horniharna: Hungma harnira inke ma‐tegi herenina. Hungma harnira ma‐tegi heregi, ware warnira kissairanana inke Judra hinushjane‐hiraninana, eshi shegunegi hungma harnira inke eegi herenina.

³⁷ Esge Pilatus wagena: Hung ranishgunishe? Jesus horniharna. Hisgewa’shena hung harnina. Deshesge wankshigha‐ina, egi deshesge hawau manegi hajina, wogisogra hotaikjege. Jarnaga wogisogkhishi hora naixguinena.

³⁸ Pilatus wagena: Jaguisha wogisogra hereshe? Egi jaja deshesge e‐gi, shige hihinabshana Judrananka eja, egi wawagena: inke washinohirera hisha hiagienina.

³⁹ Eshi shesge rawishunugaja, Pasxa worujeja hisha ningitushja rehakjawina. Judra hung hashiniwira E ningitushjanehakjawishe?

⁴⁰ Egi harnaj shige uwainena, wairena: Inke wang de‐e herenikjena, eshi Barabbas herekjena. Barabbas wankshig‐d’ehishe herena.