Johnga 14 - Winnebego Bible Portions 1907

¹ Inke najge wojiwinine, Maura harnaxguwine, nishge harnaixguwine.

² Jajiga hojhira jhiakohira rohana. Inke shesgarnigishi, hornigitagwinana. Jhi hirushja ningigitekjanihawina.

³ Egi jhi hirushja ningigitawigishi, shige hajikjanena, egi nikurus‐kjanihawina, hajinja hauanjegi nishge eja shunkjanihawina.

⁴ Egi hajinja wawategi hiraperes‐harajena, egi nagura hiraperes‐harajena.

⁵ Thomasga wena: Hirukanara, inke hiapereswinina hajinja horawasherekjanegi, egi jasge hawianaga nagura hiapereskjanihawishe?

⁶ Jesus wagena: Nagura Newinena, wogisogra egi wankshighoira. Inke hisha Hianjihiwira hirahininana, eshi Neshana eegi huwegishana herenana.

⁷ Hinapereswigishi, Jajiga hishge hiraperes‐wishgunina. Egi epa hirapereswinana, egi hashjawinana.

⁸ Philipga wagena: Hirukanara Hianjihiwira hingiwahawire, egi e haiphiwinana.

⁹ Jesus wagena: Hoja, sixji harnikishu hauwingaja, egi kheni hinaperesnishe? Philipra, hisha hinjagishi, Hianjihiwira hajawaunana. Jagu‐u wa’sheshe Hianjihiwira hingiwahawire?

¹⁰ Inke harnainaxguwinishe Hianjihiwira wajhiajena egi Hianjihiwira hunjhijena? Hoit‐e hironikit’e hajane, inke Ne‐wakigarnihajena, eshi Hianjihiwira hunjhijane, worera E unjena.

¹¹ Harnaixguwine Hianjihiwira wajhiajena, egi Hianjihiwira hunjhijena. Inke she‐e harnainaxguwinigi, wore jagu hauna harnaxguwine.

¹² Hisgexjina, hisgexjina hinigawina: Hisha harnaixgungi, hishge wore jagu haune, unkjanena, egi e wore hiraijera xete unana, de‐e xununana, Jajiga eja wawakerekjanege esge.

¹³ Egi jagura hisha hinagitawigi rash harnira sharajwigi, haunkjanena Hianjihiwira Wankshig‐hinigra gloriahikjanege esge.

¹⁴ Washanisha ratawigi rash harnira sharajwigi, haunkjanena.

¹⁵ Woiragixetewigishi u‐washi harnira hingiuwine.

¹⁶ Egi Hianjihiwira hagikarajikjanena, egi Warukheg hijanera hisha hornikunkjanihawina, E manegus harnikishu unkjanihawina.

¹⁷ Naxirag wogisogra, E maneginagre inke rus ruxurug hiranina, inke hajarninanke shige inke hiperesninanke esge. De‐eshi hirapereswina harnikishu jhiajena egi hornijhikjanihawige esge.

¹⁸ Inke waina nit’utanikjanihawina, hiranikirikjanihawina.

¹⁹ Higu xapgenig, egi managre inke hinupahara hinjarnikjanena, de‐eshi hinshjakjanihawina. Wankshighaianjege, esge nishge wankshig‐shianajekjanege.

²⁰ Hamb sheja hirapereskjanihawina Jajiga Ne‐wajhiajera, egi hunajhiharajera, egi hornijhihajera.

²¹ Hisha u‐washi harnira harnigi, egi waigiungishi, she‐e herena woigixetejanana, egi hisha woigixetegi, Jajiga wogixetekjanena, egi wagixetekjanena, egi hagikikawahakjanena.

²² Judas wagena, inke Iskariot warnina: Hirukanara jasgegaja hinagikikawahakjanihawishe, egi manegi herera inke waragikikawaharni?

²³ Jesus horniharna egi wagena: Hisha woigixetegi, hoit’e warnira waigiunkjanena egi Jajiga wogixetekjanena, egi hirajhikjanihawina, egi hakishu wajhikjanihawina.

²⁴ Hisha inke woigixetenigi, hoit’e hihera inke hingiunigi. Egi hoit’e nanaxguwira inke Ne‐warninina, eshi Hianjihiwira E huingigina.

²⁵ Washa de‐e hironikit’e‐hajena, higi harnikishu hauanjeregi.

²⁶ Egi Warukhegra, Naxirag Wakanjangra erena, Hianjihiwira huhikjanena rash harnira hawau, E washara harnaj ningigus‐hikjanihawina, egi washara harnaj wakewewinikjanihawina jagu hinigarnihera.

²⁷ Rashgunira hakishu nint’utawina, rashguni harnira hornik’uwina. Inke managre woga hikisge wagiunina, Ne‐hornik’uwina. Inke najge wojiwinine, inke warnakawawinine.

²⁸ Nainaxguwina jagu hinigawira: Nigewawatekjanena, egi shige hiranikirikjanihawina. Woiragixetewigi, wornigishawakjanihawina, Hianjihiwira E wawakerekjanena hihera esge. Jajiga E hiraijera xetenankshana hotujis‐shana.

²⁹ Egi shegunegi hornigitagwina, kheni hereni, jaja heregishi, harnanaxgunkjawige.

³⁰ Epa inke hornikit’exjinikjanihawina: Ma‐degi hungra jikjanena egi inke washa hingienikjanena.

³¹ Eshi managre hiperesjanena Hianjihiwira wagixetera, egi Hianjihiwira ushi hunkuna shesge hauanjena: Nashiwine, nigeowainekjawina.