Johnga 13 - Winnebego Bible Portions 1907

¹ Egi Pasxa worujra kheni hereni, Jesus hiperessana howagix earnira jira, ma‐degi nige howakerekjanena Hianjra‐eja, wawogixetejena ewarnira manegi u‐nagra, wawogixetejena hoshejainja hipa.

² Egi hoxjarna woruj horushjainja, waxopinishishigra Judas Iskariot Simon hinigra najgeja howairegigirena higuana himanaikjege.

³ Jesus hiperesjena, Hianjra washara harnaj wok’una nab‐earnieja wogishuna, egi Maura eja howajira, egi Maura eja howakerekjanena.

⁴ Hoxjarna‐worujeja nashina, egi wonashira gaja hinagianaga, egi nab‐hiwashaisha rusanaga, egi hipiragshana.

⁵ Hageja she‐e nab‐horushaeja ni howaxuanaga, egi hironaghirera sira wagirushajirena, egi wagiwasharna nabhiwasha hipiragjera hiuanaga.

⁶ Egi Simon Peter hirahina, Peter wena: Hirukanara, sira hinagishurushakjaneshe?

⁷ Jesus horniharna egi wagena: Jagu hauanjera, shegunegi inkiraperesnina, eshi hagnigi hiraperesikjanena.

⁸ Peter wagena: Ne inkaga si harnira hinagishurusharnikjanena. Jesus horniharna: Inke ningitusharnigi, inke higi woishunikjanena.

⁹ Simon Peter wena: Hirukanara, inke si harninashana rusharnine, eshi shige nabra egi nassura waigirushare.

¹⁰ Jesus wagena: Hisha rushairegi, si‐rashana girushairanana, egi harnaj sgenana. Nisgewina, nunige inke harnaj.

¹¹ Hiperesjena peshe himanagikjanera, esge wena: Inke harnaj nisgewinina.

¹² Egi sira wagirusharnaga hageja, wonashi earnira kurussana, egi shige minagshana, wawagena: Hirapereswishe jagu ningiuwira?

¹³ Wawagaxhajawagigi hungra egi Hirukanara hinagawira, egi phi wa’shawina, shesgajena.

¹⁴ Hirukana egi wawagaxhajawagigi hung ne‐hishiniwingi, sira wanigitushawigi: Hishge sira wakirusha phiraniwina.

¹⁵ Hornik’uwina wijanti hijenigigiwina, shegu rakjawina jasge ningigiwira.

¹⁶ Hisgexjina, hisgexjina hinigawina: Warera inke e hiraijera xeteninankshana hirukana harninera, egi hisha nige howaregigiregi inke e hiraijera xeteninana, nigehowarewagigijega e hiraijeranana.

¹⁷ Washa de‐e hirapereswigi, wonigishawawinana sh’uwingishi.

¹⁸ Hiat’at’are inke harnaj wanigawinina. Hiaperessana peshe waijana. Eshi wowagaxra jagu era shesgekjanena. E waisgabruj hakishu haunakshana, sikerejgera kuruana hinkirana.

¹⁹ Kheni hereni hornigitagwina, jaja hereanaga haixagi, harnainaxgukjawige Niewinera.

²⁰ Hisgexjina, hisgexjina hinigawina, higu peshe rushiregi, hirus‐wauinanana, egi hisha hirusgi huingigira ruswaunana.

²¹ Jaja Jesus deshesge era, naxiragra najgerategshana egi horagshana egi wena: Hisgexjina, hisgexjina hinigawina, hisha himaisharagikjanihawina.

²² Egi hironaghirera hokiruxuj hirena hajaxjinaka wagegi.

²³ Egi Jesus hironag warnira hisha hakikawaxingankshana mang‐eja, she‐e Jesus wogixetena.

²⁴ Simon Peter esge wigigussana higiwaxhikjege, peshe heregi, peshe wagegi.

²⁵ E Jesus mangeja hamingangra wagena: Hirukanara peshe hereshe?

²⁶ Jesus horniharna: Erena, erekjanena hisha nige wak’ungi hiroashu‐anaga. Egi jaja nige hiroshuna, e hok’una Judas Iskariot Simon hinigra.

²⁷ Egi nige hok’uanaga hageja Satan hijokewena. Egi Jesus wagena: Sh’unkjanegi, xapge une.

²⁸ Inke hisha hiperesnina warujejananka, jagu‐u de‐e wagegi.

²⁹ Judas panra harninake, esge Jesus wageguni, waruwirare washa worujeja hiunkjanihawigi, nigeshge wanajojaisgera washa wogakjege wageguni, hota hirairena.

³⁰ E nige russana, higuana hihinabshana, egi hanhena.

³¹ Egi jaja hihinabgi, Jesus wena: Shegunegi Wankshig‐hinigra gloriajena, egi Maura gloria Wankshighinigra hiuna.

³² Egi Maura gloriagi E hiu, Maura hishge gloriakjanena E exji, egi higuana gloriakjanena E.

³³ Ninkjang xununigwira, jowexjinig harnikishu hauanjena, hurnanikjanihawina, egi Judra wawagarnihera hikisge, hajinja wawategi inke hi‐shuruxurugnikjanihawina, de‐shegunegi shesge hinigawina.

³⁴ Uwashi jegisha hornik’uwina, worakixetekjawige. Wornigixete‐hajera, hikisge hishge wokixetewiaje.

³⁵ Deshegunegi wankshigra harnaj hiniperes‐hirekjanihawina ne wironag harniwira, worakixetewigishi.

³⁶ Simon Peter wagena: Hirukanara, hajinja horawasherekjaneshe? Jesus hornigiharna: Hajinja wawategi shegunegi inke hironag hi‐shuruxurugnina, eshi hagnigishi hiroishanaikjanena.

³⁷ Peter wena: Hirukanara, jagu‐u shegunegi inke hironinag duxurugnishe? Shegu Ne harnit’ekjanena.

³⁸ Jesus hornigiharna: Shegu ne hinshjekjaneshe? Hisgexjina, hisgexjina hinigena, kheni bagawaxgewangra xagni, daniha khibainakhikjanena.