Johnga 11 - Winnebego Bible Portions 1907

¹ Egi wangisha howasharna Lasarus higairera, Bethania eja jhinag Maria hojhieja egi hinug‐khinubra Martha.

² Erena Maria, Hirukanara wikinipana phi hawaxura, egi najura hik’uanaga sira giwashara e khinubra Lasarus howasharna.

³ Esge hinug‐wakhinubra waunena worag hirahi gigirena, wena: Hirukanara, horuxujre, e howasharna woragixeteshunura.

⁴ Jaja Jesus she‐e naxgungi wena: Howasha de‐e inke d’airanishununa, eshi Maura gloriakjinena. She‐e Maura Hinigra eja glorigiunkjanege esge.

⁵ Egi Jesus wawogixetena Martha egi hinug‐khinubra egi Lasarus.

⁶ Jaja naxgungi she‐e howashagi, eja hiwusharna hamb nupaha hounagra higu eja.

⁷ Egi hageja wawagena hironaghirera, Judea‐eja shige howairekjawina.

⁸ Hironaghirera wagairena: Hirukanara Judra hojishana hiniunjaxjihirera ini‐hinigissag‐nainena, egi eja shige horawasherekjaneshe?

⁹ Jesus horniharna: Jasge inke howagix kerepanaishanaga‐nuphashana hambishana janishe? Hisha hambregi manigishi inke bokawarninana, ma de‐e hohamb‐anagra hajarnage esge.

¹⁰ Eshi hisha hanheregi manigi bokawarnana, she‐e inke hohambnianke esge.

¹¹ Washa de‐e ena, egi hageja wawagena: Hijakorohihiwira Lasarus nanakshana, egi tekjanena e nanagra duxinkjege.

¹² Egi hironaghirera wairena: Hirukanara nanankhi hirohekjanegaja.

¹³ D’ege Jesus wajena, egi nanake xgasigiake wajeguni hirairena.

¹⁴ Egi Jesus harusharani wogiragshana Lasarus d’ena.

¹⁵ Egi ne‐wainiginabwina inke eja harniharnira, deshegungi ningete harnanaxguwiege. Shegu eja howainekjawina.

¹⁶ Egi Thomas Didimus higairera, wironag wakishura wawagena: Nishge hinekjawina E hakishu hintekjawina.

¹⁷ Jaja Jesus hijahigi, hiena hambra jopaha warnaxomigeja mingkhinina.

¹⁸ Egi Bethanira Jerusalem hiwusunsh herena, ejaxji Stadia kerepanaishanaga‐saja‐hashanaguni (wigus nup).

¹⁹ Egi Judra roha Martha egi Maria wirajirena, warukheg hirege khinubhirera e hawau.

²⁰ Egi Martha higu naxgungi Jesus raheshe airegi, ranaga egi hikiparna. Eshi Maria jhieja minaganakshana.

²¹ Egi Martha Jesus wagena: Hirukanara eegi ranishegishi hakhinubra inke d’arnina.

²² Egi hiaperessana shegunegi reshge jagurisha Maura hiragegishi, Maura hornik’unkjanegaja.

²³ Jesus hinugjega wagena: Rakhinubra shige kikawa‐ankjanena.

²⁴ Martha wena: Hiaperessana shige kikawa‐ankjanena hamb hirowageja, hakhiha wankshig‐inekjanega eja.

²⁵ Jesus hinugjega wagena: Wankshig‐hakhihara Newinena, egi wankshighoira. Hisha harnaixgungishi, d’egishge, niambikjanena.

²⁶ Egi peshe niambjegi egi harnaixgungi inkaga d’arnikjanena. De‐e harnanaxgushe?

²⁷ Hinugjega wena: Hojia Hirukanara: Harnanixguna Kristus Neninera, Maura Hinigra E manegi jiguni.

²⁸ Egi jaja hinugjega shesge e‐gi, hinugjega jikerena, egi Maria khinubra nuxawa gigorna, wagena: Hirukanara jina, egi nigigojena.

²⁹ Higu she‐e naxgungishi hinuganaka xapge nashina egi hijahina.

³⁰ Egi Jesus kheni jhinageja jinina, egi Martha hajinja hikipara eja unjena.

³¹ Judra e hinugjega jhieja hakishu unankhi, egi rukhegnankhi, hajairena Maria xapge nashianaga hihinabra, hinugjega hironag airena: Wanaxomigeja howarena egi eja xaigjege.

³² Jaja Maria Jesus hounjega eja higi egi hajarna, hinugjega khanena si hieja, wagena: Hirukanara eegi ranishegishi hakhinubra inke d’arnina.

³³ Egi Jesus hajarna hinugjega xagkhi egi Judra hishge xaghirena hakishu hahirera, naxirag rogeja hanagshana egi najgerategshana,

³⁴ Egi wena: Hajinja rat’umbwishe? Wagairena: Hirukanara hure egi horuxujre.

³⁵ Jesus xagshana.

³⁶ Egi Judra wairena: Horuxujwire hisgexji wogixetegaja.

³⁷ Egi hota wairena: Wang de‐e inke ruxurugnishe, E hishjasura wagiruhasgaja hishjaningra, de‐e inke d’egigi phinigaja?

³⁸ Esge shige Jesus rogeja hanaganaga, wanaxomigeja jirena. Nish hopoxeja herena, egi inisha hihageja hakanaghirena.

³⁹ Jesus wena: Inira ruswire. Martha e hinugjabshana d’aka, wagena: Hirukanara shegunegi xuwiankuni, hoja d’era hambra jopahange esge.

⁴⁰ Jesus hinugjega wagena: Inke hornigitagnishe, harnainaxgungishi Maura gloria harnira hashjakjanena hinigeshare?

⁴¹ Egi inira rus‐hirena d’ega hot’umbhirera ejanagra. Egi Jesus wangeja horuxujshana egi wena: Jaji wainiginabshana nainaxgushanakaja.

⁴² Egi hiaperessana hoishib nainaxgushanagra, egi wankshigra eegi nashinagra esge wahena, harnaxgunekjege egi howahuinagigira.

⁴³ Egi she‐shesge e‐gaja, uwana wahoxete: Lasarus hihinabre.

⁴⁴ Egi d’arnihera hihinabshana, nabra egi sira wanaxomigwaipere hirusgij, egi hishjaeja hishja hiwashaisha hirusgij. Jesus wawagena: Girushgawire, egi girushjanehiwire.

⁴⁵ Egi Judra roha, Maria hirahirera, egi Jesus washa unga hajairena, harnaxguinena.

⁴⁶ Egi hota Pharise eja howakarairena egi Jesus washa jagu unga wogiraghirena.

⁴⁷ Egi sto‐khinena nabhoruxaj hirukana hungra egi Pharisera haehirena egi wairena: Jasge hihikjanihawishe? Wang de‐e washa wowakanjangra roha ungaja.

⁴⁸ Shegu unje‐hiwigishi, harnaj harnaxguinekjanegaja, egi Romenra hajiranaga egi wangarus‐hirekjanihawina mara egi wankshig hiwarniwira.

⁴⁹ Egi hisha Kaiaphas higairera nabhoruxaj hirukana hungra erena ma‐egi, wawagena: Inke washa hirapereswinina,

⁵⁰ Inke wa’shewewiwinina she‐e hophi howekjanihawina, wankshigra hishankira wankshignagre wagit’ena, egi wankshig hokirajra harnaj inke d’airanikjanena.

⁵¹ Egi de‐e hit’at’are inke e wakigarnina, eshi nabhoruxaj hirukana hungra herenake ma‐eja, esge propheta nakshana, Jesus wankshignanka wagit’ekjanena.

⁵² Egi inke wankshig she‐eshana, eshi hishge harnaj stoiranaga hishankira Maura E ninkjang warnikjanena, jarnaga hoeragra.

⁵³ Egi hamb epa haehirena hot’ehira jasge hirekjegi.

⁵⁴ Jesus esge inke janti maninina Judnaka eja, eshi mojaina hiwusunsh howarena, jhinagisha Ephraim higairera eja, egi eja unjena hironaghirera wakarakishu.

⁵⁵ Egi Pasxa woruj Judra harninera here‐korohorna, egi roha ma‐eja howajina Jerusalem‐eja howarairena, kheni Pasxa hereni kikurusha harairena.

⁵⁶ Egi horninena Jesus, egi wakigairena, wohokhu‐hojhixeteja unagregi: Jagu hirarawishe, inke jinikjaneshe worujregi?

⁵⁷ Egi nabhoruxaj hirukana hungra egi Pharisera hinuinke u‐washirena, higuisha hiperesgi hajinja unjegi, horaghirekje airena E harukos‐hirekjege.