Johnga 10 - Winnebego Bible Portions 1907

¹ Hisgexjina, hisgexjina hinigawina, hisha inke jhasga‐hojhi jhirobeja hokawarnigi, eshi hijahi nige hoti‐hokewegi, e wamanukeisha egi wankshig‐d’ehikeisha herenana.

² Eshi hisha jhirobeja hokewegi, jhasga‐hirakarara herenana.

³ Jhirob‐hirakarara giruhasnana, egi jhasgara hora naxguiranana egi jhasga ewarnira rashra warajnana egi hironag hihinab‐hiranana.

⁴ Egi jaja jhasga warnira hihinab‐wagigiga, E wajoginianaga egi jhasgara hironag hiranana, hora higinanke esge.

⁵ Egi inke wawiperes‐hiranira inke wawironag‐hiraninana, eshi gigias‐hiranana, inke hora higininanke inke wawiperesninanke esge.

⁶ Hisgera de‐e Jesus wawigena, egi inke naxgu hiranina jaguisha wawirokit’ajegi.

⁷ Egi shige Jesus wawagena: Hisgexjina, hisgexjina hinigawina, jhasga jhirobra Newinena.

⁸ Jarnaga joweharegi jira wamanukairena egi wankshigd’ehike hirena. Eshi jhasgara inke warnaxguinanina.

⁹ Newinena jhirobra, Ne‐egi hisha hokewegishi wankshig‐inkjanena, egi hokewegi egi wokana hiekjanena.

¹⁰ Wamanukera wamanu wagiu hajirena egi wankshigd’ehi egi maisinsh‐wahi. Nehajina e wankshig‐inekjege, egi e hiraijera roha wankshighoi harninekjege.

¹¹ Jhasga hirakara phira Newinena. Jhasga hirakara phira jhasgara e wagit’ena.

¹² Eshi e hisha warajegi egi inke jhasga hirakaraisha herenina, jhasgara inke e‐warninijege, shungjangra hisha huhau hajagi, jhasgara wat’unanana egi giasnana, egi shungjangra jhasgara warukosnana egi jhasgara hoeranana.

¹³ Warajega giasnana wareisha waunjege esge, egi inke jhasgara washa wiranaininana.

¹⁴ Jhasga hirakara phira Newinena, egi jhasga warnira hiaperessana, egi hinkaraperes‐nankshana newarnira.

¹⁵ Hianjihiwira hinperes‐nagra she‐e hikisge, Hianjihiwira nishge hiaperes‐hajena, egi jhasgara e wagit’ena.

¹⁶ Egi jhasga hijane harnira, inke hornihe eegi hereranina, she‐e hishge warnihakirikjanena egi ho‐harnira naixgunekjanena, egi hornihe hishankirakjanena egi jhasga‐hirakarara hishankirakjanena.

¹⁷ Esge Jajiga woigixetena wankshighoi harnira eegi hakarat’umbjanena, egi shige wankshighoira hakurusikjanena.

¹⁸ Inkisha wankshighoira hingirusnikjanena, eshi wankshighoi harnira eegi nexji hakarat’umbshana. Homashja harnira wankshighoira eegi hakarat’umbshana egi homashja harnira shige wankshighoira hakuruskjanena. Uwashi de‐e Jajiga eja hodussana.

¹⁹ Deshesge e‐gi, shige Judra nupihi‐khinena.

²⁰ Egi roha wena: Waxopinishishig hisha harnijena, egi wanaxiowankjena, jagu‐u harnanaxgu‐harajeshe?

²¹ Hijanera wairena: Inke de‐e hoit’era waxopinishishig hisha harni warnijena. Waxopinishishigra hisha hishjasura wagiruhas ruxurugnashe hisha hishjaraningkhi?

²² Egi Jerusalem‐eja wohokhu‐hojhixete wakanjankkaragiregi worujxetera herena, egi maninegi herena.

²³ Egi Jesus wohokhu‐hojhixeteja manijena, Salomon hakohi harnira higairera eja.

²⁴ Egi Judra hahiranaga hogigix nashinena, egi wagairena: Jajaixji hoja wokibahi hinagikerewishe? Kristus neninegishi wogisogji hungiragwire.

²⁵ Jesus wornigiharna: Hornigitagwishare, egi inke harnanaxguwinina. Wore hauanjane Jajiga rash harnira wagiu‐hajena she‐e hunagnankshana.

²⁶ Eshi inke harnanaxguwinina, inke jhasga ne‐harniniwinira esge, shesge hinigawishare.

²⁷ Jhasga warnira hora naixguineshununa, egi ne‐waiaperes‐shana egi hiroinag‐hireshununa.

²⁸ Egi wankshighoi hisgeja wawak’una, egi inkaga d’airanikjanena, egi inke hisha nab‐harninegi higirushoroj hiranikjanena.

²⁹ Jajiga E woik’una, jarnagagre eshana xetena, egi inke hisha rushoroj ruxurugnina Jajiga nab‐harnieja.

³⁰ Ne‐winianaga egi Jajiga hishankira harniwina.

³¹ Egi Judra shige ini rus‐hiranaga ini‐hirojinainena.

³² Jesus wornigiharna: Wore phira roha ningiuwina Jajiga eja howaji, wore jaguisha hawau ini‐hiroirajinanash’i harajeshe?

³³ Judra hornigihairena wairena: Wore phi sh’ungi inke she‐e hawau ini‐hironiji‐nainiajena, eshi Maura sharaxjashguni rajege esge, egi Ne wankshig‐ranigaja, Mau rakik’u‐rajege.

³⁴ Jesus wornigiharna: Jasge inke woehi wowagax hashiniwieja, hinigawinishe, Mau raniwina?

³⁵ Mau hireshe wigegi, eja Mau hoit’era wirajina, egi wowagaxra inke rushe phinina.

³⁶ She‐e waragawishe hisha Hianjihiwira wakanjankhira, egi manegi howahuhira: Ne Maura sharaxjashgunina hiragawi, Maura Hinigra Newinena hihera esge.

³⁷ Jajiga wore harnira inke haunigi, inke harnaixguwinine.

³⁸ Eshi hauhajegi inke harnainaxguwinishge, wore haura e harnaxguwine, hiraperesjawina egi harnanaxgunkjawina Hianjihiwira hunjhijena egi Hianjihiwira wajhihajera.

³⁹ Esge shige harukosnainena, egi rugash‐rehirena.

⁴⁰ Egi shige nigiowarena Jordan ageja hajinja jorni Johnga ni‐wawaxunjera eja, egi eja hiwusharna.

⁴¹ Egi roha hirahina egi wagairena: Johnga inke washa wowakanjank unina, eshi Johnga washa wang de‐e higera, harnaj hisgena.

⁴² Egi roha harnaxguna eja.