Johnga 1 - Winnebego Bible Portions 1907

¹ Jegjikerehigi Hoit’era ejanakshana, egi Hoit’era Maura eakishu una, egi Hoit’era Maura erena.

² E hakishu nakshana Maura jegjikerehigi.

³ Jarnaga washara unga E wauna, egi inkijanihanigi inke washara hisha uninana, washa jarnaga unga.

⁴ E wankshighoina herena, egi wankshighoi de‐e hohamb wagigina wankshigra.

⁵ Egi hohamb de‐e hokawasregi hatakajhijena, egi hokawasra inke hiperes‐hiranina.

⁶ Wangisha Maura hugigigi, Johnga higairena.

⁷ Wang she‐e woragjina Hohambjega horagjina wankshigra harnaj eja howahi harnaxguinekjege.

⁸ Inke hohamb de‐e ereni, nunige hohamb de‐e horag hugigirena.

⁹ She‐e hohamb wogisogra erena, E hohamb‐wagigina wankshigra jarnaga manegi howajihugi.

¹⁰ Manegi jina, egi managre E una, nunige managre inkigiranina.

¹¹ E‐warnige wirajina, egi ewarninunige inke rus‐hiranina.

¹² Eshi jarnaga rusra, she‐e homashja wogarna Maura hinig wahikjanena, jarnaga rash harnira harnaxgungi.

¹³ She‐e wankshiginegi inke wai wankshighi‐iranina, egi inke ro‐woshga wankshighi‐iranina, egi inke wankshig woshgara wankshighi‐iranina eshi Maura E wankshighiinena.

¹⁴ Egi Hoit’era hahi rona, egi horogregi jhina, gloriara hagija hajawina gloria she‐e eshanaherena Hianj‐hirera harnira, najwojana egi wogisogra rokana.

¹⁵ Johnga woragra, hagarnijina, egi uwana: Wena, de‐e erena hisha wagajera, hagni jinunige, jornineja herena, kheni winenineja herera esge.

¹⁶ Egi hoixji harnijena harnaj eja horuiskjanihawina, najwojara egi shige najwojara.

¹⁷ Woehira Moses eja howaji wangok’u hirawina, nunige najwojara egi wogisogra Jesus Kristus eja howajirena.

¹⁸ Inkaga wankshigrisha Maura hajarnina, eshana Hinigrerege Hianjra mang‐hieja nakshana, hiperes‐wangahiwina.

¹⁹ Egi de‐e Johnga worag harnira herena Judra nabhoruxaj hirukanara egi Lewitra hijowarewagigire, Jerusalem eja howahirena, higiwaxhirena peshe nineshe higairena?

²⁰ Egi hokaragshguni egi inke khibakhini, egi hokaragshana Kristus inke newinenina.

²¹ Egi higiwaxhireshguni, jagu ranigaja, Elias nenineshe? Egi wena, inke newinenina. Prophet airera nenineshe? Egi wena, inka.

²² Egi wagaireshguni: Peshe ninegaja? Huingigirawira wawagitaikjawina, jagu hirakigarajegi?

²³ Johnga wena: Hisha hora jantijegi, mojainainja uwanjegi newinena. Hirukanara nagura roja hagigihajena, prophet Esaias era hauanjena.

²⁴ Egi jiwagigirega e Pharise waunankshana.

²⁵ Egi higiwaxhireshguni egi wagaireshguni, jagu‐u niwashawaxurajeshe Kristus inke neninenigi, shige inke Elias egi prophetjega inke neninenigi?

²⁶ Johnga wawagena: Ni‐wagiuhajena wapaxuhajane, eshi horograwieja hisha nashinjera, she‐e inkiragiwinina.

²⁷ Erejena hagni jinunige, jornineja herena, wagujesika harnira inke girushge duxurugnina inke washa hiakisgarni hajege esge.

²⁸ Washa de‐e Jordan sanigeja wauinena Batabara eja, Johnga eja ni‐wawaxujena.

²⁹ Haininegi Johnga Jesus eowahu‐hegi hajarna, Johnga wena: Horuxujwire Maura jhasga‐ningnig harnira E washoirohire manegirera wak’iankshana.

³⁰ De‐e erena, hisha wagera, hagharegi wangisha jikjaneshe hihera, E jornineja herena, E jorni hereanaga hagregi winege esge.

³¹ Egi E inke hiaginina. Egi E Israel hiperes‐hirekjege esge hajina ni‐wagiuhajena wapaxuhajane.

³² Egi Johnga woragra harnijina, wena: Naxiragra hajharna wangregi howajina rujgesga‐nisge egi hihageja hiwusharna.

³³ Egi E inke hiaginina, eshi Hisha ni‐wawaxu huingigira E waigena: Naxiragjega wangeja howaji hashjagi egi peshe hihageja hashegi erekjanena hingena egi eja hiushakjanena, erena Naxirag Wakanjangra wawaxukjanera.

³⁴ Egi hajharna, egi hornigitagwina She‐e Maura Hinigra herena.

³⁵ Shige haininegi Johnga eja nashinjena egi wironag warnira nupiwi hakishu.

³⁶ Egi Jesus horuxuj‐jeshguni howemaniankhi wena: Horuxujwire, Maura jhasganingnig harnira.

³⁷ Egi wironag nup hajega she‐e naxguhireshguni hit’et’era, egi Jesus hironaghirena.

³⁸ Jesus hijopahinashina egi wajarna hironaganakhi egi wawagena: Jagu horani‐hashawankshe? Wagaireshguni: Rabbi, wawagaxhajawagigi‐hungra ewaireshe airena, hajinja shu’rajeshe?

³⁹ Egi wawagena: Huwire, egi hashjakjawina. Hahireshguni egi hajairena hajinja unjegi, egi hakishu hiwushairena hambeja, ejaxji howagix kerepanaishanegi wauineguni.

⁴⁰ De‐e nuphajane hisha Johnga hit’et’era naxgungi egi hironagshana Andreas Simon Peter khinubra.

⁴¹ E jorni khinubra Simon hiena, egi wagena: Messias hiegaja, Kristus ewairena.

⁴² Egi Jesus eja harnihina. Egi Jesus hajarna wena: Neninegaja Simon, Jona hinigra, Kephas hinigairekjanena, inira ewairena.

⁴³ Haininegi Jesus Galilea eja howarena, eja hiena Philipga egi wagena: Hiroinagre.

⁴⁴ Philipga Bethsaida eja herena egi Andreas egi Peter hishge jhinak eja hererena.

⁴⁵ Philipga Nathanael hiena egi wagena: Hiaewina Moses woehieja wagaxnihera egi shige prophetra, Jesu Nasaretheja herera Joseph hinigra.

⁴⁶ Egi Nathanael wena: Eja washa phira hisha howajinashe Nasaretheja? Philipga wena: Hure, hashjakjena.

⁴⁷ Jesus hajarna Nathanael hijowahuhegi wagena: Horuxujwire, Israel wankshig wogisogjisha heregaja inke woishjanke hiperes‐niankshana.

⁴⁸ Nathanael wena: Jasge hinaperes‐she? Jesus horniharna egi wagena: Kheni Philipga nigigorni, Fig‐najera khuhainja shu‐shawangreja harnijharna.

⁴⁹ Nathanael horniharna egi wagena: Rabbi, Maura Hinigra neninegaja, Israel hung harninera neninegaja.

⁵⁰ Jesus horniharna egi wagena: Fig‐najera khuhainja shu‐shawangreja harnijharna hi‐ni‐gera, esge harnainaxgushe? Washara hiraijera hashjakjanena.

⁵¹ Egi wagena: Hisgexjina, hisgexjina hinigena, howarehire wangregi gihas hashjakjanihawina egi Maura waxopiniwarajire warnira hogitinagikjanena egi hanukanag‐nagikjanena, Wankshig‐hinigra wanghiregi.