Hoixgara 5 - Winnebego Bible Portions 1907

¹ Egi wangisha Ananias rashra higairena, hijawira Saphira hakarakishu, ma‐nige wiruwinena.

² Egi hoikisgera hota hotahina hijawira hishge gigiphina. Egi hota harnihina, egi Apostel si hireja wagishurna.

³ Eshi Peter wena: Ananias, jagu‐u Satan najge hashinira hornixjishe, Naxirag Wakanjangra reragit’unk, egi mara hoikisgera hota hotarashe?

⁴ Manaka inke niashininishe kheni wishuruwini? Egi wishuruwianaga hageja inke ne‐hishurukananishe? Jagu‐u wowewi deshesge najge hashinira hornishushe? Inke wankshigra wareragit’unk wash’unina, eshi Maura reragit’unkshana.

⁵ Egi Ananias hoit’e de‐e warnaxgungi, mainja hokanena, egi d’ena. Egi washa de‐e naxguinegi harnaj naxirera rokanainena.

⁶ Egi wang hojinjira nashinarnaga egi rojahirena egi harni‐hinabhirena egi xairena.

⁷ Egi ejaxji hageja howagix danihanegi hijawira hijokewena, jagu uinera inke hiperesni.

⁸ Egi Peter wagena: Hungiragre mara de‐shenaga hishuruwiwishe? Egi wena: Hojia, shenagarna.

⁹ Egi Peter wagena: Jasgegaja warnaira hakishjeg rawianaga Hirukanara Naxirag harnira raishjawishe? Horuxujre, si‐hireja e hikanaraga xairera jhirob‐regi nagre, egi harni‐hinihinab‐hirekjanena.

¹⁰ Egi higuana si‐hieja hokanena, egi d’ena. Egi wang hojinjinanka hokawairena egi d’arnak‐u hierena, egi harni‐hinab‐hirena xairena, hikanara hikisunsh t’umbhirena.

¹¹ Egi stornanka harnaj naxirera rokanainena, egi jarnaga washa de‐e naxguinegi.

¹² Egi Apostelra nab warninera wauinera washa woijantira roha egi wowakanjangra wankshig horogeja uinena. Egi harnaj warnaina horeishankira hinankshana Salomon hakohianieja.

¹³ Eshi hijanenanka hinkisha wakishu unina nakawairege, wankshignanka rokana wiranainege.

¹⁴ Egi harnaxgura hiraijera hija hornashi harairena Hirukanara eja, wangra egi hinugra worohaxji.

¹⁵ Shesge hirena, howashara nagu‐hoxeteja warnianjirena homig hat’umb, egi homig hirakiwa‐a hat’umb, e Peter wirajigi hota hoirahasi wagigikjege.

¹⁶ Egi shige worohaxji jina hogigix jhinagananka eja howajirena Jerusalem eja hajirena, wankshig howashara wakaranine, egi she‐e naxirag shishig hawe‐wahinankhi egi harnaj rushja‐wahirena.

¹⁷ Egi nabhoruxaj hirukana hungra nashinena egi jarnaga hakishu‐unankhi harnaj (howajehi Sadusera hererena), wogitegra rokana hirena,

¹⁸ Egi Apostelra harukos‐hirawina egi jhiwornasse agieja hornassairawina.

¹⁹ Eshi Hirukanara waxopiniwarajire harnira haheregi jhiwornasse jhirobra waruhassana egi harni‐wihinabshana egi wena:

²⁰ Rawire egi wohokhu‐hojhixeteja nashiwinge wankshigra wankshighoi‐hisgeja hoit’era harnaj wirokit’awire.

²¹ Egi jaja de‐e naxguinegi wohokhu‐hojhixeteja hainixjinig hokawairena egi wahokhuinena. Egi nabhoruxaj hirukana hungra hajirena egi wakishu unagra, egi waehira stowashirena egi Israel ninkjang xetera harnaj. Egi jhiwornasse‐hojhira howare‐wagigirena warniankirirekjege.

²² Eshi jaja warukosra hahiregaja, egi inke jhiwornassehojhieja wieranina, hakirirena egi horaghirena,

²³ Wairena: Jhiwornasse‐hojhira hisgexji phixji hornassajau hahiwina egi wirakarara jhirob‐jangeja nashinankshana, eshi jaja duhaswigaja inke wangra rogeja hisha hiaewinina.

²⁴ Egi jaja nabhoruxaj hirukana hungra egi manape hung wohokhu‐hojhixeteja herera egi nabhoruxaj hirukana xetera washa de‐e naxguinegi wowewi‐harejirena washa de‐e jasgegaja waungi.

²⁵ Egi hisha ji‐anaga egi wawogiragshana, wena: Horuxujwire wang jhiwornanassawira wohokhu‐hojhixeteja nashinankshana egi wankshigra washa wagigusnankshana.

²⁶ Egi manape hungra rena warukosra wakishu egi hasohi warniankirirena wankshignanka warnakawairege esge, e inke ini wirojiranikjege.

²⁷ Egi jaja warniankiriregi waehinanka jowehireja washuirena, egi nabhoruxaj hirukana hungra wawigiwaxhirena,

²⁸ Wena: Jasge inke rojaxji ronigixiwinishe, rash de‐e wihokhura, egi horuxujwire Jerusalemra harnaj hoixjina washa wagigus hashiniwira, egi wang de‐e wa‐i earnira hishukjawi nanash’iharajena.

²⁹ Egi Peter egi Apostel hijanera hornihairena, egi wairena: Jasgegi Maura hiraijera harnaxgunkjanihawina wankshigra worujis hirekjanena.

³⁰ Hianjwahawira Mau harninera Jesus niambhina, E d’erawina egi nainja hoijge rakanagwina.

³¹ E Maura hankshikerena nab‐hoishoro harnira hik’uanaga huinkjege egi wankshig‐hoi ruxurug. Egi Israel washa woishanara najgerakarateg wogakjege egi washa woishanara wagit’unekjege.

³² Egi washa de‐e horagra winehajena, egi Naxirag Wakanjangra hishge shesgena, E Maura wogarna jarnaga harnaxgura.

³³ Jaja she‐e naxguinegi najgera wamakunukuni hirewahina egi d’ewahirekje airena.

³⁴ Egi waehinanka eja hisha nashina Pharise‐hisha Gamaliel higairera wowagax‐hiperes hisha wankshigra harnaj gishakjineisha herena egi Apostelra jowexjinig hihinab‐hirekje ena,

³⁵ Egi wawagena: Israel wang raniwira, hirakikarauwine jagu sh’unkjanihawi hirarawire wang de‐e wawikiora.

³⁶ Hojishana inke hamb rohanina Theudas nashina, kirajangarnaga hishere nankikina. E wangra roha harnina ejaxji hogihijopguni, eja herekhinena. D’ehirena egi hijanera harnaj jarnaga harnaxgura hoerairena egi inke washanisha hereranina.

³⁷ Wang de‐e hageja egi Judas nashina Galilea‐eja hereisha, ma‐woirowehi hambeja egi wankshigra roha hironakshana, hishge d’ena, egi hijanera jarnaga harnaxgura harnaj hoerairena.

³⁸ Egi shegunegi hinigawina: Wang de‐e inke hawe wahiwinine egi shegu unang wahiwire, egi wogus de‐e egi shige wore de‐e wankshigregi howajigi inke washanisha herenikjanena.

³⁹ Eshi Maura eja howajigi inke rushe shuruxurugnikjanihawina, ningete‐e Maura rakissa washurajau hirakish’ewiege.

⁴⁰ Egi hornagijairena, egi jaja Apostelra warniankiriregi egi wawojinena, egi warogix‐hirena inke Jesus rash harnira wihokhu‐hiranikje, wagirushjare‐hirena.

⁴¹ Egi wogishawa nige‐howakarairena waehinanka jowehireja washinkisge waikarabhirege rash earnira hawau hiroshig hawewahirege.

⁴² Egi hamb‐hokahi wohokhu‐hojhixeteja unankshana egi jhira harnaj wounankshana, washa wagigusra inkaga harushjahirani egi Jesus Kristus wihokhura.