Hoixgara 4 - Winnebego Bible Portions 1907

¹ Egi wankshigra wokit’arnank’u, nabhoruxaj hirukanara egi wohokhu‐hojhixete hirukana hungra egi Sadusera wirajirena.

² Wogiteghirena wankshigra washa wagigusnanke egi wahokhunanke Jesus hiu d’era hakiha wanshiginekjane airege.

³ Egi warukos‐hirena, egi jhiwornasse hojhieja woshuirena hainijoweja hipa, hoxjarnaginige.

⁴ Eshi rohaxji hoit’era naxguinegi harnaxguinena, egi ejaxji wankshigra hogihixete sajanguni.

⁵ Egi herena haininegi, washirukana warninera, egi xetera egi wowagax hiperesra,

⁶ Egi Annas nabhoruxaj hirukana hungra, egi Kaiaphas egi John egi Aleksander, egi jarnaga nabhoruxaj hirukana hung washakhina, she‐e harnaj Jerusalem‐eja stoirena.

⁷ Egi jaja jowehireja washuiregi, wawigiwax‐hirena, homashja jaguisha hish’uwianaga, egi rash jaguisha hish’uwianaga de‐e wash’uwishe?

⁸ Egi Peter Naxirag Wakanjangra hoixjina, wawagena: Wankshig hirukana raniwira, egi Israel xete raniwira,

⁹ Hamb de‐e ha’einawina washa phi wang howashaisha hagiuwira, homashja jaguisha wauanaga rushjangi,

¹⁰ Harnaj hiperes‐nikjanihawina egi Israel wankshigra harnaj, Jesus Kristus Nasaretheja herera rash harnira wauna, E naramiheja haraisarajwina, E Maura d’arnagre eja kikawa‐a howakirihina, E wauna, jowerawiregi wang howasha rushja nashinjane.

¹¹ De‐e inira herena, jhi‐u raniwira E nige‐horat’usharawina, E inioxete jhiopasse haminagra herena.

¹² Egi inke wankshig‐iwahi hijane junina, inke rash hijanera manegi wankshigra wogairanina, e niamb‐wangahikjawi.

¹³ Egi wajairena Peter egi Johnga winuankhuni wairera, egi wawiperes‐hirena inke wawagax‐hiperes‐hiranira egi inke wang‐washinperes‐hiranira, khorairena, egi wawiperes‐jinena Jesus hakishu u‐narnihera.

¹⁴ Egi wangjega hajairena, e rushjara wakishu nashinjena, inke washanisha hikipa hige‐ruxurug‐hiranina.

¹⁵ Egi jaja hijahi u‐washiregi woehieja, hokikit’airena,

¹⁶ Wairena: Wang de‐e jasge hiwagigikjanihawishe? Hisgexji washa wowakanjank xeteisha wagiuinegaja, Jerusalem‐regi jhira harnaj wiperes‐hiregaja, egi inke khibahi hinuxurug‐winigaja.

¹⁷ Eshi inke hiraijera wankshigregi hornaenikjena, higuana mashja winakewe‐hiwahikjawina, epa inke shige rash de‐e wankshigra hisha hirokit’airanikjena.

¹⁸ Egi wagigoirena, egi warogixirena inkaga wirokit’airanikje, egi shige inkaga Jesus rash harnira wihokhuiranikje.

¹⁹ Eshi Peter egi Johnga hornihairena egi wawagairena: Washa wogisogji awire: She‐e phingishi hiraijera neharnanixgunkjanihawishe, Maura E hinke harnaxguwinianaga.

²⁰ Inke hit’et’era rashja duxurugwinina, jagu hajhawira egi naxguwira.

²¹ Egi hiraijera winakewe wahirena, egi kerewagigirena, inke hawewahi washa wigieranige, wankshignanka eja hawau, wankshigra harnaj Maura gloria‐giginanke washa uinega esge.

²² Wangjega ma‐kerepana‐jopanaga hashanahana, e washa wowakanjank hirushja hirega wauinena.

²³ Egi jaja kerewagigirega, wawokishgaineja howakarairena, egi harnaj horaghirena nabhoruxaj hirukana hungnanka egi xetera jagu higairawigi.

²⁴ Egi jaja she‐e naxguinegi hishankira wenisge Maura gikaraj hajiarairena, egi wairena: Hirukanara, Maura neninegaja, maxihoshuagra egi mara egi tejara egi jarnaga washara hoshuakhi sh’ungaja,

²⁵ Ne wa’shegaja ware hashinira Dawidga horag‐ragigina, wena: Jagu‐u hirarujeregi herera wogiteg‐hiranaga woxehinankshe, egi wankshigra washa hoinigexji wewinankshe?

²⁶ Hung manegi herera nashinena, egi washinukanara sto‐khinena Hirukanara hakhiraire, egi Kristus harnira hakhiraire.

²⁷ Hisgexjingaja jhinag‐egi sto‐khinegaja, ware wakanjank hashinira Jesus E hashawaxuna hakirairegaja, Herodes egi Pontius Pilatus egi hirarujeregi herera wakishu egi Israel wankshigra,

²⁸ Uinena, jagu nab hashinira egi wowewi hashinira jagu jornineja uinekje hirarera.

²⁹ Egi shegunegi, Hirukanara, horuxujre, woinakewehi warninera, egi ware washinira wogare, e hoit’e hashinira winuankhuni airekjena.

³⁰ Deshegu hire, nab hashinira wahahuhige howashara rushjawiwine, egi washa woijantira egi washa wowakanjank unkjena Ninkjang wakanjank hashinira Jesus rash harnira hiu.

³¹ Egi jaja Mau gikarajra rashjainegi, hounanka hixgana hajinja stonagra, egi harnaj Naxirag Wakanjangra hoixjinena, egi Mau hoit’era winuankhuni airena.

³² Egi worohaxji harnaxguanka najgera hishankira egi naxiragra hishankirairena, egi jarnagaka inke hishankirarareshge washara ewasha warninera nearnina airanina, eshi washara harnaj hakishjeg warninena.

³³ Egi Apostelra homashja rokana wihokhuinena Hirukanara Jesus hakiha‐wankshig‐hoina. Egi harnajixji najojara rokana wagigirena.

³⁴ Egi jarnagaka inke hisha washara hirujisnina, jarnagaka ma harnira egi jhira wawikuruwinena, egi washa wawiruwinega hoikisgera warnianjirena.

³⁵ Egi Apostel si hireja wawagishuirena. Egi wankshigra jarnagaka wawigiweninena jasgeshana rogunanki.

³⁶ Egi Joses e Apostelra Barnabas higairena (warukhegra hinigra hige wairena), Lewit hisha herena, Kiprus mainja herena.

³⁷ E manige wiruwina, egi shurara harnijina, egi Apostel si hireja wagishurna.