Hoixgara 27 - Winnebego Bible Portions 1907

¹ Egi jaja wajowe Italia‐eja wawatekjawi hirarawira, Paulus wogairena egi hornassaire hijanera hisge, hisha Julius higairera eja Augustus manape hornihe harnieja, manape hung hisha herena.

² Egi waj‐hisha eja homianagwina Adramitium‐eja howajisha, patire‐hawina, Asia hijejera hahi wawekjawi wagiuwina. Egi Aristarxus higairera, Makedonia wankshig hisha Thessalonika‐eja hereisha hinkishu rawina.

³ Egi haininegi Sidon‐eja hahiwina. Egi Julius Paulus phingigina egi hijakorowahieja howaregigina, wagirairekjege.

⁴ Egi jaja eja patire‐hawira Kiprus horajgera wawawina, mahaxjinge esge.

⁵ Egi jaja wajowe Silikia egi Pamphilia tejara hahi wawawina Mira‐eja hahiwina, Likia jhinag eja hereisha.

⁶ Egi eja manape hungjega wajisha hiena Aleksandriaeja hereisha, Italia‐eja howarahegi egi eja hushuwina.

⁷ Egi jaja hambra roha xerenig hauwina Knidus hiwusunsh hajangere hahiwina maha‐hauwingejini Krete horajgera wawawina Salmone hikijara.

⁸ Egi haixara wojexina, wauni phira higairera eja hahiwina, Lasea jhinagra hiwusunsh‐eja.

⁹ Egi shegunegi hamb rohaxji uinena egi shegunegi wajowera nuwawangesgena, hantaginaj houna haixagihige, esge Paulus washa waraperessana.

¹⁰ Egi wawagena: Wangra hajharna, wajowe hikiware de‐e washa wangaishgakjanihawina egi woxawarnira rokanakjanena, inke hokikshuagreshana hereni egi wajra, egi shige wankshig‐hoi harniwira.

¹¹ Eshi manape hungra hirussawira egi waj harninanka hiraijera warnaxguna, washa jagu Paulus e‐ga hak‐kererena.

¹² Egi wauni de‐e inke eja hamani khi houphinige, esge horohana shegu rera e giphinena, ruxurugphingi Phenikeeja hahina’inekjege egi eja hamani khinekjege. E Kreta waunisha herena, e wiorojonje wioire sanig eapahi minagshana egi wioweshguni wioire sanig eapahi minagshana.

¹³ Egi jaja jowexjinig re‐kuhuhigi, jasge rogunera ruxurughirana hirairena eja watire‐hirena, egi Kreta hirawakarahera howairena.

¹⁴ Eshi inke s’ini maintajehi xete hikipa jina Euroklidon higairera.

¹⁵ Egi jaja wajra hawajera egi inke maintajehieja u‐ruxurugnina hoikara hagigiwina.

¹⁶ Egi wij‐isha hiwusunsh hahiwina e Klauda higairena, warera rokana wajra wajeja howajihu wahira.

¹⁷ E jaja hijowa‐jiahuirera, wagijire wiuinena, wajra rusgij hirena, egi pusake‐horussuwu hokit’une nakawairege, esge wiroixobra warushib‐hirena, egi shesge hoikarakhinena.

¹⁸ Egi jashja hirawera roikanawina haininegi wajra haha‐hawina.

¹⁹ Egi hamb hitanihanigi waj‐wirok’una nige‐wat’untawina.

²⁰ Egi jaja hambra roha wira egi shige wiragoshgera inke jantinanina egi inke jashja xunu wawawinina, woinashi horniabra harnaj shegijawina,

²¹ Egi s’ixji inkaga waruj hiranina, Paulus horoghireja nashina egi wena: Wangwira, harnainaxguwigajeregi, inke Kreta eja hihuwininana egi washokishga de‐e inke hinuxurug‐wininana egi woxawarnira.

²² Egi shegunegi khirukheg nishiwina inke wankshighoina hisha ningixawarninikjanihawina, wajrashana.

²³ Hahere Maura waxopiniwarajire harnira hikijaharegi nashina, hajinja winera, egi E harnaxgura.

²⁴ Wena: Paulus inke naxiranine, Kaiser jowehieja harnini hahirekjanena, egi horuxujre Maura harnaj wornik’una jarnaga wajowe harnikishu ura.

²⁵ Esge wangwira khirukhegwire, Maura harnaxguna, jasge hungirag hirare shesgekjanena.

²⁶ Eshi jasgegi wij‐isha hinahikjanihawina.

²⁷ Egi jaja hahera kerepanaishanaga‐jop‐hashanahara jina, egi Adria‐regi hokiwagsha hihiwina, hahe kissagregi waj‐hirukanara manige hiwusunsh hahireguni hirairena.

²⁸ Egi gijgairena, egi fathomra kerepananup hierena. Egi jaja jowexjinig hiraijera howa‐hiarairegi, shige gijgairena egi fathomra saja‐hashana hierena.

²⁹ Egi naxirairena ini hawajabhirege hirairege wirasawarehira jopiwi waj‐shinjeja niot’unairena, egi hambsheshi hirairena.

³⁰ Egi waj‐hirukanara jaja waj‐xununigra teja wot’umbhiranaga gias hikorohoirena, waj‐joweja wirassawarehi hot’une kik’unankshana.

³¹ Paulus manape hung‐jega egi manapera wawagena: Wang de‐e inke wajregi uinanigi inke niamb shuruxurugwininana.

³² Egi manapenanka wagina waj‐hiroishgera mawax egi shibre hirena.

³³ Egi hamb hakirigi Paulus harnaj waruj warnagi‐ina, wena: Hamb de‐e hamb kerepanaishanaga‐hijop‐hashanara herena harapewianaga egi hantaraginajwi inkaga warajwini.

³⁴ Esge naixjira warajwisheshi, de‐e himanishjawinana, jarnaga raniwira nassu washiniwieja najura hinkisha ningishib‐ranikjanihawina.

³⁵ Egi jaja deshesge e‐gi, waisgabduj russana egi Maura wainginapshana jowehireja, egi jaja rujhegi ruj‐jirena.

³⁶ Egi harnaj khirukheghirena egi hishge waruj‐hirena.

³⁷ Wankshigra hogihinup‐anaga‐kerepana‐shagowi‐anaga‐hakewehashana harniwina, waj‐eja herera harnaj winewira.

³⁸ Egi jaja wainaj hirera wajra haha‐hirena egi waisgab‐poroporora tejainja wot’unairena.

³⁹ Egi jaja hambra, mara inke hiperes‐hiranina. Eshi hoiksheg hisha hajairena moga hokushinig juankshana, eja wajra howairehi nainena ruxurugphingi.

⁴⁰ Egi jaja wirassawarehira nieja womawax‐hiregi egi hirussawi hiuna rushgairena egi wiroixob‐jowera waainena, maintajehira hakira, nijejera hapahina.

⁴¹ Egi nige tejara agkhi heregi eja hagirena eja wajra harasi‐hirena egi jowera shja‐hinakshana egi inke hixga ruxurugnina, eshi waj‐shinshra jashja boshena.

⁴² Egi manapenanka hornassairera d’ewahirekje hirairena, inke hisha nimp‐anjinaganaga khishib‐nikjege.

⁴³ Eshi manape hungra Paulus niambhi‐nainena, rushag wahirena jagu hirairega, egi u‐washirena jarnaga nimp ruxurugkhi jorni tejainja howahiarairekjege egi hak’ukhini hirekjege.

⁴⁴ Egi hirotara naparas hiuinekje egi hota waj‐hoishishish hiuinekje. Egi shesgehiranaga moroija harnaj hak’ukhini hirena.