Hoixgara 23 - Winnebego Bible Portions 1907

¹ Egi Paulus waehinanka woruxujshana wena: Wangra egi hikhinubwira, wowewiphi hiu wankshig haianjena Maura jowehieja hamb‐tegi hipa.

² Egi nabhoruxaj hirukana hungra Ananias hijarnashinankhi i‐eja hoji wa’shina.

³ Egi Paulus wagena: Maura hornijinkjanena jhiruhisgahire ranina, mishanag‐anaga woehira hiu hishewesiwi egi hoji waira’shi woehieja roxiagra.

⁴ Egi hijarnashinankhi wairena: Maura nabhoruxaj hirukana hung harnira sharaxjashgunishe?

⁵ Egi Paulus wena: Hikinubwira inke hiaperesnina e nabhoruxaj hirukana hungra heregi, deshesge wagaxankshana: Wankshig washinira hirukana harninera inke washinohire higarnina.

⁶ Egi jaja Paulus hiperesgi hota Sadusera egi hijanenanka Pharisera waunankhi, mashja hit’et’ena woehieja, wangra egi hikhinubwira, Pharise harnina, Pharise hinighire harnina, woinashi de‐e hawau egi d’era hakiha wankshig‐hoinra hawau hiwesiwinena.

⁷ Egi jaja deshesge e‐gi Pharisera egi Sadusera kikshabhirena egi worohanka khiruje‐khinena.

⁸ Sadusera wairena, inke hakiha wankshig‐ijunina inke shige waxopiniwarajirera egi naxiragra, eshi Pharisera shesgakshe airena.

⁹ Egi woxera rokana hirena. Egi wowagax hiperes Pharise eja herera nashinena egi wakitag‐hirena, wairena: Wang de‐e inke washinohire hiagiewinina. Egi naxiragra hisha nigeshge waxopiniwarajire hokit’arnanki, inke Maura hinkissarnikjawina.

¹⁰ Egi jaja wopunusesgera rokanagi manape hung xetera naxirena Paulus ruxaxabhirege hirege, esge manapera harnukanag wa’shina egi horoghireja harni‐hihinabhirena egi manape hojhieja harni hoikawairena.

¹¹ Egi hahe‐egi Hirukanara hikijahieja nashina, egi wena: Paulus, wanaishgunine, Jerusalem‐regi hunsharagke hishge hikisge Rome‐eja hunsharagki.

¹² Egi jaja hamb hakirigi Judra hota sto‐jijerena egi harnaj wihohirena wairena, inke waruj‐hiranikjaneshe egi shige inke rajga‐ranikjaneshe Paulus d’ehiregishana.

¹³ Egi kerepanajop‐anaga hashana wauankshana khikarahenanka.

¹⁴ Egi nabhoruxaj hirukana hungra egi xetera wawirahirena, egi wairena: Wihohi xete hauwina, inke wahajnikjanihawina Paulus d’ehawigishana wahaijanihawina.

¹⁵ Esge ne, waehira wakishu, manape hung xetera hogiragwiaje, hainigi harnigarni jikjawina washara hiraijera wogisogji wessiwi rakikunkjawige, egi kheni hiwusunsh jini, d’ehakjanihawina.

¹⁶ Egi jaja Paulus hinugjabra hinigra naxgungi hirapenankhi, rarnaga egi manape hojhieja hokewena egi Paulus hogiragshana.

¹⁷ Egi Paulus manape hungra hisha gigorna egi wena: Wang‐hojinjin de‐e manape hung xeteja harnirare, washaisha hogiraikjanege esge.

¹⁸ Esge russana, egi manape hung xeteja harnihina egi wena: Paulus hornassairanagra hingigorna egi hingitarna wang‐hojinjin de‐e harnigarni hajikjege, e washaisha hinigekjanege.

¹⁹ Egi manape hung xetejega nabeja harukos‐anaga egi hijahi inekhi hakishu hina, egi higiwaxshana: Jaguisha hunagisharaikjaneshe?

²⁰ Egi wena: Judra warnaira hakishjeg‐hirena hainigi woehieja Paulus hashini rahikje rornigiguinena, washara hiraijera wogisogji wessiwi kikuinekjanege.

²¹ Eshi inke wagiuinianje, hirapenankejini wangra kerepanajophashana wa’uankshana, e wihohirena inke waruj‐hiranikjaneshe egi shige inke rajgairanikjaneshe jaja d’ehiregishana, egi wonara gijekje hapenankshana.

²² Egi manape hung xetejega wang‐hojinjinjega keregigina, egi rogixina washa de‐e hunagisharagre inke hisha hogiragnianje.

²³ Egi manape hungra nupiwi gigorna wawagena: Manapera hogihinup wigikorohore Kesarea‐eja howarairekjena, egi shung‐haminagra kerepana‐shagowi, egi wangwosha harnira hogihinup, hahegi gijiwi hishankijushgunigi harairekjena.

²⁴ Egi wanoijgera wigikorohoirena Paulus haminaggigirekjera, egi hung Feliks‐eja phi hagarni hahirekjanena.

²⁵ Egi wawagax hisha una, deshesge ena:

²⁶ Klaudius Lisias hinikaragireharna hung phixji Feliksra.

²⁷ Wang de‐e Judra rus‐hirena egi d’ehi hikorohoiregaja, egi hahina manapera wakarakishu egi wakaraishena, Roman hisha heregi naxguna.

²⁸ Egi jaja hiae‐naira jaguisha hawau washinarajnankhi, woehi harnineja harniahina.

²⁹ Egi hiaena, washinarajnanka woehi harnineja washokigus wagairena, eshi inke washa hirarajnaga d’ehira phinina inke shige rusgij‐hire phinina.

³⁰ Egi jaja hungiraghirera wangjane Judra hirapenankhi, higuana eja howareningigina, egi shige washa wawirarajnagre uwashina hishge joweraija higairekjege jaguisha hirakiranankhi, hinikaragina.

³¹ Egi manapera jagu uwashirera shesge hirena, Paulus rus‐hiranaga egi Antipatris‐eja harniahirena haheregi.

³² Egi haininegi wang shunghaminagra hakishu rewagigirena egi hijanera manape hojhixetera hakja howaguirena.

³³ Egi jaja Kesarea‐eja hahiregi egi hungananka wawagaxra hok’uinegi, shige Paulus joweja gikerena.

³⁴ Egi jaja hungananka wawagaxra hajagi, mowagax hajinja heregi higiwaxshana. Egi jaja hiperesgi Kilikiaeja herera, wena:

³⁵ Nanixgunkjanena jaja washiraninaj washinira hishge hajiregi. Egi Herodes woehi hojhixete harnieja hirakara wa’shina.