Hoixgara 22 - Winnebego Bible Portions 1907

¹ Wankshigra, hikhinubwira egi hianj‐niwira harnaixguwine hakikox warnigekjanihawina.

² Egi jaja Hebraia hit’e wawokit’e naxguinegi hiraijera xapgunixji‐hirena egi (Paulus) wena:

³ Judra wang hisha wauanjena Tarsus‐eja hijhuinena jhinag Silikia‐eja hereanina. Eshi jhinag tegi hixetena Gamaliel si‐hieja, egi hianj‐hiwahiwira woehi harnira wogisogji hingigus hirena, egi washa wogisogji hiau Maura harnaxguna, hamb de‐e warniu harajane shesgena.

⁴ Egi waiaishana‐naina hauanjau hot’eja warniahina de‐e howairera, watusgijarnaga egi jhi‐wornassena wangra egi hinugra.

⁵ Deshesge nabhoruxaj hungra egi xetera harnaj hingairena, eja shige wawagaxra hotussana wakhinubra wagiuine egi Damaskus eja wawatena, jarnaga ejakhi rusgij Jerusalem‐regi warni‐hakirikjege howairekjege.

⁶ Egi herena hikiwarera tahau, egi Damaskusra hiwusunsh hahigaja, wirarojonjeregi xapgexjinig wangregi hohamb howajina, hohamb rokana hiraijina.

⁷ Egi mainja hunkhanena egi hora naxguna waigena: Saul, Saul jagu‐u hinaishana nanash’ishe?

⁸ Egi horniaharna: Peshe nineshe, Hirukanara? Egi waigena: Newinena Jesus Nasaretheja herera, E hiraishana nanash’ina.

⁹ Egi jarnaga hinkishu unagra hisgexji hokambra hajairena, egi naxirairena. Eshi hora inke naxgu hiranina, hunkit’era.

¹⁰ Egi wahena: Hirukanara jagu haunkjaneshe? Egi Hirukanara waigena: Nashine egi Damaskus‐eja howarare, egi eja washara harnaj hornigirag‐hirekjanena, jagu shunkjera unigigirekjanena.

¹¹ Egi jaja hohamb rokananka hawau inke washa hajarnira, hinkishu unanka ainuti‐hirena, Damaskus‐eja hahina.

¹² Egi hisha Ananias higairera wang phisha herena, woehira exji herehijena, Judrananka harnaj washa phi hornaxgunankshana eja jhinangra.

¹³ E hiraijina, egi hikijanegi nashina, egi waigena: Hikhinubra Saul hojamb hashinira kurusre, egi howagixeja hotuxujshana.

¹⁴ Egi wena: Hianj‐hiwahiwira Mau harninera ningijhana, woshga harnira hiraperes‐hikjege, egi Phinjega hashjarna egi i‐harnieja hora howaji nanaxguna.

¹⁵ Egi jagu hashjare egi nanaxgune wihohi hashinikjanena wankshignagre harnaj eja hapahi.

¹⁶ Egi jagu‐u hish’uwushashe? Nashine, egi ni‐hawaxuinekhine, egi washa woishana washinira rusha‐wagigire Hirukanara rash harnira rajre.

¹⁷ Egi herena jaja shige Jerusalem‐eja hakirira, egi wohokhu‐hojhixeteja hagikaraj hajau warnaira nigeoware hajijena.

¹⁸ Egi hajharna, waigena: Xapge higire egi Jerusalem‐regi xapge nigeowarare, worag hashinira inke ningirushiranikjanena ne‐hawau.

¹⁹ Egi wahena: Hirukanara, hiperes‐nankshana jhiwawornassera egi wohokhu hojhieja wawajina jarnaga harnanixgura.

²⁰ Egi jaja martir hashinira Stephan higairera wa‐ira xura, nishge hija nashihajena egi d’era haiphianjena, egi d’ehinanka waini warninera wawiragikarana.

²¹ Egi waigena: Nigeowarare, egi wankshig horogeja hari howare‐ningigikjanena.

²² Egi shejaixjipa hoit’era harnagixguinena egi higuana mashja hit’at’airena, wairena: Deshesgera manegi nigeoturawire, inke niamb‐jehi phinina.

²³ Egi jaja uwanegi egi wonashi warninera wakurushoroj‐hirena egi majushishig wangeja hot’unairena.

²⁴ Manape hung xete manape hojhieja harniokewe wa’shina maspahi higipsinsh hiwessiwi wa’shina, e hiperesjege jegu‐u uwa hirakiranankhi.

²⁵ Egi jaja waxu hirusgij‐hiregi Paulus manape hung hisha hijarnashinjegi wagena: Jasge woehieja u‐nishirawishe Roman wangra hisha kheni haehirani maspahi higipsinshra.

²⁶ Egi jaja manape hung‐jega she‐e naxgungi, ranaga egi manape hung xetera hogiragshana, wena: Hirakara une jagu sh’unkjanera, wang de‐e Roman hisha herena.

²⁷ Egi manape hung xetera jina egi wagena: Hungiragre Roman ranishe? Paulus wena: Hojia.

²⁸ Egi manape hung xetejega horniharna: Rohaxji hiroweharna de‐e duxurugshana egi hereakhira. Egi Paulus wena: De‐eshi Roman wankshig‐ha‐ina.

²⁹ Egi higuana nigeowakarairena e washangishgashga hikorohornagra, egi manape hung xetera hishge naxirena, Roman hisha herera hiperesanaga hageja, egi rusgijgejini esge.

³⁰ Haininegi wogisogji hiperes‐roguna jagu hawau Judrananka washa hiraraj‐hiregi, wirusgijra girushgena, egi nabhoruxaj hirukana hungra egi waehi warninera harnaj jowehieja ji‐wa’shina, egi Paulus harnikirina egi jowehireja wagikerena.